“Lalə Vəliyeva əxlaqsız həyat tərzi yaşayırdı, ona görə də əri Nazim Vəliyev onunla boşanıb”

Rəfiqəsini çəkiclə öldürməkdə təqsirli bilinən 1960-cı il təvəllüdlü Nailə Apayevanın cinayət işi üzrə məhkəmə prosesi başa çatıb. İttihama görə, ötən il iyunun 17-də saat 15:00 radələrində Nəsimi rayonu, A.Mustafayev küçəsi ev 39 mənzil 51 ünvanında Nailə Apayeva yaşadığı evdə rəfiqəsi Lalə Vəliyeva ilə birlikdə nahar etdikdən sonra, sonuncu tənha olduğunu, onu heç kimin anlamadığını, bu səbəbdən artıq yaşamaq istəmədiyini bildirərək, Nailə və qızının ünvanına nalayiq ifadələr işlədərək söyüb.

Bundan hiddətlənən Nailə Apayeva aralarında baş vermiş mübahisə zamanı mənzilində olan çəkic və dəhrə ilə Lalə Vəliyevanın bədəninin müxtəlif nahiyələrinə çoxsaylı zərbələr vuraraq ona, ümumilikdə 50-dən artıq xəsarət yetirib. Lalə Vəliyeva kəskin qanitirmə nəticəsində hadisə yerində keçinib.

Nailə Ağayeva Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi ilə təqsirli bilinib. Cinayət işi Bakı Ağır Cinayətlər Məhkəməsində araşdırılıb. Məhkəmənin hökmü ilə Nailə Apayeva 13 il müddətinə azadlıqdan məhrum edilib. Hökmdən narazı qalan Nailə Apayeva apelyasiya şikayəti verib və cəzasının yüngülləşdirilməsini istəyib. Onun şikayəti araşdırılması üçün Bakı Apelyasiya Məhkəməsinə göndərilib. Apelyasiya şikayəti hakim Mirpaşa Hüseynovun sədrlik etdiyi kollegiyada araşdırılıb.

Məhkəmə prosesində Nailə Apayeva ittiham üzrə özünü təqsirli bilməyib. O, bildirib ki, Lalə Vəliyeva onun rəfiqəsi olub. O, Laləni tanıyanda rəfiqəsi heç yerdə işləməyib, insanlara faizlə pul verib: “Lalənin psixoloji durumu yerində olmayıb, onun əsəbi və qeyri adekvat olduğu hamıya məlum idi. O, həmişə evindəki problemlərdən danışırdı. Oğlu Fuad evdən 50000 dollar oğurlayaraq narkomanlarla xərcləmişdi. Fuad anasını şantaj edirdi, çünki Lalə Vəliyeva əxlaqsız həyat tərzi yaşayırdı, ona görə də əri Nazim Vəliyev onunla boşanıb. Əri 4 ay əvvəl rəsmi olaraq Səkinə Əliyeva adlı qadınla evlənib, bu isə Lalə Vəliyevaya pis təsir edib. Mərhum şahidlərin yanında söyləyib ki, əvvəlki ərinin arvadını öldürəcək”.

Təqsirləndirilən şəxsin sözlərinə görə, hadisə günü Lalə Vəliyeva onun evinə nahara gəlib: “Lalə özünə içki olaraq çaxır gətirib. Yemək zamanı içki içərək dərmanlar qəbul edib və ağlayaraq oğlundan, ərindən, ərinin yeni arvadından, sevgililərindən şikayət edib və yaşamaq istəmədiyini deyib. Lalə bildirib ki, öncə ərinin arvadı Səkinəni öldürəcək, sonra isə özünə qəsd edəcək. Yeməkdən sonra içkili vəziyyətdə evindəki istilik sistemi olan kombinin yanında yerdə olan alətlərdən baltanı götürən Lalə öz boğaz nahiyəsinə 2 zərbə vurdu. Gördüklərimdən şoka düşdüm və dərhal ona bint gətirdim. Qorxa-qorxa bintlə onun boğazını sarmağa çalışdım. Həmin an Lalə

balta ilə qoluma vurdu. Ev qan içində oldu. Laləni məni yerə yıxdı və boğmağa başladı. O, əlinə keçən çəkiclə mənə zərbələr vurdu. Lalə adımı Səkinə deyərək məni boğmaq istəyirdi. Çarəsiz bir anda çəkici onun əlindən aldlım və başına bir zərbə endirdim”.

Nailə Apayeva qeyd edib ki, ümumi xəsarətlər mərhumda 4 dənə olub, Lalə onlardan üçünü özü-özünə balta ilə vurub. Bunun nəticəsində 20 dəqiqənin içində mərhum çoxlu qan itirib və ona görə keçinib. Nailə Apayeva bildirib ki, Lalə Vəliyeva öz evində onun həyatını məhv edib.

O, bildirib ki, əməlinin Cinayət Məcəlləsinin 123-cü (zəruri müdafiə həddini və ya cinayət törətmiş şəxsin tutulması üçün zəruri aşmaqla adam öldürmə) maddəsinə tövsüf edilməsini və həmin maddə ilə barəsində hökm çıxarılmasını istəyib.

Məhkəmədə zərərçəkmiş şəxsin hüquqi varisi qismində dindirilmiş Fuad Vəliyev bildirib ki, iyunun 17-də, saat 16.30-da anasının telefonundan ona SMS gəlib: “Anam SMS-də yazıb ki, mən dostlarımla üç günlük rayona gedirəm, telefonun adaptorunu evdə unutmuşam, telefonun zaryadkası azdır. SMS aldıqdan sonra anama “başın işləyir?” sözləri ilə cavab yazdım. O, “bəli” sözləri ilə cavab verdi. Bundan sonra anamın telefonuna zəng etdim, lakin telefonun bağlı olduğunu gördüm. Axşam işdən çıxaraq evə getdim. Təxminən bir saat sonra Nəsimi Rayon Polis İdarəsinin əməkdaşları zəng edərək anamın qətlə yetirilməsi barədə məlumat verdilər”.

Hakim kollegiyası digər proses iştirakçılarını dinləyəndən sonra Nailə Apayevanın apelyasiya şikayətinin təmin edilməməsi barədə qərar qəbul ediblər.