ƏƏSMN-in İmişli rayon şöbəsində “fövqəladə vəziyyət” elan edilib.

Son illər ən çox tənqid olunan nazirlik yenə də Əmək və Əhalinin Sosial Müdafiəsi nazirliyidir. Səbəb sadədir. Nazir Səlim Müslümov Füzuli Ələkbərovun illər öncə formalaşdırdığı sistemini sadəcə dağıda bilmədi. Düzdür cənab Müslümov təyin olunduğu ilk günlər kameralar önündə bir neçə şöbə rəisini işdən azad etdi, başqa birini iclas zalından qovdu və s. Hamısı bu qədər. Sonrakı proses bütün baş verənlərlə bağlı düşünülmüş reklam rolikindən başqa bir şey olmadığı qənaətini yaratdı. Nəticədə bu gün də Əmək və Əhalinin Sosial Müdafiəsi nazirliyində Füzuli Ələkbərov metodu tam gücü ilə işlək vəziyyətdədir. Biz zaman-zaman bu məsələyə qayıdacağıq. Normalda isə əski ələkbərovçular mövzunu bir anlıq da olsa diqqətdən kənarda qalmasına imkan vermirlər. Bu prosesdə nazirliyin İmişli rayon şöbəsi xüsusi “fəallıq”göstərir. Belə ki. ötən saylarımızda ƏƏSMN-in İmişli rayon şöbəsinin rəis əvəzi Könül Hacıyevanın dövlət vəsaitini sosial yardım formasında ehtiyacı olanlara deyil, olmayanlara təyin etməsi haqqında informasiyalar dərc etmişdik. Hətta konkret adlar belə çəkmişdik. Əvəzində nə baş verdi?
Könül Cavadova onun qanundan kənar əməllərinə etiraz edənləri təhdiddən belə çəkinmədi. Çünki bu aralar xanım Cavadova haqqında hər hansı mənfi rəy onun ƏƏSMN-in İmişli rayon şöbəsinə rəis təyin olunmasını əngəlləyə bilər. Digər tərəfdən rayon rəhbərliyi və hüquq mühafizə orqanları da K.Cavadova ilə bağlı korrekt davranmağa çalışrlar. Bir müddət əvvəl şöbənin bir neçə əməkdaşıda daxil olmaqla haqqlarında hüquq-mühafizə orqanları tərəfindən araşdırmalar zamanı məsuliyyətə cəlb edilənlər olsa da, xanım Cavadovanı hansısa “gizli əl” məsuliyyətdən nəinki qurtarmış, eyni zamanda Könül xanımı şöbə rəisliyinin astanasına gətirəcək qədər uğur böcəyi rolunu da oynamışdı. Bu qurtuluş İmişlidə sabiq nazır Füzuli Ələkbərov stilinin yenidən qayıdışı oldu. Etibarlı mənbə bildirir ki. rayonda maddi vəziyyətləri olduqca pis olan insanlar narazılıqlarını artıq açıq və ünvanlı formada səsləndirməyə başlayıblar. Əsas narazılıq isə rayon rəhbərliyindəndir. Konkret olaraq İmişli rayon İcra hakimiyyətinin başçısı Vilyam Hacıyevdən. Nəzərə alsaq ki, bu aralar mətbuatda cənab Hacıyevi narahat edəcək informasiyalar dolaşmaqdadır, onda məsələ bir az da tündləşir. Əvvəla ona görə ki. V.Hacıyevin mövcud durumu nəinki Könül Hacıyevanın yaratdığı narazılıqları önləməyə, hətta məhz özü ilə əlaqədar yaranmış vəziyyəti stabil məcraya yönəldə bilməyəcək qədər çətin və kritikdir. Conflict.az-ın bir müddət əvvəl dərc etdiyi rayonun Qaraqaşlı kənd sakinləri Bəhruz Bəyalıyevə, onun qardaşı Eldəniz Bəyalıyevə, Əzizov Şahsuvar Ziyad oğluna, o cümlədən Əzizov Savalan Ziyad oğluna, Quliyev Şaban Mirzə oğluna, Rəsulov Fariz Qafqaz oğluna və İbrahimova Nərgiz Hacıməmməd qızına ehtiyacları olmadıqları halda sosial yardımın təyin olunması ilə bağlı qərarı haqqında informasiya dərc etdikdən sonra bu narahatlıq bir az da artıb. Mənbə söyləyir ki. ötən gün İmişli rayon icra hakimiyyətinin başçısı Vilyam Hacıyev ƏƏSMN-nin İmişli rayon şöbəsinin rəis əvəzi Könül Cavadovanı
təcili qəbula çağırıb. Məlumatda o da qeyd olunur ki. K.Cavadova İH-nə gedərkən olduqca həyacanlı imiş. O da qeyd edilir ki, V.Hacıyevin qəbulundan çıxandan sonra K.Cavadova şöbədə fövqəladə vəziyyət elan edib. Bütün sənədlərin yenidən araşdırılması üçün əməkdaşlara konkret tapşırıqlar verilib. Məlumatda bildirilir ki. K.Cavadova ilə icra başçısının söhbəti heç də ürəkaçan olmayıb. Xanım Cavadova özünə yaxın işçilərə daxildən məlumatları mətbuata ötürən şəxsin tapılması ilə bağlı konkret tapşırıq da verib. Bundan başqa xanım Cavadova təyin olunan sosial yardımlarla bağlı qərarların mümkün olduqca dövlət sirri qədər gizli saxlanılması ilə əlaqədar da konkret göstəriş verib.
Yazıda adları çəkilən hər kəsin mövqeyini dərc etməyə hazırıq.

Mövzuya qayıdacağıq.