İcra başçının müavinin sifarişi ilə həbs edildiyi iddia olunan həkimin şikayəti təmin edilmədi

Lənkəran rayon Mərkəzi xəstəxanasının Təcili və Təxirəsalınmaz Tibbi Yardım stansiyasında həkimi işləmiş 1955-ci il təvəllüdlü İmanverdi Hüseynovun cinayət işi üzrə məhkəmə prosesi başa çatıb.

İttihama görə, İmanverdi Hüseynov 14 oktyabr 2014-cü il tarixdə, saat 09.00-da Lənkəran şəhəri, Ş.Axundov küçəsində, Lənkəran Humanitar Kollecinin qarşısındakı yolda heç bir əsaslı səbəb olmadan Əflatun İsmayılovu söyüb. O, Əflatunun bədəninin müxtəlif yerlərinə qəsdən yumruq və təpik zərbələri vuraraq ona xəsarət yetirib.

Bundan əlavə İmanverdi Hüseynov oktyabrın 17-də, saat 09.00-da Ş.Axundov küçəsində yerləşən “Nikoil” İKB ASC-nin Lənkəran filialının yaxınlığında Samit Baxşiyevin ünvanına nalayiq sözlərlə söyüb. O, Samit Baxışovun bədəninin müxtəlif nahiyələrinə yumruq, təpik və silah qismində istifadə etdiyi əl çantası ilə vurub. Hadisə nəticəsində Samit Baxışov xəsarət alıb.

İmanverdi Hüseynov Cinayət Məcəlləsinin 221.2.1 və 221.3-cü (xuliqanlıq) maddəsi ilə ittiham edilib. Lənkəran Şəhər Məhkəməsinin hökmü ilə İmanverdi Hüseynov 3 il müddətinə azadlıqdan məhrum edilib. Hökmdən narazı qalan İmanverdi Hüseynov apelyasiya şikayəti verərək barəsində olan cinayət işinə xitam verilməsini və bəraət hökmünün çıxarılmasını istəyib. Onun şikayəti baxılması üçün Şirvan Apelyasiya Məhkəməsinə göndərilib. Apelyasiya instansiyasında iş hakim Etibar Camalovun sədrlik etdiyi kollegiyada araşdırılıb.

“İmanverdi məni nalayiq küçə söyüşləri ilə təhqir etdi”

Zərərçəkmiş şəxs qismində ifadə verən Əflatun İsmayılov bildirib ki, Lənkəran şəhərində yaşayır və fərdi əməklə məşğul olur: “Oktyabrın 14-də

Lənkəran rayonunun Sütəmurdov kəndində yaşayan oğlunun evindən Lənkəran şəhərinə gəlib. Şəhərin Şirəli Axundov küçəsində, Lənkəran Humanitar Kollecinin qarşısında avtomaşınlar üçün nəzərdə tutulmuş yolun kənarı ilə hərəkət edərkən nəqliyyatın sıxlığı ilə əlaqədar su kanalının üzərindən tullandım və piyadaların gediş-gəlişi üçün nəzərdə tutulan yola keçdim. Bu zaman üzdən tanıdığım İmanverdi Hüseynovla toqquşdum. İmanverdidən üzr istədim, İmanverdi məni nalayiq küçə söyüşləri ilə təhqir etdi. Yenidən ondan üzr istədim və fikirli olduğumdan onunla toqquşduğumu bildirdim. İmanverdi məni yumruq və təpik zərbələri ilə vurmağa başladı. Ondan aralaşmaq istəsəm də, bunu bacarmadım. Dartışma zamanı İmanverdi əynimdə olan köynəyimi cırdı. Həmin yer Humanitar Kollecin qarşısı, 4 nömrəli məktəbə gedən yol olduğundan, həmçinin Heydər Əliyev parkı da həmin ərazidə yerləşdiyindən çoxlu adam oraya yığılmışdı. Ora toplaşanlar bizə tamaşa edirdilər. Hadisə 10-15 dəqiqə davam edib. İmanverdi məni döyərkən adını bilmədiyim taksi sürücüsü kimi tanıdığım şəxs məni onun əlindən aldı. Buna baxmayaraq İmanverdi söyüşlər söyməkdə davam etdi. Dərhal telefon vasitəsilə polisə bu barədə məlumat verdim. Sonra polis şöbəsinə getdik, oradan isə məni həkimə göndərdilər. Həmin vaxt artıq özümdə olmamışam, həyəcanlı olmuşam”.

Zərərçəkmiş daha sonra ifadəsində göstərib ki, təqsirləndirilən şəxs etdiyi hərkətə görə ondan üzr istəməyib: “Buna baxmayaraq İmanverdi Hüseynova yüngül cəza verilməsini məhkəmədən xahiş edirəm”.

“Dedi ki, korsan, yoluna bax”

Digər zərərçəkmiş Samit Baxşiyevun sözlərinə görə, xəstə olduğu üçün hər gün səhər hava qəbul etmək üçün dəniz kənarına gedib: Oktyabrın 17-də, saat 09.00-da Lənkəran şəhəri Şirəli Axundov küçəsi ilə piyadalar üçün nəzərdə tutulmuş yolla İcra hakimiyyətinə tərəf gedirdim. Həmin vaxt fikrim telefonda olduğu üçün qarşıdan gələn və adını sonradan bildiyim İmanverdi Hüseynovla toqquşdum. Ondan üzr istədim. Amma İmanverdi

üzərimə yüksək tonla qışqıraraq dedi ki, korsan, yoluna bax. İmanverdiyə fikrimin telefonda olduğunu və onu görmədiyimi bildirdim. İmanverdi yenidən qışqırdı və ünvanıma nalayiq söyüşlər söyməyə başladı. Ona əhəmiyyət verməməyə çalışsam da, İmanverdi Hüseynov yumruq və təpik zərbələri ilə məni vurdu. İmanverdi sonra da əlindəki sumkalardan birini başına vurdu, digərini isə sifətimə çəkərək boyun və üz nahiyələrimə xəsarətlər yetirdi. Bundan sonra İmanverdi Hüseynov üzərimə gəlmək istədi. Həmin vaxt İmanverdini itələdim ki, məndən aralansın. Bu zaman İmanverdi yerə yıxıldı. Həmin vaxt oraya çoxlu sayda, təxminən 30-35 nəfər adam toplaşıb. Yoldan keçən maşınların hərəkəti dayanıb və hadisə 10-15 dəqiqə davam edib. Daha sonra polisin 102 xidmətini yığaraq hadisə barədə məlumat verdim. Sonra polis şöbəsinə gələrək ərizə ilə müraciət etdim və tədbir görülməsini xahiş etdim. Polis şöbəsinə gedəndə gördüm ki, təqsirləndirilən şəxs məndən qabaq polis şöbəsinə gəlib və guya onu vurmağım barədə şikayət edib. Təqsirləndirilən şəxs mənə qarşı bu cür hərəkətlərə yol verdiyinə görə hazırda onu bağışlamıram və ondan şikayətçiyəm. Odur ki, İmanverdi Hüseynovun qanun çərçivəsində cəzalandırılmasını istəyirəm”.

İmanverdi Hüseynov elan olunmuş ittiham üzrə özünü təqsirli bilməyib. O, bildirib ki, cinayət ona qarşı quraşdırılıb: “Həbsimi Lənkəran rayon İcra Başçısının birinci müavini sifariş edib. Bütün bunlar onun qurduğu oyundur. dir. Çünki 2014-cü ilin sentyabr ayının 27-də məni Lənkəran rayon İcra Başçısının birinci müavininin evinə çağırıblar. Ora gedəndə gördüm ki, icra başçısının müavinin yeznəsi can verir. Can verən xəstə ürək xəstəsi idi. Mənə dedilər ki, xəstəni xəstəxanaya aparmaq lazımdır. Mən də ona xəstəni yerindən tərpətməyin mümkün olmadığını bildirdim. Onlar isə xəstənin xəstəxanaya aparılmasında israr etdilər. Həkim kardioloq çağrılmasının vacibliyini bildirdim. Çünki bu məsuliyyətli işdir. Həkim kardioloq gələnə qədər xəstə öldü. Buna görə də elə bilirlər ki, xəstənin ölümündə günahım var. Əflatun İsmayılovu və Samit Baxşiyevi ümumiyyətlə tanımamışam. Onları vurmamışam və söyməmişəm”.

Dövlət ittihamçısı Ədalət Əzimov apelyasiya şikayətinin dəlillərini əsassız hesab edib. O, apelyasiya şikayətinin təmin edilməməsini xahiş edib. Tərəfləri dinləyən hakim heyəti sonda apelyasiya şikayətinin təmin edilməməsi barədə qərar elan edib.

gundemxeber.az