Atası öldürülən oğul prokurorluğu ittiham etdi, günahsız yerə mühakimə olunana bəraət verilməsini istədi

Sumqayıt Apelyasiya Məhkəməsində evində ağır cinayət törədən Füzuli rayon sakini, 1947-ci il təvəllüdlü Bəndalı Qarayevin məhkəməsi başa çatıb. İttihama görə, Bəndalı Qarayev özünə məxsus olan Sumqayıt şəhəri, Yaşma bağları, ev 134 ünvanındakı evində müvəqqəti yaşayan tanışı Siyavuş Nəbiyevi qətlə yetirib.

Onlar 9 oktyabr 2013-cü il tarixdə, saat 15 radələrində həmin bağ evindəki tikilinin qarşısında skamyada spritli içki qəbul ediblər. Bəndalı sərxoş olandan sonra Siyavuş Nəbiyevə evdən çıxmağı tələb edib. Siyavuş isə Bəndalının bu tələbinə etiraz edib və onu nalayiq söyüşlərlə təhqir edib, yumruqla vurub.

Buna görə də Bəndalı Siyavuş Nəbiyevlə dalaşaraq, ona bədəninin müxtəlif nahiyyələrinə, o cümlədən başına zərbələr endirib. Həmçinin Bəndalı Siyavuşu itələyərək yerə yıxıb. Həmin vaxt o, Səyavuş Nəbiyevə bədən xəsarəti yetirib.

Bundan bir neçə gün sonra, yəni oktyabrın 12-də Bəndalı Qarayev yenidən özünə məxsus evində Siyavuş Nəbiyevin yanına gəlib. Bəndalı orada Siyavuş ilə yenidən mübahisə edib və onun bədəninin müxtəlif nahiyələrinə əli ilə zərbələr endirib. O, həmin vaxt Səyavuşu döyərək, onun bədənin müxtəlif nahiyyələrinə çoxsaylı zərbələr endirib. Siyavuş aldığı xəsarətlərdən oktyabrın 13-də dünyasını dəyişib.

“Özümü günahkar saymıram”

Bu əməlinə görə Bəndalı Qarayev Cinayət Məcəlləsinin 126.3-cü (ehtiyatsızlıqdan zərərçəkmiş şəxsin ölümünə səbəb olma) maddəsi ilə ittiham edilib və Bakı Ağır Cinayətlər Məhkəməsinin hökmü ilə 10 il müddətinə azadlıqdan məhrum edilib. Hökmdən narazı qalan Bəndalı Qarayev və onun vəkili Sevda Əliyeva apelyasiya şikayəti veriblər. Şikayətdə Bəndalı Qarayevin barəsində olan hökmün ləğv edilməsini, bəraət hökmünün çıxarılmasını istənilib. Həmçinin zərərçəkmişin hüquqi varisi Kamran Nəbiyev apelyasiya şikayəti verərək Bəndalı Qarayevə bəraət verilməsini xahiş edib.

Hakim Vidadi Cəfərovun sədrliyi ilə keçirilən prosesdə ifadə verən Bəndalı Qarayev bildirib ki, oktyabrın 13-də, axşam saatlarında Siyavuşun telefonuna zəng vurub: “Həmin vaxt Siyavuşun telefonu bağlı olub. Öz-özümə oktyabrın 9-da Siyavuşa yetirdiyim xəsarətlərdən ölə biləcəyini fikirləşdim. Ora gedəndə artıq Siyavuşun

öldüyünü gördüm. Bundan sonra Siyavuşun yaxınlarına ölməsi barədə məlumat verdim. Sonra Siyavuşun dəfnində iştirak etmişəm. Siyavuşa ağır dərəcəli xəsarət yetirməmişəm, onun ölümündə özümü günahkar saymıram”.

“Oğluma cinayəti boynuna götürməsini istədi”

Bəndalı Qarayevin həyat yoldaşı Rəhilə Qarayevanın sözlərinə görə, Bəndalı oğlu Bəkir Qarayevə Siyavuşa başından və qolundan çəkiclə xəsarət yetirdyini deyib: “Bəndalı oğluma Siyavuş ölsə, onun ölümünü öz üzərinə götürməsini istəyib. Bəndalı bildirdi ki, onun “türmədə” yatan yaşında adam olmadığını deyib. Bakir buna etiraz edərək Bəndalını danladı. Bəndalı isə bir qədər sonra gecə saatlarında oğlum yatan zaman çəkiclə onun başından vurub. Bununla bağlı Sumqayıt Şəhər Polis İdarəsinə müraciət edərək, oğlumu çəkiclə vurması ilə bağlı cinayət məsuliyyətinə cəlb edilməsini istəmişəm”.

Rəhilə Qarayevanın sözlərinə görə, oktyabrın 11-də Bəndalının bacısının həyat yoldaşı Rəşid Zeynalov vəfat edib: “Bəndalıya yas yerinə getmək lazım olduğunu desəm də, o, yas yerinə getməyib”.

Təqsirləndirilən şəxsin gəlini Təranə Kərimova bildirib ki, oktyabrın 12-də yas mərasimində iştirak etməsi üçün Rəşid Zeynalovun Xəzər bağlarındakı evinə gedib: “Həmin vaxt Bəndalı evdə olub, sonradan Bəndalının yasa gedib-getməməsini bilməmişəm. Saat 18 radələrində evə qayıtmışam, həmin vaxt Bəndalı evdə olub. Oktyabrın 13-də Bəndalı heç yerə getməyib, ancaq evdə olub”.

Şahid qismində ifadə verən İlham Hüseynov bildirib ki, təqsirləndirilən şəxsin qonşusu olub. Onun sözlərinə görə, Bəndalı Siyavuşun öldürülməsini boynuna götürməsini təklif edib.

Vəkil: “Bəndalının cinayəti törətməsi təsdiqini tapmır”

Təqsirləndirilən şəxsin vəkili Sevda Əliyeva bildirib ki, istintaq materialları ilə təqsirləndirilən şəxsin cinayət əməlini törətməklə təqsiri sübuta yetirilmir. Müdafiəçinin fikrincə zərərçəkmiş şəxsin ölümünə səbəb olan baş-beyinə qansızmanın məhz təqsirləndirilən şəxs tərəfindən yetirilməsi təsdiq edilmir. Onun sözlərinə görə, zərərçəkmiş şəxs daim spirtli içkilər qəbul etməklə ayıq halda olmayıb və onun 12 oktyabr 2013-cü il tarixdə ağır alkoqol sərxoşluğu vəziyyətində başqa şəxslərlə də görüşüb: “Zərərçəkmiş həmin tarixdə başqa şəxslərlə dalaşması və döyülməsi faktı inkar edilmir. Həmçinin təqsirləndirilən şəxsin oktyabrın 12-də bağ

evində olması, zərərçəkmiş şəxsi döyməsi və baş-beyinə ağır xəsarət yetirməsi faktı da təsdiqini tapmır”.

Vəkilin sözlərinə görə, mərhumun ağır vəziyyətdə yaşayıb, yaşamağa yeri olmayıb, ağır formada vərəm xəstəsi olub: “Təqsirləndirilən şəxs zərərçəkmiş şəxsə özünə məxsus bağ evində sığınacaq verib. Lakin onun vərəm xəstəliyindən əziyyət çəkdiyindən zərərçəkmiş şəxsin bağ evində qalması ailəsində narazılıq yaradıb. Buna görə də oktyabrın 9-da təqsirləndirilən şəxs zərərçəkmiş şəxsə başqa bir yer tapmasını bildirib. Həmin vaxt zərərçəkmiş şəxs təqsirləndirilən şəxsi söyüb, aralarında baş verən narazılıq zamanı zərərçəkmiş şəxs yıxılaraq xəsarət alıb və təqsirləndirilən şəxs onu ayağa qaldıraraq çarpayıya uzadıb. Təqsirləndirilən şəxs bir gün zərərçəkmiş şəxsin yanında qalıb. Bir gün sonra zərərçəkmiş özünü yaxşı hiss edib, sərbəst hərəkət etdiyini görən Bəndalı özü yaşadığı evinə qayıdıb”.

“Bəraət hökmü çıxarılsın”

Vəkilin sözlərinə görə, oktyabrın 11-də təqsirləndirilən şəxsin bacısının həyat yoldaşı Rəşid Zeynalov vəfat edib: “Oktyabrın 12-də Rəşid Zeynalov dəfn edilib. Həmin günü dəfn mərasimində iştirak etmiş şəxslər də təqsirləndirilən şəxsi dəfn yerində görüblər və belə olan halda təqsirləndirilən şəxsin səhər saat 11.00 radələrindən saat 18.00 radələrinədək Yaşmadakı bağ evində olması inandırıcı deyil. Oktyabrın 12-də Siyavuş Nəbiyevin həmin xəsarəti başqa şəraitdə və başqa şəxslərdən tərəfindən alması da inkar edilmir. Təqsirləndirilən şəxs oktyabrın 9-da zərərçəkmiş şəxslə dalaşmasını, onu vurmasını, eyni zamanda özünün də zərərçəkmiş şəxs tərəfindən döyülməsini inkar etmir. Lakin oktyabrın 12-də Bəndalı zərərçəkmiş şəxsi vurmayıb. Cinayət işinin materiallarında olan məhkəmə-tibb ekspertizasının rəyindən görünür ki, Siyavuş Nəbiyevin ölümünə səbəb başın küt travması nəticəsində baş-beyinə qansızma olub və həmin xəsarətlər 12 oktyabr tarixə uyğun gəlir. Bundan başqa, həmin rəydə 9 oktyabr tarixə uyğun gələn xəsarətlərin də olması qeyd edilib. Lakin həmin xəsarətlər ayrı-ayrılıqda və ümumilikdə sağlamlığa zərərvurmayan xəsarətlər qrupuna aid edilib. Qeyd olunan xəsarətlərin təqsirləndirilən şəxs tərəfindən yetirilməsi inkar edilmir. Lakin 12 oktyabr tarixdə yetirilən və zərərçəkmişin ölümünə səbəb olan xəsarətlərin məhz Bəndalı Qarayev tərəfindən yetirilməsi təsdiq edilmir. Buna görə də Bakı Ağır Cinayətlər Məhkəməsinin hökmünün ləğv edilməsini və müdafiə etdiyim şəxsin barəsində bəraət hökmü çıxarılmasını xahiş edirəm”.

Hüquqi varis: “Atamla daşlaşmasını heç bir şahid təsdiq etməyib”

Zərərçəkmiş şəxsin hüquqi varisi kamran Nəbiyev deyib ki, təqsirləndirilən şəxs uzun illər zərərçəkmiş şəxslə dostluq edib: “Zərərçəkmiş şəxs evsiz qalan vaxt təqsirləndirilən şəxs ona yardım göstərərək, onun ağır formada vərəm xəstəliyindən əziyyət çəkməsinə baxmayaraq, ona özünün bağ evində sığınacaq verib, hər gün onu isti qida ilə təmin edib. Təqsirləndirilən şəxs səmimi izahat verərək, 9 oktyabrda zərərçəkmiş şəxsin aldığı xəsarətlərin aralarında yaranmış mübahisə zamanı yetirilməsini inkar etməyib. Təqsirləndirilən şəxs oktyabrın 12-də isə ümumiyyətlə bağda olmadığnı məhkəmədə deyib. Lakin məhkəmə hökmündə təqsirləndirilən şəxsin izahatı dəyişdirilərək qeyd edilib ki, guya o 12 oktyabrda, saat 11.00 radələrindən 16.00 radələrinə kimi bağda olmasını bildirib. Həmin tarixdə təqsirləndirilən şəxsin bağda olmasını və atasının zərərçəkmiş şəxslə dalaşdığını heç bir şahid məhkəmədə təsdiq etməyib. Təqsirləndirilən şəxsin sonradan bir neçə şəxsə zərərçəkmiş şəxsin ölməsini deyib, cinayəti həmin şəxslərdən öz üzərlərinə götürməsini xahiş edib. Bu da zərərçəkmiş şəxsin məhz Bəndalı Qarayevin yetirdiyi xəsarətdən dünyasını dəyişməsi nəticəsinə gəlməyə əsas vermir. Atam həmin gün almış olduğu xəsarətləri başqa şəxslər də yetirə bilərdi. Lakin istintaq orqanı kifayət qədər araşdırma aparmadan Bəndalı Qarayevin ətrafında olan bir neçə şəxsi dindirməklə belə qənaətə gəlib ki, zərərçəkmiş şəxs Bəndalı Qarayevin yetirdiyi xəsarətlərdən ölüb. 68 yaşlı fiziki cəhətdən zəif bir insanın heç bir səbəb olmadan zərərçəkmiş şəxsi döyməsi və ona ölümünə səbəb olan xəsarətləri yetirməsi inandıncı deyil. Atamın qətlində təqsirli bilinən əsl günahkar azadlıqda gəzir”.

Mərhumun oğlu bildirib ki, Bakı Ağır Cinayətlər Məhkəməsinin hökmünün ləğv etməklə, təqsirləndirilən şəxsin barəsində bəraət hökmü çıxarılmasını istəyib: “Siyavuş Nəbiyevin ölümündə günahkar olan şəxslərin müəyyən edilərək cinayət məsuliyyətinə cəlb edilməsi üçün cinayət işini istintaqa nəzarəti həyata keçirən prokurorluğa qaytarılmasını xahiş edirəm”.

Tərəflərin dinləyən hakim heyəti sonda Bəndalı Qarayevin apelyasiya şikayətinin qismən təmin edilməsi barədə qərar elan edib. Qərara görə, Bəndalı Qarayevin cəzası 7 ilə endirilib.

**

Oğlan üstündə qətl törədən 16 yaşlı qız cəzadan narazı qalıb

Bakı Apelyasiya Məhkəməsində ətldə təqsirləndirilən 16 yaşlı Aydan Xalitovanın apelyasiya şikayəti üzrə məhkəmə prosesi başlayıb. İttihama görə, ötən il noyabrın

27-də 1998-ci il təvəllüdlü Aydan Xalitova münaqişə zəminində Bakı şəhər sakini, 1991-ci il təvəllüdlü Şəms Abdullayevanı bıçaqla qətlə yetirib.

İstintaq zamanı münaqişənin oğlan üstündə baş verdiyi məlum olub. Aydan Xalitova Cinayət Məcəlləsinin 120.1-ci (qəsdən adam öldürmə) və 228.4-cü (soyuq silah gəzdirmə) maddələri ilə ittiham edilir.

Bakı Ağır Cinayətlər Məhkəməsinin hökmü ilə Aydan Xalitova 9 il 6 ay müddətinə azadlıqdan məhrum edilib. Hökmdən narazı qalan Aydan Xalitova apelyasiya şikayəti verərək cəzasının yüngülləşdirilməsini istəyib.

Hakim Abid Abdinbəyovun sədrliyi ilə keçirilən prosesdə təqsirləndirilən şəxsin apelyasiya şikayəti üzrə ilkin baxış iclası olub. Prosesdə onun anket məlumatları dəqiqləşdirilib, həmçinin apelyasiya şikayətinin dəilləri müəyyənləşdirilib.

Məhkəmə baxışı iyunun 21-nə təyin edilib.

**

Daş karxanasında törədilən qətl

Bakı Apelyasiya Məhkəməsində daş karxanasında qətl hadisəsi törətməkdə təqsirli bilinən Nurəddin Məmmədovun apelyasiya şikayəti üzrə məhkəmə prosesi başlayıb. İttihama görə, ötən ilin mayın 25-də Qaradağ rayonu Səngəçal qəsəbəsinin ərazisində yerləşən daş karxanasında Nurəddin Məmmədov münaqişə zəminində orada işləyənlər, Cəlilabad rayon sakinləri Qabil Həsənova və Fəryaz Məmmədova bıçaqlayıb.

Xəstəxanaya yerləşdirilən Fəryaz Məmmədov mayın 26-da orada ölüb, Qabil Həsənova tibbi yardım göstərilib. Bakı Ağır Cinayətlər Məhkəməsinin hökmü ilə Nurəddin Məmmədov 15 il müddətinə azadlıqdan məhrum edilib.

Hökmdən narazı qalan Nurəddin Məmmədov apelyasiya şikayəti verərək cəzasının yüngülləşdiriməsini istəyib. Hakim Abid Abdinbəyovun sədrliyi ilə keçirilən prosesdə təqsirləndirilən şəxsin apelyasiya şikayəti üzrə ilkin baxış iclası olub. Prosesdə onun anket məlumatları dəqiqləşdirilib, həmçinin apelyasiya şikayətinin dəilləri müəyyənləşdirilib.

Məhkəmə baxışı iyunun 21-nə təyin edilib.