Razi Nurullayev: “Sentyabrın sonlarına qurultayımızı keçirəcəyik”

Azərbaycan Xalq Cəbhəsi Partiyasında (AXCP) daxili problemlər, narazılıqlar müşahidə olunur. Artıq bir neçə gündür ki, bir qrup şəxs mətbuat konfransı keçirərək AXCP-nin Etimad Qurultayının Təşkilat Komitəsi yaratdığını elan ediblər. Bəyan ediblər ki, əsas məqsədləri AXCP daxilində demokratiyanı, fikir müxtəlifliyini bərpa etmək, partiyanın sədri Əli Kərimlinin istefasına nail olmaqdır. Narazıların başında bir müddət əvvəl AXCP səralarından istefa verən Razi Nurullayev dayanır. Nurullayev son durumla bağlı suallara cavab verib. Müsahibəni təqdim edirik.

- Hazırda AXCP-də vəziyyət nədən ibarətdir, son durumu necə qiymətləndirmək olar?

- Hazırda vəziyyət bizim xeyrimizə işləyir. Çünki 20 ildən çox müddətdə eyni simaları görən, eyni insanlardan vədlər eşidən, perspektivsizliyi və uğursuzluğu görən insanlar artıq Əli Kərimli və digər müxalifətdə olan siyasətçilərdən beziblər. Başqa sözlə, vətəndaşlar nəticəsizlikdən beziblər. Həmin partiyalarda, xüsusilə Əli Kərimlinin ətrafında olan gənclik nəticəsizlikdən, uğursuzluqdan, perspektivsizlikdən artıq cana doyublar. Hər dəfə göstəriş almaqdan, kimisə təhqir etməkdən yorulublar. Və artıq onlarda anlamağa başlayıblar ki, əgər bir insan paylaşmağı bacarmırsa, onun yanında perspektiv ola bilməz. Bu baxımdan mən sezməyə başlamışam ki, ilk günlər bizə qarşı sosial şəbəkələrdə müəyyən inamsızlıq göstərilirdisə, get-gedə sular durulur və insanların bizə etimadı yaranır. Biz artıq buna şahidlik edirik, bu nüansı sezirik. Fikrimcə, yaxın günlərdə sosial şəbəkələrdə də üstünlük bizim tərəfimizə keçəcək.

- Siz, avqustun sonunda toplantı keçirərək AXCP-də narazıların hərəkətə keçdiyini elan etmişiniz. Bu günə qədər nə qədər cəbhəçi sizə üz tutub?

- Biz fəal cəbhəçiləri götürsək, onların sayı yüzdən çoxdur. Amma ümumilikdə bizim tərəfimizə keçənlər və keçməyə növbəyə duranlar 200 nəfərin üstündədir. Hesab edirəm ki, yaxın dövrdə onların sayı 300-400 nəfərə çatacaq. Zatən Əli Kərimlinin ətrafında orta, yaxşı və passiv fəal insanların sayı 700 nəfərdən çox deyil. Onların da yarısı artıq bu tərəfə keçib. Parlament seçkilərinə qədər isə Əli Kərimlinin yanında əvvəlki qüvvəsinin 30 faizi qalmayacaq.

- AXCP funksionerlərindən sizə meyl edən varmı, yoxsa onların mövqeyin qəti məlumdur?

- Hələ ki, mən bu barədə danışmaq istəməzdim. Sizə bildirim ki, bu məsələləri də nəzərdən keçiririk. Sadəcə olaraq mən bu məsələdə daha ehtiyatlı olmaq istəyirəm və bunun da səbəbləri var.

- Sosial şəbəkələrdə sizə qarşı müəyyən ittihamlar irəli sürülür. Bunu necə qiymətləndirirsiniz?

- Təbii ki, ittihamların cavabını veririk. Bu ittihamlar əsassızdır, qondarmadır və hər zaman Əli Kərimlinin dilində qabar olan günahlandırmalardır. Artıq neçə illərdir ki, bunu edirlər. Əli Kərimli 1995-ci ildən bu günə qədər qeyd etdiyim ittihamlar üzərindən siyasətini quraraq danışır. Artıq xalq onun ittihamlarına inanmır. Onun bir siyasəti var: yanından gedən insanları qorxu və şantaj altında saxlasın və gedənlərə də, satqın və digər damğalar vursun. Ancaq daha onun bu şantajına inanan qalmayıb. İndi onun bu sözlərini məsxərəyə qoyub gülürlər.

- Siyasətdə insanların bir-birindən ayrılması, yeni təşkilatların qurulması zamanı satqındı, pul aldı partiyanı dağıdır kimi ittihamlar səsləndirilir və sizinlə bağlı da belə fikirlərdə irəli sürülməkdədir....

- Demək çox əfsuslar olsun ki, satqınlıq termini siyasət aləminə ilk dəfə Əli Kərimli gətirib və özü də bunu yüksək səviyyədə praktikadan keçirib. Və bu adı alnına damğa edib. Amma əslində satqın vətənini və torpağını satanlara deyilir. Dövlətinin və millətinin marağına xəyanət edən insanlara satqın deyilir. Xalqını öz marağı naminə həbslərə göndərənlərə satqın adı qoyulur. Bütün bu meyarların bir çoxu cəm formasında Əli Kərimlidə formalaşıb. Onun daxilində o qədər kin-küdurət, qısqanclıq toplanıb ki, bunu aydın sezmək olur. Bu adam revanşını qısqanclıq üzərində qurub. Bəlkə də, indi Əli Kərimli torpağının satılmasına da gedər, xalqın marağının tapdanmasına da gedir. Bəlkə də, müstəqilliyimizin və suverenliyimizin müəyyən qədər zədələnməsinə də, qol qoyar, təki hakimiyyəti əlinə keçirsin. Bu mənada ondan hər şey gözləmək olar. O da, digərlərini öz arşını ilə ölçdüyü üçün belə ifadələrdən gen-bol istifadə edir.

- Daha maraqlı məqam həmdə beynəlxalq və diplomatik reaksiyalardır. Artıq bir həftədir ki, fəaliyyətə keçmişiniz. Hansısa reaksiyalar varmı?

- Əfsuslar olsun ki, yoxdur. Amma diplomatiyada qızıl qaydadır ki, hər kəs gözləmə mövqeyi tutur, heç kim əvvəlcədən mövqeyini açıqlamır. Bu mənada mən kiminsə mövqe açıqlayacağını gözləmirəm. Sadəcə olaraq sular tam durulandan, hüquqi təmsilçilik tamamilə aydın olandan sonra onlar müəyyən fikirlərini bildirə bilərlər. Ancaq belə məqamlarda diplomatiya adətən susmağa üstünlük verir.

- Əli Kərimli sentyabr ayı ərzində qurultay keçirmək niyyətindədir. Bəs sizin sədri olduğunuz AXCP-nin Etimad Qurultayına Hazırlıq Komitəsinin niyyəti nədən ibarətdir?

- Biz hazırlıqlarımızı aparırıq. Və hesab edirik ki, sentyabrın sonlarına qurultayımızı keçirə biləcəyik.

- Yəni sentyabrda AXCP-nin iki qurultayı keçiriləcək?

- Mən Əli Kərimlinin qurultay keçirəcəyinə inanmıram. Çünki onun qurultayda nəsə deməsi, insanlara müraciət etməsi və yenidən sədr seçilməsi bəlkə də, özünə gülməli gələr. Bu baxımdan hesab edirəm ki, Kərimli qurultaya hazırlıq aparsa belə, ona sərf edən məqamda buna getmək istəyəcək. Ancaq biz bu şansı da onun əlindən alacağıq.

- Sizə elə gəlmirmi ki, sizin bu addımlarınız AXCP-nin qurultay keçirməsindən imtina etməsinə səbəb ola bilər?

-Hər şey mümkündür. Mən hesab edirəm ki, onlar ümumiyyətlə qurultay keçirə bilməyəcək və ya onu qeyri müəyyən vaxta qədər təxirə salacaqlar.

- Bəs bu qanuna zidd deyilmi, Siyasi partiyalar haqqında qanunun tələbinə görə, partiyalar ali tədbirlərini vaxtı-vaxtında həyata keçirməlidir?

- AXCP-nin sonuncu qurultayı 2010-cu ildə keçirilib. Mənə belə gəlir ki, həmin zaman ötüb, qurultayın vaxtından keçib. Mövcud qanunvericiliyə görə, Əli Kərimli artıq legitim sədr deyil, saxta sədrdir. Çünki AXCP-nin qurultayı 4 ildən bir keçirilməli və yeni sədr seçilməlidir. Qanunvericiliyin tələbləri də pozulub. Odur ki, hazırda Əli Kərimlinin sədr kimi fəaliyyəti qanunsuzdur.

- AXCP nizamnaməsinə görə, bir şəxs neçə müddət sədr ola bilər, bununla bağlı konkret məhdudiyyət nəzərdə tutulurmu?

- Heç bir məhdudiyyət yoxdur, ömürlük sədrlik nəzərdə tutulur. Hələlik bu da Əli Kərimlidir.

- Hüququ statusla bağlı siz nələri planlayırsınız?

- Təbii ki, biz sənədlərimizi və faktlarımızı Ədliyyə Nazirliyinə təqdim edəcəyik. Bu keçirəcəyimiz qurultaydan sonra baş verəcək. Ədliyyə Nazirliyi də bununla bağlı hansısa qərar vermək səlahiyyətinə malikdir. Hesab edirik ki, Ədliyyə Nazirliyinin verəcəyi qərar bizim xeyrimizə olacaq. Hər halda buna ümid edirik. Çünki AXCP rəhbərliyinin apardığı siyasətdən narazı olan insanlar məhz bizimlədir.

- Sizin ideoloji yönünüz necə olacaq?

- Bizim mövqeyimiz bəllidir. Biz Əbülfəz Elçibəyin rəhmətə getdiyi günə qədər olan mövqeyini birmənalı dəstəkləyirik. Bu azərbaycançılıq, türkçülük, millətçilik, dövlətçilikdir. Biz bu yöndə fəaliyyət göstəririk. Əlbəttə, ideoloji yönümüzlə bağlı qurultaya qədər müəyyən işlər, hazırlıqlar görüləcək. Və qurultayda bu elan olunacaq.

- Siyasi baxımdan hakimiyyətə və müxalifət partiyalarına münasibətiniz necə olacaq?

- Təbii ki, AXCP tolerant və dünyəvi partiyadır. Şübhəsiz ki, bütün siyasi partiyalarla da, əməkdaşlığa hər zaman hazırdır. Hakimiyyətlə əməkdaşlığa gəldikdə deyim ki, bu bir məsələ üzərində mümkündür. Əgər real dialoq olarsa, bunun tərəfləri bəlli olarsa, müzakirələrin mövzusu öncədən bilinərsə, biz bu haqda düşünə bilərik. Yəni haqq etdiyimiz dialoq bizə təklif olunarsa, bizdə bu təklifi qəbul edə bilərik. Ancaq ümumi dialoqlarda, nəyinsə xətrinə keçirilən görüşlərdə iştirak etmək niyyətimiz yoxdur.

- Qarşıdan parlament seçkiləri gəlir. Sizin bu seçkilərdə münasibətiniz necədir, iştirak edəcəksinizmi?

- Təbii ki, hələlik seçki ab-havası hiss edilmir. Lakin bütün bunlara baxmayaraq biz ayrı-ayrılıqda və fərdlər formasında qarşıdan gələn parlament seçkilərinə qatılmaq niyyətindəyik.

- Siz namizəd olacağınız seçki dairəsini müəyyən etmisinizmi?

- Tam olaraq seçki dairəsini müəyyən etməmişəm. Yəqin ki, yaxın günlərdə namizəd olacağım dairəni müəyyən edəcəyəm. Zənn etmirəm ki, bununla bağlı hansısa problem olsun. Mənə doğma olan dairələrdən birindən namizədliyimi irəli sürəcəyəm.

- AXCP neçə illərdir ki, qərargahsızdır, Əli Kərimli faktiki olaraq səyyar fəaliyyət göstərir, oturacağı bir məkanı belə yoxdur. Sizin qərargahınız, ofisiniz varmı, yoxsa sizdə səyyar fəaliyyətdəsiniz?

- Bildiyiniz kimi mənim ictimai təşkilatım da var. Mənim əvvəllərdə ofisim olub və bu ictimai qurumun qərargahı kimi fəaliyyət göstərib. Bu qərargahım məndə AXCP üzvü olmazdan əvvəl var idi. Hazırda da, bu ofisdən istifadə edirəm. Hələlik bununla keçinirik. Əsas odur ki, fəaliyyət olsun, iş görək. Bizim fikrimizcə, AXCP daxilində demokratik ab-hava bərpa olunmalıdır. Böyük bir partiya bir qrupun əlində olmamalıdır.

HÜSEYN ABBASOĞLU