Hacı Salman Musayev: “Din dövlətdən ayrıdır, bu səbəbdən ərizənizə cavab verilmir”

Məhəmməd Ümmətinin əli hər yerdən üzüləndə, ümüd yeri kimi (vay o günə ki, ümüd puç ola) mənsub olduğu dinin rəhbəri Bütün Qafqazın Şeyxi Hacı Allahşükür Paşazadə Həzrətlərinə müraciət etmək məcburiyyətində qalır. Sən saydığını say, gör Qafqaz Müsəlmanları İdarəsindən sənin yazdığın ərizəyə nə cavab verirlər? “Din dövlətdən ayrıdır, dövlətə müraciət edin”. Cavab: Hacı Allahşükür Paşazadənin 1-ci müavini Hacı Salmana məxsusdur. Din dövlətdən ayrı olduğu kimi, yəqin xalqdan da ayrıdır.

Əgər bu ölkədə Allahsızlıq adi hala çevrilibsə, özünü Qafqazda Allahın elçisi sayan və bütün Qafqazın Şeyxi Allahşükür Paşazadəyə müraciət etmək təbiidir. Nədən ki, özünü Uca Allahın elçisi sayan şəxs bütün bu dinsiz və Allahsızlığın qarşısın alınmasına məsuldur. Ona görə də, xalqı əzib, onun malını yeyərək, qəddarlıq edən dövlət məmurlarını KİV-lə rəzil günə qoyub, düz yola dəvət etməlidir.

Əvəzində ölkədə baş verən bu rəzalətə rəğmən susqunluq sərgilənirsə başa düşülən deyil. Onda belə anlaşılır ki, din dövlətlə həmrəydir, ölkədə baş verən bütün naqisliklərə şərikdir.

“ Hörmətli Şeyx Həzrətləri, Sizə yazdığım ərizəyə cavab almadığım üçün məcbur olub “Gündəm xəbər” vasitəsilə Sizə müraciət etmək qərarına gəldim. Məlumunuz edim ki, 7 may 2015-ci il tarixdə Sizə normal insanın tük ürpədici hisslərinə səbəb ola biləcək ərizə ilə müraciət etmişdim. Ərizədə 7 nəfər ailə üzvündən 3-ü ağır xəstəliyə düçar olub, şəraitsiz bir komada yaşayırsa, dövlət tərəfindən baxımsızdırsa vətəndaş çarəsizlikdən mənsub olduğu İslam dininin daşıyıcısı olaraq 1-ci Qaragin və yaxud Katalikosa müraciət etməli deyil ki?

Ərizəyə cavab verilməsi,qaydalara görə 1 ay müddət təşkil edir. Çox təəssüf ki, 1 ayın tamamından sonra mən Qafqaz Müsəlmanları İdarəsinin məktublar şöbəsinə müraciət etdim. Bildirdilər ki, ərizəniz idarəyə daxil olub. Baxılması üçün 1-ci müavin Hacı Salmana məlumat verilib. Və mən çətinliklə də olsa Hacı Salmanın iş telefonuna zəng edib yazmış olduğum ərizənin aqibəti ilə maraqlandım. Hacı Salman cavabında “Din dövlətdən ayrıdır dövlətə müraciət edin” deyə laqeydcəsinə cavab verdi. Əslində bizdə dinlə dövləti bir uçurum ayırır. Belə olmasaydı orta məktəblərdə hicab məsələsi öz həllini çoxdan tapmış olardı. İstər dövlət xadimi, istərsə də dini qurumlar bir zindana vurmalıdır ki, mənsub olduğu dövlət qüdrətli olsun. Bizdə isə, maddiyyat dövlət təəssübkeşliyindən öncədir.

Burada haşiyəyə çıxmaq yerinə düşür ki, 1970-ci illərin sonunda rus əsgərliyində xidmət etmişəm. Xidmətdən tərxis olduqdan 1 həftə sonra əsgər yoldaşım Sergeyə məktub yazmışdım. 3 gün sonra Sergey yaşadığı Xabarovsk vilayətindən mənə teleqram vuraraq məktubu aldığını bildirmişdi. 15 gün sonra Sergey mənə göndərdiyi məktubu aldım.

Bəlkə də vaxdınız məhdud olduğundan Sizə ünvanlanan ərizə ilə tanış olmamısınız və yaxud Sizdən gizlədilib. Hörmətli Şeyx Həzrətləri, dinimizdə olan biabırçılıqlar haqqında yazmağı tərbiyəm yol vermir. Ərizəmlə bağlı rəhbərlik etdiyiniz idarədən belə laqeydliyi bilsəydim, Sizə müraciət etməzdim..Yoxsa düşünürsünüz ki, Qafqaz Müsəlmanları İdarəsinin işi ancaq müqəddəs ziyarətgahlara insanları cəlb edərək mənfəət əldə etməkdir. Bilsəydim ərizəmi poçt vasitəsi ilə yox, Qafqaz Müsəlmanları İdarəsinin nəzir qutusuna atardım”.

Şakir Həsənsu

www.gundemxeber.az