Qaxda yol qəzasında təqsirli bilinən şəxsin cinayəti sübuta yetirilmədi, məhkəmə ona bəraət verdi

Şəki Apelyasiya Məhkəməsində yol nəqliyyat hadisəsi törətməkdə təqsirli bilinən Elçin Yusifov və Bəxtiyar Məmmədlinin cinayət işi üzrə məhkəmə prosesi başa çatıb.

İttihama görə, yol nəqliyyat hadisəsi 10 oktyabr 2013-cü il tarixdə baş verib. Elçin Yusifov idarə etdiyi “Ford Tranzit 80” markalı avtomobillə Qax-Qorağan şosesi ilə hərkət edən zaman Turaclı kəndinə olan döngənin qarşısında Qax rayonu, Zəyəm kənd sakini Bəxtiyar Məmmədlinin sürdüyü “Opel Frontera” markalı avtomobillə toqquşub.

Nəticədə “Opel Frontera” markalı avtomobildə olan sərnişin Samir Rəsulov, Elxan Hacıyev xəsarət alıblar. Onlar təcili xəstəxanaya yerləşdiriliblər. Vaxtında tibbi yardım göstərildiyi üçün hər iki yaralının həyatını xilas etmək mümkün olub.

İstintaq araşdırması zamanı yol qəzasının törədilməsində həm Elçin Yusifov, həm də Bəxtiyar Məmmədli təqsirli biliniblər. Onların barəsində Cinayət Məcəlləsinin 263.1-ci (avtomobil, tramvay və ya digər mexaniki nəqliyyat vasitəsini idarə edən şəxs tərəfindən yol hərəkəti və ya nəqliyyat vasitələrinin istismarı qaydalarının pozulması, ehtiyatsızlıqdan zərərçəkmiş şəxsin sağlamlığına az ağır və ya ağır zərər vurma) maddəsi ilə ittiham edilib.

Qax Rayon Məhkəməsinin hökmü ilə Elçin Yusifov 1 il 6 ay müddətinə islah işləri cəzasına məhkum edilib. Digər təqsirləndirilən Bəxtiyar Məmmədli isə 1 il 6 ay müddətinə cəza alıb. O, cəzasını məntəqə tipli cəzaçəkmə müəssisəsində çəkməsi qərara alıb.

Hökmdən narazı qalan Elçin Yusifov apelyasiya şikayəti verərək barəsində olan hökmün ləğv edilməsini, bəraət hökmünün çıxarılmasını istəyib. Onun

şikayəti hakim Mirbahəddin Hüseynovun sədrlik etdiyi kollegiyada araşdırılıb.

“Əyləcə basmağa macal tapmadım”

Elçin Yusifovun sözlərinə görə, oktyabrın 10-da, saat 09.00-da Qax şəhəri– Qarağan kəndi şossesi ilə idarə etdiyi “Ford-Tranzit 80” markalı avtomobillə hərəkətdə olub. Onun sözlərinə görə, Turaclı kəndinə dönən yolayrıcına yaxınlaşanda əks istiqamətdən “VAZ 2106” markalı avtomobil gəlib: “Həmin idarə etdiyim avtomobili Turaclı kəndinə gedən yola keçmək üçün yol zolaqlarını ayıran xəttin üzərində saxladım və məndən soldakı yol zolağının boşalmasını gözlədim. Elə bu an “VAZ 2106” markalı avtomobilin dayandığı istiqamətdə “Mercedes Benz” markalı avtomobil yüksək sürətlə keçdi, “VAZ 2106” markalı avtomobilin sol tərəfindən ötən “Opel-Frontera” markalı digər avtomobil isə idarə etdiyim avtomobilin qarşısına çıxdı və avtomobilim ilə toqquşdu. “Opel-Frontera” markalı avtomobil onun yoluna qəflətən çıxdığı üçün əyləcə basmağa macal tapmadım. Hesab edirəm ki, “Yol hərəkəti haqqında” qanunun hər hansı tələbini pozmamışam, avtomobilini normal sürətlə öz hərəkət zolağında idarə etmişəm”.

“Müstəntiq hadisə yerinin müayinəsini səthi aparıb”

Təqsirləndirilən şəxs qeyd edib ki, ibtidai istintaq müddətində Cinayət Məcəlləsinin 263.1-ci maddəsi ilə ona qarşı irəli sürülmüş ittiham üzrə özünü təqsirli bilməyib: “Qax Rayon Məhkəməsində də barəmdə ədalətli və qanuni hökmün çıxarılması üçün ərizə və vəsatətlə müraciət etdim, əlavə sübutlar təqdim edərək həmin cinayətin törədilməsində təqsirim olmadığını göstərdim. Eyni zamanda məhkəməyə bildirdim ki, həmin qəzanın baş verməsində təqsirkar “Opel Frontera” markalı avtomobilin sürücüsü Bəxtiyar Məmmədli olub. Bəxtiyar Məmmədlinin hadisə vaxtı sərxoş olması, maşınında isə çoxlu adamın oturması barədə dəfələrlə məlumatlar versəm də, bu məlumatlara əhəmiyyət verilməyib, məhkəmə prosesində əlavə heç bir araşdırma aparılmayıb. Müstəntiq hadisə yerinin

müayinəsini səthi aparıb, hadisə yerinin sxemini düzgün tərtib etməyib, həmin istintaq hərəkətlərində iştirakım olmayıb. Müstəntiqin öz qərarında hadisə barədə verdiyi yanlış məlumatlar əsasında ekspert də səhv rəy verib”.

“40 min manat maddi ziyan çəkmişəm”

Elçin Yusifovun sözlərinə görə, əgər hadisə ittiham aktında göstərilən kimi baş verimsə, deməli “Opel Frontera” markalı avtomaşın ötmə əməliyyatına başlayaraq onun yoluna çıxıb və 300 metr məsafəni qarşı-qarşıya gəliblər: “Hadisə əgər belə olubsa, nə üçün hadisə zamanı “Opel Frontera” markalı avtomaşının qabaq hissənin ortasından sağ tərəfi, mənim idarə etdiyim “FORD-Tranzit 80” markalı avtomaşın isə qabaq hissəsinin sol küncündən zədə alıb? İşdə olan 31 yanvar 2014-cü il tarixli ekspert rəyi düzgün verilməyib. Öz hüquqlarımdan istifadə edərək məhkəmə prosesində yenidən komission ekspertiza keçirilməsini məhkəmədən xahiş etmişəm. Lakin məhkəmə vəsatətimi təmin etməyib və ibtidai istintaq materialları üzrə hökm çıxarıb. Qax Rayon Məhkəməsinin hökmündə göstərilir ki, Bəxtiyar Məmmədli zərərçəkənlərlə yanaşı, təqsirləndirilən şəxs Elçin Yusifovla razılıq əldə edərək onunla barışıq əldə edib və onların müalicəsinə köməklik göstərib. Bundan başqa, məhkəmə hökmündə qeyd edilib ki, Bəxtiyar Məmmədli mənə dəymiş maddi zərəri də ödəyərək avtomaşınımı təmir etdirib. Buna görə də hökmün həmin hissəsinə etiraz edirəm. Bəxtiyar Məmmədlinin təqsiri üzündən baş vermiş qəza nəticəsində ən azı 40 min manat maddi ziyan çəkmişəm. Lakin sözügedən hadisədə mən təqsirləndirilən şəxs hesab edilmişəm. Buna görə də zərərçəkən kimi tanınmadığı üçün gələcəkdə Bəxtiyar Məmmədlidən dəymiş ziyanın əvəzini tələb etmək hüququnu itirmişəm. Məhkəmədə həmin cinayətlə əlaqədar özümü təqsirli bilməmişəm və göstərmişəm ki, qəzanın baş verməsinin səbəbkarı Bəxtiyar Məmmədlidir. Lakin məhkəmənin hökmündə guya özümü qismən təqsirkar bilməm göstərilib. Ona görə də Qax Rayon Məhkəməsinin hökmünü qanunsuz və əsassız

hesab edirəm, həmin hökmün ləğv edilərək mənə bəraət verilməsini xahiş edirəm”.

Digər təqsirləndirilən Bəxtiyar Məmmədli bildirib ki, Qax rayonun Zəyəm kəndində yaşayır və fərdi təsərrüfatla məşğul olaraq ailəsini dolandırıb. Hadisənin baş verməsindən danışan Bəxtiyar Məmmədli qeyd edib ki, qəza baş verən zaman sərxoş olmayıb.

Tərəfləri dinləyən hakim heyəti sonda Elçin Yusifovun apelyasiya şikayətinin təmin edilməsi barədə qərar elan edib. Qərara görə, Qax Rayon Məhkəməsinin çıxardığı hökmün Elçin Yusifova aid hissəsi ləğv edilib. Məhkəmə Elçin Yusifovun əməlində cinayət tərkibi olmadığı nəticəsinə gəlib və onun barəsində bəraət hökmü çıxarıb.

gundemxeber.az