Bu gün Cəlilabadın İdman Olimpiya Kompleksinə rəhbərlik edən Cavid Əsgərov, 2-ci qrup əlil olduğundan o, düz 15 il DSMF-nun yerli şöbəsindən təqaüd də alıb

Ölkəmizdə idmanın inkişafı ilə bağlı qəbul olunmuş qərarlar hələ bir neçə il bundan əvvəl icra olunmağa başlayarkən, hər kəsdə gələcəyə böyük ümid hissi yaranmışdı. Yəni, əksəriyyət belə bir düşüncəyə sahib idi ki, şəhər və rayonlarımızda inşa olunan olimpiya idman kompleksləri idmanla məşğul olan gənclərimizin ixtiyarına veriləcək.

Bu da bir həqiqətdir ki, hələ xalqımızın ulu öndəri, məhrum prezidentimiz Heydər Əliyev də, hakimiyyətdə olarkən ölkəmizdə idmanın inkişafına xüsusi önəm verirdi. Hakimiyyətdə ikən o, bu sahənin daha da inkişaf etdirilməsi, problemlərinin aradan qaldırılması üçün cənab İlham Əliyevi Milli Olimpiya Komitəsinə prezident də təyin etdi. Verilmiş qərardan sonra, sözün həqiqi mənasında Azərbaycan idmanının inkişafında dönüş nöqtəsinin əsası da qoyuldu. Göstərilən diqqət və qayğının nəticəsi olaraq, idmançılarımız müxtəlif yarışlarda iştirak edib üçrəngli bayrağımızı dəfələrlə göylərə də qaldırdılar. Son olaraq keçirilən Yay Olimpiya Oyunları və əldə olunan nəticələr, bir daha söylədiklərimizi tam təsdiq etməyə imkan verir.

Bəs bu gün nələr baş verir ki, əksər olimpiya idman kompleksləri geniş ictimaiyyətin qınadığı bir ünvana çerilib? Məsələn, bölgələrdə fəaliyyət göstərən bir neçə komplekslərin fəaliyyəti haqda məlumatları eşitdikcə, sanki dəhşətə də gəlirik. Çünki, həmin ünvanlar olimpiya idman kompleksləri kimi deyil, daha çox bazarxana olaraq fəaliyyət göstərməkdədirlər. Cəllilabad Olimpiya İdman Kompleksinin adı, bu sırada daha öndə gedən komplekslərdən biri olaraq hallanmaqdadır.

Bu kompleks haqda da onu deyə bilərik ki, bu gün Cavid Əsgərovun rəhbərlik etdiyi Cəllilabad Olimpiya İdman Kompleksi, sanki onun gəlir mənbəyinə çevrilib. Belə ki, kompleksin fəaliyyəti haqda məlumatları redaksiyamıza çatdıran etibarlı mənbə bildirir ki, rəhbərlik kompleksi sanki motelə çevirib və doğma dayısına da qeyri-adi səlahiyyət verib. Yəni, kompleksdə kim nədən istifadə edirsə mütləq ödəniş ödəməli olur və belə bir addımın müqabilində də, bir kimsəyə qəbz filan verilmir. Məsələn, kompleksin giriş darvazasından içəri keçmək iki manat, ştanq qaldırmaq bir manat, trinajor zalından istifadə edərkən isə, fərqli ödəniş ödəmək tələb olunur. Trinajor zalından toplanan pullara Oqtay adlı şəxs rəhbərlik edir ki, onun Cavid Əsgərovla sıx qohumluq əlaqəsinin olduğu da bildirilir.

Diqqəti bir məqama da yönəldək ki, idman olimpiya komplekslərinə rəhbərlik edən şəxslər idmançı olmalı olduğu halda, bu gün Cəlilabadın İdman Olimpiya Kompleksinə rəhbərlik edən Cavid Əsgərov, 2-ci qrup əlil olduğundan o, düz 15 il DSMF-nun yerli şöbəsindən təqaüd də alıb. Mənbə onu da bildirir ki, elə ki, o, kompleksə rəhbər təyin olundu, səhhətində əmələ gələn problemlər qəflətən aradan “qalxdı”, bir qədər də dəqiq desək “sapsağlam” bir şəxs oldu.

Kompleksin daha çox ictimai qınağa tuş gəlməsinə səbəb, qeyd olunan ünvanın əxlaqsızlıq ünvanı kimi də fəaliyyət göstərməsidir. Bu haqda da məlumatları redaksiyamıza çatdıran mənbə bildirir ki, rəhbərliyin kimlərəsə yaratmış olduğu şərait, qeyd olunan ünvana müxtəlif yaş həddində “xanım”ları gətirməyə imkan verir. Və kompleksə gətirilən “xanım”ların qiymət həddi

20-50 manat arası olur ki, bu da olduqca təəssüf hissi doğuran haldır. Çünki, olimpiya idman komplekslərinin fəaliyyətinə ictimai nəzarət olur, ortaya sakinlərin müəyyən etdiyi yanaşma da qoyulur. Bu belə olduğu halda, kompleksdə hər cür iyrənciliyə qol qoymaq nəinki ictimai qınaq yaradır, hətta nifrət hissinin də baş qaldırmasına səbəb olur.

Ümumiyyətlə, Cavid Əsgərovun rəhbərlik etdiyi Cəllilabad Olimpiya İdman Kompleksi, bugünkü fəaliyyətinə görə daha çox ictimai qınağa tuş gələn bir ünvana çevrilib. Buna səbəb, yuxarıda qeyd etdiyimiz kimi rəhbərliyin idmançı deyil, 2-ci qrup əlil olub, bu gün isə “sağalmasıdır”. Məlumatlı mənbə onu da vurğulayır ki, Əsgərov Cavid Həmidulla oğlunun belə bir addımlara qol qoymasına səbəb, onun bir çox vəzifə sahiblərinə arxayın olması, yaxud da qohumluq əlaqəsinin olmasıdır. Məsələn, mənbə bildirir ki, “o, Сəlilabad rayon Məhkəməsi sədrinin də qohumudur”. Hələ bunlar azmış kimi, onun ayrı-ayrı ünvanlarda danışması ki, “mən çoxsaylı qanunsuzluqlara qol qoyub gəlir əldə edirəmsə, demək əldə olunan gəliri heç də tək xərcləmirəm. Yəni, hər ay Azad Rəhimova çatası “toskı”nı ona çatdırıram. Yoxsa mən kim ixtiyar verər ki, kompleksin girişini çıxışını pullu edim”. Araşdırmalarımız davam edəcək.

Məqalədə sadalanan faktlarla bağlı Cavid Əsgərovdan münasibət öyrənmək istəyimiz baş tutmadığından, qarşı tərəfin də mövqeyini dinləməyə hazırıq.

Mətləb

gundemxeber.az