Sabirabad rayonundan oxucumuz Kamil Lətifov Moderator.az - a olduqca maraqlı bir məktub göndərib. Həmin yazıdan bəlli olur ki, müəllif ittiham etdiyi şəxslər barədə kifayət qədər məlumata sahibdir və bunların ictimailəşməsini, prokurorluq orqanlarının araşdırma aparmasını istəyir. İttihamlarla bağlı hər hansı dəqiqləşdirmə aparmaq imkanımız olmadığından bəri başdan qarşı tərəfə də cavab haqqı tanıdığımzı bildiririk:

“Hörmətli “Moderator.az”!

Bu yaxınlarda saytınızda MTN - nin keçmiş naziri Eldar Mahmudov və onun ətrafı haqqında tuthatut xəbərlərini oxudum. Artıq vərdiş etmişik, Sabirabadda hətta kafe və restoranlarda əyləşib istirahət edənlər ilk növbədə bir - birindən təzə tutulanın olub - olmadığını soruşurlar. Hətta tərif kimi çıxmasın, kimsə “sveji” xəbər deyirsə, hamı bir ağızdan ““Moderator” yazıbsa, deməli düzdür!” deyir.

Əlbəttə, Eldar Mahmudovun komandası Prezidentə, onun yürütdüyü siyasətə kölgə saldı, balta vurdu. Belələrinin bütün fəaliyyət sferası öyrənilməlidir. Çünki onların yerlərdəki dəstəkçiləri də az deyil. Məsələn, mən Sabirabadın lap mərkəzindəki kafelərdən birində çalışıram və informasiya mübadiləsində çoxları ilə ünsiyyətim olur.
Amma hələ də bir sıra suallar bizi narahat edir. Məsələn, mən də bilirəm ki, rəhmətlik Prezident Heydər Əliyev özünə xəyanət etmiş bəzi məmurları əfv edirdi, bağışlayırdı, amma dövlətimizə xəyanət edəni necə bağışlayasan və böyük şəxsiyyət belələrini bağışlamırdı. Sabirabadın keçmiş icra başçısı var idi, Vaqif Şıxəliyev. Sabirabad
camaatı bilir ki, Ulu öndər Heydər Əliyevin 20 avqust 1993-cü il tarixli fərmanı ilə Sabirabad rayonu İcra hakimiyyətinin başçısı təyin edilən Vaqif Şıxəliyev prezidentin etimadını heç bir il yarıtmadı. Necə ki, Eldar Mahmudov və onun komandası prezident İlham Əliyevin etimadını bada verdilər. Təsəvvür edin, Vaqif Şıxəliyev belə bir vacib vəzifədə duruş gətirmədi və Heydər Əliyevin Prezidentin 14 avqust 1995-ci il tarixli digər bir fərmanı ilə işdə ciddi nöqsanlara yol verdiyinə görə Sabirabad rayonu İcra hakimiyyətinin başçısı vəzifəsindən qovuldu.

Amma hamı bilirdi ki, onun və digər qardaşı, hazırda Beyləqanın rəisi olan Füzuli Şıxəliyevin MTN naziri E.Mahmudovla yaxınlığı onların bəzi lazımsız işlərdə karına gəlirdi. Məsələn, bütün Sabirabad əhli onu da bilir ki, Vaqif Şıxəliyev hər yerdə özünü DİN rəhbəri Ramil Usubovun, Füzuli Şıxəliyev isə MTN şefi Eldar Mahmudovun adamı kimi özlərini təqdim edib. Bu elə quru söz deyil. Məsələn, F. Şıxəliyev Eldar Mahmudov DİN - də “İCQMİ”nin rəisi olanda onun sağ əli olmuşdu... Onlar bir yerdə işləmişdilər. Bu yaxınlarda mətbuatda bu barədə daha maraqlı məlumat oxuduq. Məsələn, Şıxəliyevlərin MTN - lə əlaqələrinə dair çox maraqlı bir fakt:

Azərbaycan MTN - i 2012 - ci ildə Füzuli və Vaqif Şıxəliyevlərin doğma qardaşı oğlu Nurəli Şıxəliyevi narkotik qaçaqmalçılığına görə həbs etdi. Həmin rəsmi məlumat MTN - nin bu gün də rəsmi saytında var. Məlumat belədir: «Azərbaycanda narkotik vasitələrin qaçaqmalçılığı ilə məşğul olan şəxslər ifşa edildilər” başlıqlı, MTN-nin rəsmi məlumatında yazılır:
“Azərbaycanda narkotik vasitələrin qaçaqmalçılığı və qanunsuz dövriyyəsi ilə məşğul olan şəxslər ifşa edilib. Milli
Təhlükəsizlik Nazirliyinin İctimai Əlaqələr Mərkəzinin məlumata görə, onlardan ümumilikdə 20 kiloqramdan artıq narkotik vasitə aşkar edilərək götürülüb. Belə ki, Azərbaycan Respublikasının vətəndaşları - Şahverdiyev Baba Zakir oğlu, Əliyev Ceyhun Firudin oğlu, Şıxəliyev Nurəli Əliabbas oğlu, Həsənov İlham Sumbat oğlu,
Bayramov Elşən Güloğlan oğlu və Heydərova Günel Rəhim qızı saxlanılıblar. Məlum olub ki, adları çəkilən şəxslər və qeyriləri qabaqcadan əlbir olan bir qrup şəxs halında, satış məqsədi ilə külli miqdarda narkotik vasitəni qaçaqmalçılıq yolu ilə Rusiya Federasiyası istiqamətindən gömrük sərhədindən gömrük nəzarətindən gizli
keçirib Azərbaycan Respublikasına gətiriblər. Müəyyən edilib ki, Baba Şahverdiyev, Ceyhun Əliyev, Nurəli Şıxəliyev, İlham Həsənov, Elşən Bayramov, Günel Heydərova və qeyriləri cinayət əlaqəsinə girərək Rusiya Federasiyasının Moskva şəhərində külli miqdarda narkotik vasitə olan 125,46 qram kokain və sintetik narkotik vasitə olan 72,83 qram metadon əldə ediblər. Qrupun üzvləri həmin narkotik vasitələri “DVD player”in içərisində gizlədib “Moskva-Bakı-Moskva” reysi üzrə hərəkət edən “İkarus” markalı avtobusla “Samur” gömrük məntəqəsindən gizli keçirərək Bakı şəhərinə gətirərkən cinayət başında yaxalanıblar. Faktla bağlı Milli Təhlükəsizlik Nazirliyi İstintaq Baş İdarəsi tərəfindən Azərbaycan Respublikası Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən narkotik vasitələrin qaçaqmalçılığı), 234.4.1-ci və 234.4.3-cü (qabaqcadan əlbir olan bir qrup şəxs tərəfindən külli miqdarda narkotik vasitələri əldə etmə, daşıma, saxlama və ya satma) maddələri ilə cinayət işləri başlanılıb. Adları cəkilən şəxslər təqsirləndirilən şəxs qismində cəlb olunaraq barələrində məhkəmənin qərarları ilə həbs qətimkan tədbiri seçilib. İstintaq-əməliyyat tədbirləri davam edir”.

Təsəvvür edirsinizmi, Nurəli Şıxəliyev bu qədər narkotikə görə bir necə aydan sonra buraxıldı, amma qalanlar "srok"a verildi. Bu necə baş vermişdir? Təbii ki, bu, Füzuli və Vaqif Şıxəliyevlərin MTN-nin keçmiş rəhbəri E. Mahmudovla sıx yaxınlığının nəticəsi ola bilərdi.

Bunu da qoyaq bir kənara, biz heç də inanmırıq ki, Vaqif Şıxəliyevin hər yerdə danışdığı kimi, nazir Ramil Usubovla yaxın münasibəti ola bilər. Amma bir fakt diqqəti çəkir: bu gün Vaqif Şıxəliyevin polis orqanlarında görün nə qədər qardaşı, doğmaları yüksək vəzifə tutur: təəccüblənməyin, Azərbaycanın təkcə polis orqanlarında Şıxəliyev
soyadını daşıyan 10-a yaxın şəxs çalışır. Məsələn: V.Şıxəliyevin qardaşı Mirəli Şıxəliyev DİN-nin Baş Dövlət Yol Polisi İdarəsinin tabeliyində olan Sumqayıt «MERO»nun rəisidir. Digər qardaşı Vidadi Şıxəliyev uzun illərdir Sabirabadda Yol Polisi Bölməsinin rəisi olub, bu yaxınlarda təqaüdə çıxıb. Digər qardaş Füzuli Şıxəliyev hazırda
Beyləqan RPŞ-nin rəisidir (keçmiş MTN naziri Eldar Mahmudovun yaxın adamı). Rəis Füzuli Şıxəliyevin oğlu Hacalı Şıxəliyev Saatlı RPŞ-də təhqiqatçıdır. Vaqif Şıxəliyevin oğlu Anar Şıxəliyev Binəqədi rayon RPİ-nin 5-ci polis bölməsinin rəisidir. Onun əmisi oğlu Tural Şıxəliyev Rusiyada Polis Akademiyasını bitirib, qohumlarının sözlərinə görə artıq polis orqanlarında yeni vəzifəyə təyin olunub. Onun qardaşı Sahil Şıxəliyev Saatlı RPŞ-də CAB-ın baş əməliyyatçısıdır. Onun da əmisi oğlu Fuad Şıxəliyev Beyləqan RPŞ-də polis əməkdaşıdır. Onun əmisi oğlu Asif Şıxəliyev isə Nərimanov rayon Prokurorluğunda prokuror köməkçisidir. O, MTN-nin 2012-ci ildə narkotiklə həbs olunmuş Nurəli Şıxəliyevin qardaşıdır. Amma mənim yaxın qohumum Füzuli Şıxəliyevin əvvəlki iş yerində əməkdaşı olmuşdu və onu işdən qovdu ki, qohumları ətrafına toplasın.

Bəli, MTN naziri Eldar Mahmudovun Şıxəliyevlərlə yaxınlığı o dərəcədə olub ki, hətta Eldar Mahmudov Vaqif Şıxəliyevin oğlu Elmar Şıxəliyevi MTN-də məsul vəzifəyə də təyin etmişdir. Lakin nə sirdirsə, bir müddət sonra Eldar Mahmudov bu qədər yaxın münasibətə baxmayaraq Elmar Şıxəliyev MTN-dəki vəzifəsindən qovdu... Amma onu guya öz ərizəsi ilə işdən çıxardıqlarını sənədləşdirdilər. Amma bütün Sabirabad bunun əsil səbəbini yaxşı bilir... Amma ən maraqlısı budur ki, Sabirabadda xəbər yayılıb ki, Vaqif Şıxəliyevə görə Daşkəsənin icra başçısı Əhəd Abiyevi Bakıya çağırıblar. Səbəb isə odur ki, Elmar Şıxəliyev Daşkəsən RİH-də hüquq şöbəsinin müdiri vəzifəsinə
təyin edilib. MTN kimi bir qurumdan qalmaqalla işdən çıxarılmış bu şəxs dövlət qulluğu olan bu vəzifəyə təyin olunarkən neçə olub ki, Dövlət Qulluğu Komissiyasının test yoxlamasından tərtəmiz keçib? Odur ki, Əhəd Abiyevin də bu qalmaqallı vəzifəyə təyinatda rolu olduğunu deyirlər. Çünki onun təqdimatı bu işdə əsas pol oynayıb. Daşkəsən RİH-nin rəsmi saytında bu təyinatın izini asanca görə bilərsiniz.

Hörmətli “Moderator.az”! Bunları yazmaqda məqsədimiz heç də kiminsə vəzifəsinin paxıllığını çəkmək deyil. Amma biz də bilmək istəyirik ki, niyə, məsələn, mənim qohumlarımdan 5-i ali hüquq təhsilli olduğu halda (onların 3-ü Rusiyada ali təhsil alıb) polis və ya prokurorluq orqanlarında işə düşələ bilmirlər, amma təkcə bir ailədən
10-dan çox adam asan yolla yüksək vəzifə tuturlar? Hətta onu da deyim ki, V. Şıxəliyev Bakıda bir bazarın, qudası M.İbrahimov isə başqa bir bazarın sahibidir. Göründüyü kimi, bu qohumlar nazir R.Usubovun, Eldar Mahmudovun imkanlarından necə istifadə edirlər. Deyəsən, bu xəmir hələ çox su aparacaq...”.