Dəstə üzvlərinin başqa dələduzluq əməlləri üzə çıxdı

Bakı Ağır Cinayətlər Məhkəməsində “Mur-Ay” Məhdud Məsuliyyətli Cəmiyyətinin (MMC) dələduzluqda təqsirləndirilən sədri Elxan Hüseynov, onunla birlikdə ittiham olunan digər şəxslərin cinayət işi üzrə yenidən məhkəmə prosesi başlayıb.

Ittihama görə, “Mur-Ay” MMC-nin sədri Elxan Hüseynov və qeyriləri qabaqcadan əlbir olub cəmiyyət tərəfindən Yeni Yasamal massivində inşa edilən yaşayış binalarındakı mənzilləri bir neçə dəfə ayrı-ayrı şəxslərə satmaqla külli miqdarda pul vəsaitlərini ələ keçirərək dələduzluq əməli törədiblər.

Cinayət işi üzrə təqsirləndirilən şəxslər “Azərbaycan” Nəşriyyatında direktor müavini vəzifəsində işləmiş Qalib Məmmədbəyli, “Mur-Ay” MMC-nin sədr müavini Bəybala Sultanov, “Mur-Ay” MMC-də mühasib vəzifəsində işləyən Novruz Muxtarov, cəmiyyətin direktoru Elxan Hüseynovun qeyri-rəsmi köməkçisi işləmiş Vaqif Söhbətov, cəmiyyətdə satış üzrə menecer işləyən Səhriyar Ağayev, Seyfəddin Səfərov və şirkətin sədri Elxan Hüseynovdur.

İki il əvvəl Bakı Ağır Cinayətlər Məhkəməsinin hökmü ilə Elxan Hüseynov 15 il , Qalib Məmmədbəyli 10 il, Novruz Muxtarov 11 il, Vaqif Söhbətov 12 il, Səhriyar Ağayev 11 il, Seyfəddin Səfərov 10 il, Bəybala Sultanov 13 il müddətinə azadlıqdan məhrum edilib. Bakı Apelyasiya Məhkəməsinə şikayət edilsə də, onların şikayəti təmin edilməyib.

Istintaq araşdırması zamanı təqsirləndirilən şəxslərin yeni dələduzluq əməlləri üzə çıxıb və buna görə də cinayət işi üzrə istintaq hərəkətləri davam etdirilib.

gundemxeber.az