Kafe və çayxanalarda, digər ictimai-iaşə obyektlərində yaradılmış şəraitin varlığı, müştərilərə göstərilən xidmətin necəliyi, təmizliyə və sakitliyə riayət olunmanın səviyyəsi və.s, hər zaman hər kəsin diqqətini cəlb etməkdədir

Ölkə əhalisinin müəyyən təminatlarının ödənilməsində, ayrı-ayrı ünvanlarda fəaliyyət göstərən ictimai-iaşə obyektlərinin də rolu olduqca böyük olur. Çünki, hava şəraitinin isti, yaxud da soyuq keçməsi nəticəsində, daha çox səhhətində problemləri olan sakinlər istər paytaxt Bakıda, istərsə də bölgələrdə belə bir ünvanlara üz tuturlar ki, müəyyən mənada rahatlıqlarını təmin edə bilsinlər. Düzdür, müxtəlif ünvanlarda fəaliyyət göstərən ictimai-iaşə obyektlərinin varlığı, hər kəsin səhhətinə, rahatlığının təminatına nə qədər yaxşı və ya pis təsir etməsinə baxmayaraq, bir o qədər də nəzər-diqqəti cəlb etməkdədir. Belə ki, bu zaman kafe və çayxanalarda, digər ictimai-iaşə obyektlərində yaradılmış şəraitin varlığı, müştərilərə göstərilən xidmətin necəliyi, təmizliyə və sakitliyə riayət olunmanın səviyyəsi, hər zaman hər kəsin diqqətini cəlb etdiyindən, belə bir məsələlər əksər hallarda müzakirə mövzusuna da çevrilir.

Bütün bunlara baxmayaraq, bu gün elə ictimai-iaşə obyektləri var ki, onların fəaliyyətlərinin lazımi göstəricilərə cavab vermədikləri qalsın bir yana, hətta müəyyən fəsadların əmələ gəlməsinə səbəb olmaları da, heç də diqqətdən kənarda qalmır. Məsələn, bir neçə gün bundan əvvəl Xətai rayonu Babək prospekti bina-60 ünvanında yaşayan bina sakini, redaksiyamıza zəng edərək belə bir məlumatı çatdırdı ki, “biz sakinlər yaşadığımız binanın baş hissəsində fəaliyyət göstərən “Qızıldağ” kafesinin həngamələrindən lap zinhara gəlmişik. Yəni, qeyd olunan kafenin birbaşa xəstəlik mənbəyi olması qalsın bir yana, müştərilərin axşam saatlarındakı səs-küyündən, sərxoş olanların hərəkətlərindən, danışdıqları nalayiq ifadələri eşitməkdən, xoşagəlməz addımlar atmalarından və.s, sanki cana doymuşuq”.

Qeyd olunan binada yaşayan sakin onu da vurğuladı ki, “Qızıldağ” kafesində axar su olmadığından, antisanitariya baş alıb gedir. Yəni, belə bir halın varlığını kafenin iç hissəsinə baxış keçirməklə də müəyyən etmək olar. Adicə kafenin bufetində, ərzaq saxlanılan otağında, xüsusilə də ayaqyolunda yaşanan antisanitariyanın varlığını gördükcə, sanki dəhşətə gəlirik”.

Təəssüf doğuran hal odur ki, “Qızıldağ” kafesində yaşanan belə bir ab-havanın varlığı, deyəsən bu günədək bəzi dövlət qurumlarını heç maraqlandırmayıb. O halda sual oluna bilər ki, daha çox gənclərin üz tutduğu bu kafenin, gələcəyimiz hesab etdiyimiz gəncliyimizə vurduğu ziyanın əhatə dairəsini heç unutmaq olarmı? Əsla yox!

Hələ bunlar qalsın bir yana, bina sakinlərinin rahatlıqlarına qənim kəsilən “Qızıldağ” kafesində çalışan işçilərin, rəhbərliklə əmək müqaviləsi bağlamadan əmək fəaliyyəti ilə məşğul olmaları da, ciddi qanun pozuntusu hesab olunur. Odur ki, biz belə bir qənaətə gəlmişik ki, qeyd olunan binada yaşayan sakinin “Qızıldağ”

kafesində yaşananlarla bağlı redaksiyamıza zəng edib haqlı narazılığını bildirməsi, aidiyyəti dövlət qurumlarının, xüsusilə də gigiyena və epidemiologiya mərkəzi ilə bərabər, vergi orqanı əməkdaşlarının da diqqətindən kənarda qalmayacaq.

P.S. Məqalənin dərcindən sonra “Qızıldağ” kafesində yaşanan çoxsaylı problemlərlə bağlı, aidiyyəti dövlət qurumlarının gördüklərin tədbirlərin nəticəsini diqqətdə saxlayıb, yaxın günlərdə yeni açıqlamalarla çıxış etməyə çalışacağıq. Odur ki, bizi izləməyi unutmayın.

Qarşı tərəfin də mövqeyini dinləməyə hazırıq.

Mirzə

gundemxeber.az