Yeni dərs ilinin başlanmasıma artıq çox az bir müddət qalıb. Həm məktəblərdə, həm də şagirdlərin evlərində bu münasibətlə intensiv hazırlıq işləri gedir. Etiraf etmək lazımdır ki, bir tərəfdən Azərbaycanın təhsil sisteminin dünya standartlarına çatdırılması məqsədilə, digər tərəfdən isə uşaq və gənclərimizin gələcəkdə dövlətə və xalqa öz bilik və bacarıqları ilə ləyaqətlə xidmət edə bilmələri üçün bu gün ölkəmizdə təhsil sahəsində də əsaslı islahatlar həyata keçirilməkdədir. Təbii ki, yeni məktəb binalarının inşası, müasir tədris metodikalarının və yeni texnologiyaların tətbiqi bu istiqamətdə müəyyən uğur və nailiyyətlərin əldə olunması üçün zəruri şərtlərdir. Lakin müəyyən qisim problemlər də mövcuddur ki, onların həllinə nail olmadan görülən bütün tədbirlərin müsbət nəticəsini gözləmək ən azından sadəlöhvlük olardı. Aldığımız məlumatlara görə Bakının Sabunçu rayonunda yerləşən 170 saylı orta məktəb də yeni dərs ilinə özünəməxsus tərzdə hazırlıqlarını davam etdirir. Məlumatlarda bildirilir ki, 170 saylı orta məktəbdə artıq birinci siniflərə şagird qəbulu ilə bağlı sənədlərin qəbuluna start verilmişdir. Məlumatlarda həmçinin vurğulanır ki, məktəbə təqdim olunan digər sənədlərin arasında 100 manatlıq əsginazın da olması zəruri şərtlərdən biridir. Əks halda isə bütün digər sənədlər hətta nəzərdən belə keçirilmədən geri qaytarıla bilər. İddialara görə 170 saylı orta məktəbin direktoru Nuranə Mirzəyevanın bu təhsil müəssisəsinin birinci siniflərinə şagird qəbulu üçün müəyyən etdiyi məbləğ məhz bu qədərdir. Qeyd edək ki, bu orta təhsil müəssisəsinin fəaliyyətində müşahidə olunan bir çox neqativ hallara dair açıqlamalar artıq uzun müddətdir ki, redaksiyamıza daxil olmaqdadır. Bu xüsusda yeni aldığımız məlumatlara görə, məktədə son buraxılış siniflərinin şagirdlərinə təqdim olunmuş attestat və şəhadətnmələrin hər birinə görə 50 manatdan olmaqla pul yığılmışdır. Qeyd edək ki, bu məktəbdə adi tədris metodikasından başqa xüsusi "evdə təhsil” proqramı da tətbiq olunur. Bu proqram çərçivəsində müəyyən xəstəliklər səbəbindən məktəbə gələ bilməyən uşaqlara dərslər onların öz evlərində keçirilməlidir. Aldığımız məlumata görə bu gün "evdə təhsil” proqramı üzrə 170 saylı məktəbin 120-dən artıq şagirdinin təhsil aldığı rəsmi sənədlərdə qeydə alınıb. Onlara dərs deyən müəllimlərin sayı isə təxminən 40 nəfərə yaxındır. Lakin mənbənin iddiasına görə, bu humanist layihənin işləkliyi məktəb direktoru tərəfindən qətiyyən təmin olunmayıb. Bununla belə, Nuranə Mirzəyeva hələ ötən il müvafiq qurumlar qarşısında "evdə təhsil” proqramı çərçivəsində müəyyənləşdirilmiş dərs saatlarının həcminin 18-dən 36-ya çatdırılması barədə məsələ qaldırmışdı. Bunda məqsəd isə, proqram üzrə "dərs deyən” müəllimlərin saatlarını artıq göstərməklə, onlara yazılan əmək haqlarının bir hissəsini mənimsəmək olub. Daha sonra aldığımız məlumatlarda Nuranə Mirzəyevaya qarşı həmçinin savad baxımından irəli sürülən iradlar da yer almışdır. Bu xüsusda məlumatlarda bildirilir ki, bir müddət əvvəl Təhsil Nazirliyi tərəfindən keçirilmiş və məktəb direktorları üçün nəzərdə tutulan attestasiya test imtahanlarının nəticələri də Nuranə xanım üçün heç də ürəkaçan olmamışdır. Belə ki, həmin sınaqda uğursuzluqla üzləşmiş məktəb direktorlarının 26 nəfərdən ibarət siyahısında Nuranə Mirzəyevanın da adı yer almışdı. Bu səbəbdən də 170 saylı məktəbin direktoru nazirlik tərəfindən yaradılmış xüsusi hazırlıq kurslarına göndərilmişdi... Qarşı tərəfin də məsələyə münasibətini öyrənməyə hazırıq. - See more at: http://dogruxeber.com/cemiyyet/852-direktor-nurane-mirzeyeva-sinfe-qebulu-100-manata-edir.html?utm_source=dlvr.it&utm_medium=facebook#sthash.TpocBBzF.dpuf

DogruXeber.com