Vaxtilə Niyazi, Səid Rüstəmov və Şəmsi Bədəlbəyli kimi korifeylərin rəhbər olduğu filarmoniyamız bu gün ən çətin durumunu yaşayır.

Hazırda filarmoniyaya Murad Adıgözəlov kimi iş bcarığı olmayan bir insanın direktorluğu oradakı qanun pozuntuları ilə nəticələnir. Onu da qeyd edək ki, Azərbaycanın Dünya şöhrətli incəsənət adamları filarmoniyadakı süstlükdən narahatdırlar. Onlar da Murad Adıgözəlovun təsadüfi rəhbər olmasını alqışlamırlar.

Qeyd etdiyimiz kimi bu gün filarmoniyada bir sıra qanusuzluqlar hökm sürür. Belə ki, filarmoniyanın baş mühasibi Gülsüm Aslanovanın bacısı İzmira xanım filarmoniyada iqtisadçı ştatında otursa da 2 ilə yaxındır ki, yerində tapılmır. 2-ci qrup əlilliyi olan İzmira xanım iş üzü görmədiyi halda hər ay əmək haqqısını vaxtlı-vaxtında alır.

Respublikanın xalq artisti Əvəz Abdullayev də İzmira xanımın yolunu gedir. Sadəcə, İzmira xanım evdə oturub, idarənin işini aparsa da, Əvəz Abdullayev isə həmişə xaricdə olur. Orada öz xeyiri hesabına konsertlər verir. Hətta, bir dəfə Heydər Əliyev Sarayında olan tədbirlərin birində mədəniyyət və turizm nazirinin müavini Ədalət Vəliyev adı işdə, özü xaricdə olaraq saxta əmək haqqı alan Əvəz Abdullayev barəsində qəti fikir söyləyərək, onun işdən azad olmasını bildirmişdir. Təəssüflər olsun ki, Ədalət Vəliyevin bu barədə sərt danışmağına baxmayaraq xalq artisti Əvəz Abdullayev yenə öz kefindədir.

Maraqlıdır ki, filarmoniyanın direktoru Murad Adıgözəlovu nə məcbur edir ki, iqtisadçı İzmira xanımın və Əvəz Abdullayevin əmək intizamını pozmalarına göz yumur? Görünür direktor onlarla şərikdi...

Onu da bildirmək yerinə düşər ki, İzmira xanımın və Əvəz Abdullayevin işə gəlməməsi barədə filarmoniyanın direktor müavini Afət Mikayılovdan sorğu etdik. Müavin öz sözləri ilə onların filarmoniyaya gəlməmələrini etiraf etdi. Hətta, İzmira xanımın 2-ci qrup əlil kimi işə gəlməməyi haqqında belə dedi: “Doğrudur, işə gəlmir. Öz evində işimizi aparır. Qaldı ki, biz ona 1-ci mərtəbədən otaq verəsi deyilik ki?”

Redaksiyamıza daxil olan məlumatda o da bildirilir ki, baş mühasib Gülsüm Aslanova özünə bahalı minik avtomobili alıb. İndiki vaxtda alınan əmək haqqı yalnız yeməyi görürsə, bu qədər vəsaiti Gülsüm Aslanova haradan alıb?

İctimaiyyət arasında əgər sorğu aparılsa ki, filarmoniyanın direktoru kimdir? İnanın ki, heç bu suala cavab tapan olmaz.

Elə isə qəzet vasitəsi ilə yazdıqlarımıza filarmoniyanın direktoru Murad Adıgözəlov aydınlıq gətirsə daha yaxşı olar.

Qarşı tərəfin də mövqeyini dinləmək vacibdir.