Prezidentin Fazil Məmmədovu yerinə oturtmasının ardınca nazir yırtıcı komandasında “günah keçi”ləri axtarışına çıxıb, “qoçu müfəttişlər” durdurulmağa başlanıb

Vergilər naziri Fazil Məmmədova nəhayət ki, “dur” deyən oldu. Bu da təbii ki, dövlət başçısı İlham Əliyevdir. Prezidentin yerində etdiyi çıxışdan sonra vergilər naziri saxladığı “quldur dəstəsi”nin əl-qolunu yığışdırmağa başlamağa məhkumdur.

Çünki ölkənin iqtisadi və vergi sisteminə balta vuran bu çinovniklərin fəaliyyəti vergi deyil, xərac, bac, “haqq”, rüşvət toplamaq idi. Üstəlik, bu hərəkətlərini kimsədən çəkinməyərək açıq şəkildə həyata keçirirdilər. İllərdir ki. F.Məmmədovun yaratdığı gestapo və yırtıcı sistem barəsində tənqidi yazılar dərc olunur.

Yalnız nazir tənqidlərə məhəl qoymayaraq öz korrupsioner siyasətinin amansız şəkildə davam etdirirdi. Dövlət rəhbərinin müşavirədə açıq və dəqiq çıxışından sonra isə vergilər nazirinin matı-qutu qurudu. Nazir gözləmirdi ki, ona qarşı belə açıq tənqid səslənə bilər.

Özü də bu fikirlərə qarşılıq olaraq heç bir arqument və ya bəhanə keçmir. Çünki ökədə sahibkarlara, iş adamlarının, xırda və iri ticarətçilərin başına açılan oyunlardan hər kəs məlumatlıdır. Elə təkcəı “Gündəm-xəbər” qəzetinə bu müddət ərzində onlara sahibkarın şikayəti daxil olub. Bu müraciətlərdə qeyd olunurdu ki, Vergilər Nazirliyinin əməkdaşları, vergi müfəttişləri xalqı soymaqla məşğuldur. Onların nəqliyyat müfəttişlərindən geri qalmayan özbaşına, qanunsuz, qudurğan hərəkətləri əndazəni aşmışdı.

Lakin nazirlik müşavirədən sonra hərəkətləndi, özünə çəki-düzən verməyə başladı. Mənbənin qəzetimizi verdiyi xəbərə görə, F.Məmmədovun vəziyyəti ürəkaçan deyil. Prezidentin birbaşa hədəfinə gələn və xalqın gözü qarşısında sərt tənqid olunan nazir indi özünü yığışdırmaq, postunu qorumaq barədə fikirləşir.

Bu günlərdə nazirlikdə keçirilən toplantı da həmin müşavirəyə hesablanmışdı. İstisna deyil ki, nazirlikdə həbslər başlasın.

İndi nazir düşdüyü vəziyyətdən çıxmaq üçün yollar axtarır. Vergi ödəyicilərinə sms göndərilməklə onlardan vergi müfəttişlərinin qanunsuz hərəkətləri haqda məlumat vermələri istənilir. Belə bir sms-müraciətin meydana çıxmasını 13 iyul müşavirəsindən sonra təbii qarşılamaq olar. Bunu nazirin özünüxilas əməliyyatının elementi kimi də qəbul etmək mümkündür.

İndi məlum olur ki, naziri çətin vəziyyətə salan Avropa Oyunlarından əvvəl verdiyi göstərişlərdir. Vergilər nazirinin vergi borcunu ödəməyən oliqarxların şirkətlərinin siyahısını hazırlayıb onlara hücuma keçməsi onun özünün gizlinlərini ortaya çıxarıb.

Oliqarxlardan biri israrla onun şirkətlərindən vergidən əlavə pul tələb edən vergi müfəttişlərinə tələb etdikləri vəsaitlərin ödənməsi tapşırığını verib. Digər tərəfdən isə vergi müfəttişlərinə ödənilən rəsmi və qeyri-rəsmi vəsaitlərin siyahısını hazırlatdırıb.

Sonradan həmin siyahı yuxarılara təqdim edilib. Məlum olub ki, şirkətlərdən qeyri-rəsmi alınan külli miqdarda vəsaitlərin əhəmiyyətli hissəsi yoxa çıxıb. Bundan sonra qeyri-rəsmi olaraq digər şirkətlərdə də monitorinqlər aparılıb, sahibkarların ödədiyi vəsaitlərlə daxil olan vəsaitlərin uyğunluğu yoxlanıb. Ortaya kəskin fərqlər çıxıb.

Bundan sonra vergilər naziri üçün qara zolaq başlayıb. Nazirin tutduğu postdan uzaqlaşdırılması da gündəmdədir. Yada salaq ki, iyulun 13-də prezident İlham Əliyevin rəhbərliyi ilə keçirilən müşavirədə Vergilər Nazirliyinin fəaliyyəti ən sərt şəkildə tənqid olundu.

“Mənə məlumatlar gəlir ki, son vaxtlar Vergilər Nazirliyi özünü çox sərt aparır, tələbkardır. Burada biz iki məsələni bir-birindən ayırmalıyıq. Vergilər Nazirliyi çalışmalıdır ki, vergi ödəyiciləri vergiləri birmənalı olaraq qanuni şəkildə, tam şəkildə versinlər. Burada heç bir başqa söhbət və güzəşt ola bilməz.

Ancaq heç bir başqa əsassız tələb irəli sürülməməlidir. Mən bunu qeyd etməliyəm. Ona görə sahibkarlar, sadə dillə desək, dövlətin pulunu 100 faiz verməlidirlər, vəssalam. Ondan başqa, heç kimə 1 manat verməməlidirlər. Bax, mən onlara tapşırıram və göstəriş verirəm” - deyə, İ.Əliyev müşavirədə bildirmişdi.

Maraqlıdır ki, müşavirədən az əvvəl 2015-ci ilin yanvar-iyun ayları ərzində qeyri-neft-qaz sektoru üzrə büdcəyə 2 milyard 289 milyon 221,5 min manat, Vergilər Nazirliyinin xətti ilə isə 3 milyard 346 milyon 306,8 min manat vəsait daxil olması haqda məlumat yayılmışdı. Bildirilirdi ki, Vergilər Nazirliyi proqnoz tapşırığına 100,8 faiz əməl edib.