Xalq artisti İlhamə Quliyeva ilə əməkdar artist Elza Seyidcahan arasında qalmaqal davam edir. Lent.az-a müsahibəsində əməkdar artist Elza Seyidcahan İlhamə Quliyevanın onun barəsində söylədiyi ittihamlara münasibət bildirib.

- Əslində nəinki İlhamə Quliyeva ilə, mənim heç kiminlə heç zaman konfliktim olmayıb. Əgər kiminlə konfliktim olubsa da, o konfliktlər də İlhamə Quliyeva tərəfindən yaradılıb. Özünüz baxın, sənət camiəmizə dava-savaş həmişə İhamə Quliyeva tərəfindən gəlib. Bir barmağınızın qatlayıb deyin, o, indiyədək kiminlə savaşıb dalaşmayıb? Kim inkişaf etmək istəyib, öz zəhməti ilə uğur qazanıb, başlayır o insanı gözdən salmağa. Ona şər-böhtan sözlər atır. Adət-ənənəmizə, öz adına, yaşına yaraşmayan yersiz sözlər danışır. Mən onun sözlərini dilimə gətirib danışmağa utanıram.

- İlhamə xanım sizi dələduzluqda ittiham edir...

- İlhamə Quliyevanın danışdığı sözlər onun öz həyat tərzinə uyğundur. O, elə bilir ki, incəsənət adamları, bəstəkarlar, müğənnilər, bir sözlə hamı onun yaşadığı həyat tərzini yaşayırlar. Amma Elza Seyidcahan onun yaşadığı həyat tərzini heç zaman yaşamayıb, heç bir zaman da yaşamayacaq. Onun mənim haqqımda dediyi ittihamlar ağ yalandır.


- Bəs ittihamlarına görə İlhamə Quliyevanı məhkəməyə verəcəksiniz?


- Yox. İstəməzdim ki, İlhamə gedib bu yaşında cəza çəksin. İlhamə Quliyevanı, onun əlində olan titullarına və unudulmaz sənətkarlarımız Həbib Bayramov və Tükəzban xanımın ruhuna bağışlayıram. Onu məhkəməyə vermirəm. Amma belə davam etsə verəcəm. Deyir ki, Elza çaşıb. Uşaq çaşar, düzünü söyləyər. Mən hər zaman sözün düzün söyləyəcəm. Çünki uşaq kimi məsumam. Nə qədər əzmkar olsam da, uşaq kimi məsumluğumu itirmirəm.

- İlhamə Quliyeva deyir ki, vaxt vardı ayaqlarımı yuyurdu...

- Mənim ayaq yumağımı, onun ayaqlarına su gətirməyimi əskiklik sayır. Tovuzda tədbirdəydik, onun təzyiqi qalxmışdı, mən ayaqlarını yudum ki, təzyiqi düşsün. Əslində ayaq yumaq bizim müdriklərimizdən qalıb. Ayaq yumaq insanların bir-birinin xidmətində durması deməkdir. Mən əslində ayaq yumağın böyüklük rəmzi olduğunu bilmirdim. Sonradan oxudum, televiziyada gördüm. Təvazökarlıqdan uzaq olsa da, özüm öz daxilimdə olan böyüklüyümü dərk etməmişəm. Hər zaman da belə olacam. Ağac bar verdikcə, başını aşağı əyər. Mən heç zaman mənəm-mənəm deməyəcəm. Çünki istəmirəm ki, gəlib axırda İlhamə Quliyeva kimi yersiz, mənasız, Azərbaycanımıza, xalqımıza, sənətkara yaraşmayan sözlər danışım.



- Onun qulluğunda durmağa hazır olduğunuzu demisiz?


- Bəli. Hazıram onun qulluğunda durmağa, ayaqlarını da yumağa, xidmətində durmağa hazıram. Duracağam da. Mən pis paxıl insanları öz yaxşılığımla cəzalandırmışam. Mən seçkilərdə “Uğura doğru” adlı konsert verdim. İnsanları prezidentimizə səs verməyə çağırırdım. İlhamə Quliyevaya da zəng vurdum. Dedi gələcəm, amma qısqanclıq güc gəldi, mənə səviyyəsiz dedi , mən də “Ağ çiçəyim” mahnısını ona qadağan etdim. Dəfələrlə olub ki, görüb uğur qazanıram, məni gözdən salmağa çalışıb. Cavan müğənnilərin əlinə silah verir ki, gedin müğənnilərlə savaşın. Biz dövlət tədbirlərində çıxış edirik. Nə üçün incəsənət insanları arasında sülh deyil, dava yaradır? Müharibələrdə musiqilər əsgərləri ruhlandırır. Mən pis sözləri qəlbimə salmıram ki, qəlbim çirklənməsin. Bəlkə mən millət vəkili seçiləcəm.

- İlhamə Quliyeva açıqlamasında deyib ki, “ Elza qulağının dibini görər”...

- Mən seçilsəm də bəstəkarlığımı davam etdirəcəm. Necə ki Qara Qarayev millət vəkili olub. Dünya şöhrətli bəstəkar, mənim müəllimim Arif Məlikov da uzun illər millət vəkili olub. Dünya şöhrətli canlı korifeyimiz Zeynəb Xanlarova uzun illərdir millət vəkilidir. Mən millət vəkili seçilsəm, sənətimdən uzaq düşməyəcəm. Əksinə, şoudan daha uzaq, ciddi işlərlə məşğul olacam. Mən heç zaman şou göstərməmişəm. Sadəcə, gündəmə gəlmək istəyənlər mənim mahnılarım, şerlərimlə özlərinə şou yaradıblar. Çünki mənim adım olan yerdə yazılar oxunur, reytinq olur. Millət vəkili seçilsəm, xonça tutub İlhamə Quliyevanın yanına gedəcəm. Ona demək istəyirəm ki, əsəbiləşməsin. Allah onu bizim səhnəmizə çox görməsin. Onun əlləri çox qısadır. Bunu dərk etsin. İlk millət vəkili şirinliyimlə onun hüzuruna gedəcəm. Bundan sonra belə boş-boş söhbətlərə də vaxtımı ayırmaq istəmirəm.