Gəncədə yol qəzası baş verib. Tələbə qızı avtomobil vurub.

Gəncə Şəhər Mərkəzi Klinik Xəstəxanasından ANS PRESS-ə verilən məlumata görə, Həsən Bəy Zərdabi adına Gəncə Pedoqoji Universitetinin tələbəsi, Ağdaş rayonunun Ləki qəsəbəsindən olan, 1995-ci il təvəllüdlü Afaq İnqilab qızı Bayramova yolu keçmək istəyərkən naməlum avtomobil tərəfindən vurulub. Hadisə universitetin qabağında baş verib.

Xəsarət alan 20 yaşlı tələbəni dərhal Gəncə Şəhər Təcili Tibbi Yardım Xəstəxanasına çatdırıblar. Xəstəxanada yaralıya ilkin tibbi yardım göstərilib və vəziyyətinin ağırlığından onu Gəncə Şəhər Mərkəzi Klinik Xəstəxanasına aparıblar.

Xəstəxanadan yaralının reanimasiya şöbəsində olduğunu və vəziyyətinin orta-ağır olduğunu bildirdilər.

Faktla bağlı Gəncə Şəhər Polis İdarəsində araşdırma aparılır.

Bu hadisə Gəncədə gün ərzində baş verən ikinci bədbəxt hadisədir. Səhər saatlarında şəhərin Şah İsmayıl Xətai prospektində şəhər sakini, 1980-ci il təvəllüdlü Arzu Süleymanov yolu keçmək istəyərkən "VAZ-2106" markalı avtomobil tərəfindən vurulmuşdu. Sürücü çoxsaylı bədən xəsarətləri alan Arzu Süleymanovu avtomobilinə qoyaraq dərhal Gəncə Şəhər Təcili Tibbi Yardım Xəstəxanasına çatdırmışdı.