Nazirlikdən meriyadakı maxinasiyalara uzanan gizli əl kimdir?

Həbsdəki Vidadi Zeynalov kadrı sayəsində Bakı Mənzil Kommunal Təsərrüfatı Departamentindəki əməliyyatlara nəzarət edibmiş; Abutalıbov Rəfail Mehralıyevi qoruya biləcəkmi?

Ölkənin son bir ayı ciddi təlatümlərlə yadda qaldı. Seçkilərin ardınca hakimiyyətdə iki mühüm postu tutan nazir vəzifəsini itirdi. 2005-ci ilin ruzigarını dumanlı xatırladan 2015-ci il hadisələri daha səs-küylü oldu.

O zaman səhiyyə və iqtisadiyyat nazirləri həbs edilmişdisə, bu mərhələdə MTN rəhbəri və Rabitə naziri vəzifəsi ilə vidalaşdı. Lakin bu sərəncamlar yetərli olmadı.

Hər iki sektorda zəncirvari həbslər dalğası, istefalar kütləvi xarakter aldı. Bir məxfi informasiya bütün düyünləri açdı və dövlət içində dövlət qurmaq ambisiyası olanların yolu məhbəsdən salındı.

Xüsusilə, MTN-də general Akif Çovdarovun və Rabitə Nazirliyində aparat rəhbəri Vidadi Zeynalovun ifşa edilməsi, o cümlədən həbsi skandal doğurdu. Amma bu hadisələr heç də birqütblü olmadı.

Ardınca MTN və Rabitə sektorunun təlimatlarını yerinə yetirənlər, bu şəbəkəyə xidmət göstərənlər, hər iki nazirin və ətrafının sifarişlərinə boyun əyənlər de-şifrə olundu.

“Gündəm-xəbər”in analitik qrupu ilk gündən bu proseslərin “çox su aparacağı” proqnozlarını verirdi ki, öz təsdiqini tapmaqdadır.

Ölkə mediasının son 15 gündə yaydığı müraciətləri, şikayətləri, sensasiya doğuran xəbərləri ötəri gözdən keçirmək kifayətdir ki, Eldar Mahmudov şəbəkəsinin haralara qədər uzandığını təsbit edə biləsən. Həmin şəbəkənin xidmətləri sırasında daha bir qurumun adı hallanıb.

Söhbət Bakı şəhər Mənzil Kommunal Təsərrüfatı İdarəsinin maliyyə şöbəsində gedən qanunsuzluqlardan gedir.

Bu barədə “Gündəm-xəbər”in əldə etdiyi məlumatda qeyd olunub ki, Rabitə və Yüksək Texnologiyalar Nazirliyinin (RYTN) Aparat rəhbəri, həbs olunan Vidadi Zeynalov dayaqlarının möhkəm olduğu dövrlərdə yaxın adamı olan Rəfail Mehralıyevi Bakı şəhər Mənzil Kommunal Təsərrüfatı İdarəsinin maliyyə şöbəsinə rəhbər qoymağa nail olub.

V.Zeynalovun həbsi R.Mehralıyevun vəzifədə qalması üçün sürüşkən bir periodun yaranması ilə nəticələnib. Mehralıyev işini itirəcəyi ilə bağlı əndişələnib.

Məlumatlarda qeyd edilir ki, V.Zeynalov nazirlikdəki vəzifəsində Bakı Mənzil Kommunal Təsərrüfat Sisteminə nəzarət etmək ssəlahiyyətinə qeyri-rəsmi yiyələnib. Qohumunun şöbə müdiri təyin etdirməsi onun mövqelərini möhkəmləndirib.

90-cı illərin ortalarından bu vaxtadək V.Zeynalov bu sahəyə ayrılan büdcə vəsaitlərinin xərclənməsinə qeyri-rəsmi olaraq nəzarət edib. Məhz qohumunun bilavasitə iştirakı ilə Bakının mənzil kommunal təsərrüfat sahəsi birbaşa V.Zeynalovun müəyyən etdiyi qaydalara uyğunlaşdırılıb.

Onun Maliyyə Nazirliyinin Kollegiyasının qərarı ilə işdən qovulmasının əsas səbəblərindən biri də elə Bakı şəhəri mənzil kommunal təsərrüfatı sahəsinə ayrılan büdcə vəsaitlərinin istifadə olunmasında yol verilən ciddi pozuntular olub.

Çox keçmir ki, Rəfail Mehralıyev Bakı şəhər Mənzil Kommunal Təsərrüfatı Departamentinə rəis təyin edilir. Təbii ki, Zeynalovun çətiri altında bu istək reallaşıb.

Mənzil Kommunal Təsərrüfatı İdarəsinin fəaliyyət dairəsi kifayət qədər genişdir. Bura yol çəkilişi, məktəb və uşaq baxçaları, eləcə də digər sosial obyektlərin tikintisi və təmiri daxildir.

Ümumiyyətlə, mənzil kommunal təsərrüfatı sahəsinə büdcədən kifayət qədər böyük həcmdə vəsait ayrılır və Vidadi Zeynalov da Rabitə Nazirliyində MKT-a ayrılan pulların idarə olunmasında birbaşa iştirak edib.

Odur ki, hüquq-mühafizə orqanlarının Bakı şəhər Mənzil Kommunal Təsərrüfatı Departamentinin rəisi Rəfael Mehralıyevin də fəaliyyətini araşdırmasına ciddi zərurət var.

V.Zeynalovun həbsindən sonra R.Mehralıyev dayaqlarını itirib və onunla birlikdə həyata keçirilən maliyyə maxinasiyalarının hüquq-mühafizə orqanları tərəfindən nəzarətə götürüləcəyindən narahatdır.

Mehralıyev özünü gedən proseslərdə günahkar bilmir və təlimat yerinə yetirdiyini yaxın ətrafına bəyan edir. Amma son hadisələrlə bağlı yoxlamalar içərisində dosyedə Mehralıyevin də işi keçir. Onunla bağlı yekun nə qərar veriləcəyi sual altındadır.

Vidadi Zeynalov məhz Əli Abbasov tərəfindən nazirliyə gətirilib. Bundan əvvəl isə, o, İqtisad Universitetində prorektor vəzifəsində çalışıb.

V.Zeynalov 1995-1999-cu illər ərzində Bakı şəhər Maliyyə İdarəsinin rəisi vəzifəsində çalışıb. Lakin işdə yol verdiyi ciddi nöqsanlara görə Maliyyə Nazirliyinin Kollegiyasının qərarı ilə işdən qovulub.

Bir müddət sonra isə V.Zeynalov gözlənilmədən Azərbaycan Dövlət İqtisad Universitetində prorektor vəzifəsinə təyin olunub. O zaman Universitetə Əli Abbasov rəhbərlik edib və o, nazir postuna təyin olunandan sonra V.Zeynalovu nazirlikdə yüksək vəzifəyə təyin edib.

Qeyd edək ki, MTN işi ilə əlaqədar həbs olunan Rabitə və Yüksək Texnologiyalar Nazirliyinın Aparat rəhbəri Vidadi Zeynalovla bağlı maraqlı bir çox faktlar yayılıb.

Həbs olunana qədər faktiki olaraq nazirlikdə qeyri-rəsmi əsas söz sahibinə çevrilmiş və nazirliyin “qara qutusu” adını daşıyan Vidadi Zeynalovun bütün adamlarının nəzarətə götürüldüyü bildirilir. Vidadi Zeynalov bu illər ərzində vəzifə səlahiyyətlərindən sui-istifadə edərək özünün var dövlətini artırıb. Vidadi Zeynalov Goranboy rayonunda “Gülüstan”, İsmayıllı rayonunda isə “Çaynik” adlı istirahət mərkəzləri tikdirib.

Goranboy rayonundakı “Gülüstan” istirahət mərkəzinə Vidadi Zeynalovun yaxın qohumu və həmkəndlisi, Yevlax rayon Kövər kənd icra nümayəndəsi Oqtay Məmmədov nəzarət etdiyi bildirilir. Bundan başqa Vidadi Zeynalovun Bakı şəhəri Qaraçuxur qəsəbəsində dəyəri milyonlarla ölçülən villası, Quba rayon Qəçrəş kəndində isə dəbdəbəli imarəti var. Rabitə və Yüksək Texnologiyalar Nazirliyinin Aparat rəhbərinin Türkiyə, Gürcüstan və Yunanıstanda da mənzilləri mövcud olduğu da iddia edilir. Onun rayonlardakı bütün qovşaq rəislərindən hər ay “aylıq” aldığı və regionlarda qovşaqlara fiber kabel çəkilişləri köçürülən yüz min manatlarla vəsaitlərdən də özünə

faiz götürdüyü də iddia olunur. Vidadi Zeynalov köhnə ATS-lərin sökülməsi zamanı da milyonlarla dollar mənimsəyib. O da bildirilir ki, Vidadi Zeynalov Kürdəmirin icra başçısı Ceyhun Cəfərovla yeznə-qayındır və aparat rəhbərinin icra başçısı ilə ortaq biznesinin olduğu da iddia olunur. Bu biznes isə Bakıda fəaliyyət göstərən taksi şirkətlərinə avtomobillərin icarəyə verilməsidir.

Nazirliyin aparat rəhbəri qayni ilə birgə qurduğu yeni biznes çərçivəsində ölkəyə 50 yaxın bahalı avtomobil gətirdərək taksi xidməti ilə məşğul olan şirkətə icarəyə verib.

Həmin avtomobillərin hər birinə görə V.Zeynalovun adamları gündəlik olaraq 25 manat toplayırlar. Bu isə V.Zeynalova hər ay 40 min manata yaxın qazanc gətirib. Məlumatda iddia edilir ki, aparat rəhbəri ilə icra başçısı həmin maşınların alınması üçün 1,3 milyon manata yaxın xərc çəkiblər.

O da qeyd olunur ki, Vidadi Zeynalovun həbsi Rabitə və Yüksək Texnologiyalar Nazirliyi içərisində geniş təmizləmələrə səbəb olacaq. Belə ki, illərdən bəri V.Zeynalovun himayəsində nazirlikdə “at oynadanlar”ın sonu çatıb.

Onlardan birinin də Sumqayıt Telekommunikasiya Qovşağının rəisi Akif Əsgərov olduğu da bildirilir. Qeyd olunur ki, V.Zeynalovun himayəsində “qaz vurub, qazan dolduran” A.Əsgərov son əməliyyatla 300 min manat əldə edib. Xüsusilə, “Bakı Telefon Rabitəsi” İstehsalat Birliyinin baş direktoru Beytulla Hüseynovun işdən azad olunması mətbuatın uzun müddətdir yazdıqlarının təsdiqi idi.

“Bakı Telefon Rabitəsi” İstehsalat Birliyinin baş direktoru Beytulla Hüseynov və “Aztelekom” İstehsalat Birliyinin baş direktoru Məhəmməd Məmmədov arasında kəskin mübarizə gedirdi.

“Aztelekom”la BTRİB-in birləşməsi ideyası ortaya çıxandan sonra tərəflərin savaşı daha da şiddətləndi. Hər iki şəxs birləşəcək vahid quruma rəhbərlik etmək niyyətində idilər və bütün imkanlarını səfərbər etmişdilər.

Amma reallıq ondan ibarət idi ki, M.Məmmədovla B.Hüseynov hakimiyyətdəki iki ayrı qrupların maraqlarına xidmət edirdilər. İndi hər iki rəhbər həbsdədir.

Azərbaycanın dövlətçilik və ölkə rəhbərliyinin iqtisadi siyasətinə zərbə vuran yüksək rütbəli bu məmurların ifşası prezidentin növbəti dəfə qanunsuzluğa yol verən vəzifəlilərə sərt şəkildə cavabı oldu.

Bu kuryoz və sensasiya doğuran hadisələrin içərisində isə MTN rəhbərliyinə yaxın və onun çevrəsində dövlətə qarşı cinayətlərə yol verən məmurların əməlləri rəsmi şəkildə isbat olundu.

Xatırladaq ki, Səbayel Rayon Məhkəməsinin qərarı ilə V. Zeynalov barəsində 3 ay müddətinə həbs qətimkan tədbiri seçilib. V. Zeynalovun vəzifəsindən azad olunması barədə də artıq əmr imzalanıb. Qeyd edək ki, V. Zeynalovun həbsinin sabiq milli təhlükəsizlik naziri Eldar Mahmudovun yaxın qohumu, Bakı Telefon Rabitəsi İstehsalat Birliyinin rəhbəri Beytulla Hüseynovun fəaliyyəti ilə əlaqəli olduğu bildirilir. B. Hüseynov da işdən çıxarılaraq, barəsində 3 aylıq həbs qətimkan tədbiri seçilib.Bir müddət əvvəl V. Zeynalovun saxlanılması barədə məlumatlar yayılıb. RYTN-də çalışan daha bir neçə yüksək vəzifəli şəxsin saxlanılması barədə də məlumatlar var.

Rafiq Qara

gundemxeber.az