Qurbanının qətlinin istintaq qrupunda iştirak edən qanqster uzun illər sonra niyə ifşa olundu
MTN-in məşhur “Qara kəmər” əməliyyatından sonra illərlə bağlı qalan bir çox sifarişli qətllərin və adam oğurluqlarının üzərinə işıq salındı. Bu əməliyyat 10 il əvvəl keçirilsə də, bu günə kimi üzərindən sirr pərdəsi götürülməyən və Hacı Məmmədovun yarımçıq məhkəmə ifadələri ilə onun tərəfindən törədilməsi işarə olunan bir çox cinayətlər də var…

Həbsinin 10 illiyi ərəfəsində İşgəncələrə Qarşı Azərbaycan Komitəsinin rəhbəri Elçin Behbudov Milli Təhlükəsizlik Nazirliyinin İstintaq Təcridxanasında ömürlük həbsdə olan sabiq polis polkovniki Hacı Məmmədova baş çəkib.

E.Behbudov modern.az-a deyib ki, Hacı Məmmədov həmişəki kimi bir nəfərlik kamerada saxlanılır: “Öz istəyi ilə heç kimlə görüşmür. O, bunu yaddan çıxmaq və unudulmaq məqsədi ilə edir. Evdən gələn azuqələri qəbul edir. Qanunvericiliyə görə o tipli məhkumlara nəzərdə tutulan qaydalar ona da şamil olunur. Hacı Məmmədovun kamerasında televizor var. O, şəkər xəstəliyindən əziyyət çəkir. Buna görə də MTN-nin istintaq təcridxanasının həkiminin birbaşa nəzarəti altındadır. Evdən göndərilən dərmanlar və türkəçarə üsullarla müalicə olunur. Hacı Məmmədov yağlı boya ilə şəkillər çəkir, muncuqla müxtəlif əl işləri düzəldir. Hətta o, yağlı boyalarla çəkdiyi şəkillərin beşini mənə hədiyyə edib. Onun çəkdiyi rəsm əsərlərinin hamısı şifrəlidir. O, şifrələrin anlamını heç mənə də açmır. Hacının hər rəsmində bir sirr var”.

Elçin Behbudov həbs yerlərində mütəmadi monitorinqlər keçirdiyini də deyib: “Planda Şəki, Zaqatala polis şöbələrinin müvəqqəti saxlanma yerlərində, Dövlət Miqrasiya Xidmətinin mərkəzi saxlanma yerlərində, eləcə də hərbi hissələrdə monitorinqlər nəzərdə tutmuşam. Komitənin ən sıx işlədiyi üç dövlət qurumu var. Bunlar MTN, Daxili İşlər Nazirliyi və Müdafiə Nazirliyidir”.

H.Məmmədovun cinayətlərinin tam araşdırılmaması bu gün də dartışılan mövzulardandır. Onun cinayətləri törətmə üsullarına diqqət ayıran sabiq istintaqçılar çox maraqlı bir faktı müəyyən ediblər. Məlum olub ki, məşhur qanqster sifarişli qətlləri icra etmək üçün mükafat kimi adam oğurlayırmış. Məlumdur ki, mərhum akademik Ziya Bünyadov 1997-ci ilin fevral ayının 21-də qətlə yetirilib. Bu sifarişli qətldən 11 gün əvvəl — 10 fevral 1997-ci ildə iş adamı Ülvan Bağırovu Hacı Məmmədovun bandası oğurlayıb.

Maraq doğuran faktlardan biri odur ki, Ziya Bünyadovun qətlinin istintaq edilməsi üçün təşkil olunan əməliyyat-istintaq qrupuna əməliyyat müvəkkili Hacı Məmmədov da daxil edilib. Belə məlumatlar da var ki, istintaqın ilkin mərhələsində Hacı Məmmədovun cinayətlərinin üstünün açılmasının qarşısını hazırda həbsdə olan, DİN Baş Cinayət-Axtarış İdarəsinin mülkiyyət cinayətləri əleyhinə bölməsinin sabiq rəisi Kamil Sədrəddinov alıb. K.Sədrəddinov həyata keçirilən əməliyyat işi ilə bağlı məlumatları əldə etməklə, onları Hacı Məmmədova ötürüb.

Hacı Məmmədovun məhkəməsində əməliyyat məlumatlarının ona ötürülməsində K.Sədrəddinovun rolunun olması da təsdiqlənib. Fevral ayının 10-u Hacı Məmmədovun bandası üçün, görünür, uğur gətirən və yaxud nə ilə isə əlamətdar bir gündür. Məhz həmin gün, amma 8 il sonra Beynəlxalq Bankın prezidenti Cahangir Hacıyevin həyat yoldaşı Zamirə Hacıyeva Hacının dəstəsi tərəfindən oğurlanıb.

Bundan 20 gün sonra martın 2-də isə “Monitor” jurnalının baş redaktoru Elmar Hüseynov da akademik Ziya Bünyadov qətlə yetirildiyi üsulla öldürüldü. Onu da Ziya Bünyadov kimi yaşadığı binanın blokununda gizlənən killer qətlə yetirdi. Hər ikisinin ağzından güllə ilə vurulub.

Bu kimi şəxslərin aşkarsızlıq şəraitində törədilən qətllərinin açılması çox vaxt tələb etməklə yanaşı, bu cinayətlərdən əvvəl törədilmiş cinayətləri də kölgədə qoyurdu. Hacı Məmmədov da törədəcəyi sifarişli qətlə görə belə mükafat almaqla özünü və bandasının ələ keçməməsini də təmin etdiyini düşünüb. Dəstəsinin fəaliyyətdə olduğu illər ərzində belə də olub. Amma 2005-ci ildə H.Məmmədovun sınanmış metodu iflasa uğrayıb. Bunun səbəbi bəlli deyil. İnanırıq ki, nə vaxtsa bu məsələnin üzərinə də işıq salınacaq.

Yada salaq ki, Ağır Cinayətlərə Dair İşlər üzrə Məhkəmə adam oğurluğu və bir sıra qətllərdə təqsirləndirilən Daxili İşlər Nazirliyi Baş Cinayət Axtarış İdarəsinin keçmiş baş əməliyyat müvəkkili Hacı Məmmədov və digər 26 nəfər barədə hökmü 2007-ci il yanvarın 19-da çıxarıb.

Daxili İşlər Nazirliyinin sabiq baş əməliyyat müvəkkili Hacı Məmmədov və daha 26 nəfər 2005-ci ilin martın 9-dan 10-na keçən gecə Milli Təhlükəsizlik Nazirliyinin həyata keçirdiyi “Qara kəmər” əməliyyatı nəticəsində həbs ediliblər.

Məhkəmənin qərarına əsasən, Hacı Məmmədov, onun keçmiş şöbə müdiri Kamil Sədrəddinov, nazirliyin Baş Cinayət Axtarış İdarəsinin keçmiş rəisi Zakir Nəsirov və digər 7 nəfər ömürlük həbs cəzasına məhkum ediliblər.