Paytaxtda 25 məktəb əsaslı təmir olunub


Yeni dərs ilinə hazırlıq işləri görülür. Qeyd edək ki, bu il dərslər sentyabrın 15-i yox, 16-sı başlayacaq. Çünki ayın 15-i istirahət gününə düşür. Sentyabrın 16-sı 100 mindən çox uşaq birinci sinfə gedəcək.

Bu il respublikanın orta ümumtəhsil məktəblərinin birinci sinfinə 141 min 166 uşağın gedəcəyi gözlənilir. Yeni tədris ilini bu uşaqlardan bəziləri yeni tikilmiş, bəziləri yeni təmir olunmuş, bəziləri isə hələ ki, təmir olunmayan məktəblərdə qarşılayacaq.

Təhsil Nazirliyindən ANS-ə verilən məlumata əsasən, yeni dərs ili üçün paytaxtın 330 məktəb binasından 25-i əsaslı təmir olunub. 2 yeni məktəb binası tikilib, 5 məktəbdə isə cari təmir işləri aparılıb. Respublikanın müxtəlif bölgələrində isə ümumilikdə bu il ərzində 105 məktəb binası tikilib, 36 məktəb isə əsaslı təmir olunub.

Son illərdə əsaslı təmir və yenidən qurmadan sonra istifadəyə verilən məktəb binalarında təhsilin keyfiyyətinin yüksəldilməsi üçün bütün lazımi şərait yaradılıb. Elə ötən il açılışında ölkə başçısının da iştirak etdiyi Yasamal rayonu 18 saylı məktəb tam yenidən qurularaq bütün lazımi şəraitlə təmin edilib.

Nəsimi rayonu ərazisində yerləşən Elitar Gimnaziya və Səbail rayonu ərazisindəki, 132 və 134 saylı orta məktəb binaları da son illərdə əsaslı təmir olunub.

Ötən il bilik günündə Quba rayonunun 5 kəndində yeni tikilən məktəb binası istifadəyə verilib.

Lənkəran və Şəkidə 30-a yaxın məktəb binası əsaslı təmir olunub. Amma bütün bunlarla yanaşı, bölgələrdə hələ də təmirə ehtiyacı olan məktəb binaları var.

Məsələn, Tərtərin Azad Qaraqoyunlu kəndində 30 il əvvəl inşa olunan məktəb binasının da əsaslı təmirə ehtiyacı var.

Qəzalı şəraitdə olan daha bir məktəb Şamaxı rayonunun Mərzəndiyə kəndindədir.1974-cü ildən istifadəyə verilən bu məktəbdə yenidənqurulmaq üçün artıq plana salınıb.

Qeyd edək ki, son illər ərzində ölkə ərazisində 2500-dən çox məktəb binası əsaslı təmir olunub.