İki nəfərin ölümündə, iki nəfərin yaralanmasında təqsirli bilinən sürücüyə cəza verildi

İki nəfərin ölümü ilə nəticələnən yol qəzası törətməkdə təqsirli bilinən Əliağa Həsənovun cinayət işi üzrə məhkəmə prosesi başa çatıb. İttihama görə, 20 avqust 2014-cü il tarixdə baş verib.

Əliağa Həsənovun idarə etdiyi “Toyota Camry” markalı nəqliyyat vasitəsi ilə Qaraməryəm-İsmayıllı-Şəki yolunun İsmayıllı rayonunun Topçu kəndi ərazisindən keçən hissəsində yol nəqliyyat hərəkəti haqqında qaydanı pozub. O, sürdüyü avtomobili 1975-ci il təvəllüdlü, İsmayıllı rayonunun Hacıhətəmli kənd sakini İlham Azayevin idarə etdiyi “Vaz-21063” markalı avtomobillə toqquşub.

Hadisə nəticəsində Əliağa Həsənovun idarə etdiyi avtomobilində olan sərnişin, Bakı şəhər sakini Gülşən Şirəliyeva xəsarət alıb. İlham Azayevin sərnişini Bakı şəhər sakini, 1992-ci il təvəllüdlü Xədicə Azayeva, İsmayıllı rayon sakini, 1999-cu il təvəllüdlü Minay Azayeva Minay xəsarət alıblar. Hadisə nəticəsində İlham Azayev və onun sərnişini olan əmisi oğlu 1985-ci il təvəllüdlü Cavid Azayev ölüblər.

Bu əməlinə görə, Əliağa Həsənov Cinayət Məcəlləsinin 263.3-cü (Yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddəsi ilə ittiham edilib. Şəki Ağır Cinayətlər Məhkəməsinin hökmü ilə Əliağa Həsənov 8 il 6 ay müddətinə azadlıqdan məhrum edilib. Onun başqa yerə getməmək barədə qəti imkan tədbiri ləğv edilib və məhkəmə zalından həbs edilib.

Hökmdən narazı qalan Əliağa Həsənov apelyasiya şikayəti verərək cəzasının yüngülləşdirilməasini istəyib. Onun şikayəti araşdırılması üçün Şəki Apelyasiya Məhkəməsinə göndərilib. Apelyasiya şikayətinə hakim Rafail Əliyevin sədrlik etdiyi kollegiyada araşdırılıb.

Əliağa Həsənov elan olunmuş ittihamda özünü təqsirli bilərək ifadəsində göstərib ki, o 2014-cü ilin yanvar ayının 4-dən Vergilər Nazirliyində ştatdan kənar sürücü vəzifəsində işləyib və nazirliyin balansında olan Toyota Camry markalı, 10-AS-966 dövlət qeydiyyat nişanlı nəqliyyat vasitəsini idarə edib: “20 avqust 2014-cü il tarixdə, səhər saatlarında Vergilər Nazirliyində idarə rəisi vəzifəsində işləyən Müsavər Nəbiyevin qızı Gülşən Şirəliyeva və onun azyaşlı qızı Leyla Şirəliyevanı Bakı şəhərinə gətirmək üçün Qəbələ rayonunun Mıxlıqovaq kəndinə getdim. Gülşən Şirəliyeva və onun azyaşlı qızı Leyla Şirəliyevanı götürdükdən sonra Qəbələ

rayonundan Bakı şəhərinə qayıdarkən İsmayıllı rayonunun Topçu kəndi ərazisində 80-90 km/saat sürətlə hərəkətdə olduğum zaman qarşıdan gələn “Vaz-2106”

markalı avtomobillə toqquşdum. Toqquşmadan sonra özümdə olmadım. Bir də xəstəxanada özümə gəldim. Özümə gələndən sonra toqquşma nəticəsində “Vaz-2106” markalı maşında olan şəxslərdən iki nəfərinin həlak olmasından, həmçinin idarə etdiyim Toyota Camry markalı avtomobildə və “Vaz-2106” markalı maşında olan şəxslərin xəsarət almalarından xəbər tutdum. Baş vermiş hadisədən çox məyus oldumm, hadisədə ölənlərin ruhu qarşısında baş əyirəm, Allahdan rəhmət diləyirəm, onların varislərindən və sağ qalan şəxslərdən dönə-dönə üzr istəyirəm. Hadisəni qəsdən törətməmişəm. Dünyasını dəyişən zərəçəkmiş şəxslərin varisləri və sağ qalan zərəçəkmiş şəxslər böyük insanpərvərlik göstərərək mənimlə barışıblar, məndən heç bir şikayət və tələbləri yoxdur. Eyni zamanda, bütün zərərçəkmiş şəxslərə vurduğum ziyan ödənilib. Odur ki, apelyasiya şikayətimin təmin edilməsi, mənə təyin olunmuş cəzanın azaldılması və cəzasının məntəqə tipli müəssisəsində çəkilməsi barədə qərar qəbul edilməsini xahiş edirəm”.

Təqsirləndirilən şəxsin vəkili Dəyanət Mustafayev bildirib ki, bu cinayət əməlindən sonra təqsirləndirilən Əliağa Həsənov baş vermiş hadisədən kədərləndiyini və peşmançılığını bildirib: “Bundan başqa, Əliağa Həsənov yaşayış yeri və iş yerindən müsbət xarakterizə olunub. Qeyd olunan bu hallar məhkəmə tərəfindən Cinayət Məcəlləsinin 59-cu maddəsinə əsasən, cəzanı yüngülləşdirən hal kimi qəbul edilib.. Şəki Ağır Cinayətlər Məhkəməsi və cinayət təqibini aparan istintaq orqanı işin hallarını hərtərəfli araşdırmadan Əliağa Həsənovu təqsirli hesab edib və nəticədə onun barəsində əsassız hökm çıxarılıb. Məhkəmə gedişatında zərəçəkmiş şəxslər və onların hüquqi varisləri tərəfindən irəli sürülən mülki iddia tələbi təqsirləndirilən şəxs tərəfindən ödənilib. Hal-hazırda zərərçəkənlərin təqsirləndirilən şəxsə qarşı heç bir şikayəti və tələbi yoxdur. Bu hal Cinayət Məcəlləsinin 59.1.10-cu maddəsinə əsasən, cəzanı yüngülləşdirən hallar sayılır. Buna görə də, göstərilənləri nəzərə alaraq, Şəki Ağır Cinayətlər Məhkəməsinin hökmündə dəyişiklik edərək, Əliağa Həsənova aşağı həddə cəza verilməli və cəzasını məntəqə tipli cəzaçəkmə müəssisəsində çəkməlidir”.

Dövlət ittihаmçısı Rəhim Xudiyev müdafiə tərəfinin аpelyаsiyа şikayətinin təmin edilməməsini və Şəki Ağır Cinayətlər Məhkəməsinin hökmünün dəyişdirilmədən saxlanılmasını məhkəmə kollegiyasından xahiş edib. Zərərçəkənlər də məhkəmə çıxışı zamanı təqsirləndirilən şəxslərdən şikayətçi olmadıqlarını bildiriblər.

Tərəfləri dinləyən hakim heyəti sonda qərar elan edib. Qərara görə, təqsirləndirilən şəxsin apelyasiya şikayəti qismən təmin edilib və Şəki Ağır Cinayətlər Məhkəməsinin hökmü dəyişdirilib, Əliağa Həsənovun barəsində yeni hökm çıxarılıb. Yeni hökmə əsasən, Əliağa Həsənovun cəzası 6 ilə endirilib.

gundemxeber.az