1 həftə sonra Eldar Mahmudovun tutduğu postdan çıxarılmasının 2 ayı tamam olur. Barəsində həbslə əlaqəli olamyan qətimkan tədbiri seçilən sabiq nazir bu müddət ərzində ürək krizi keçirib. Onu MTN-in Bilgəhdəki sanatoriyasında saxlayırlar. Eldar Mahmudovu istintaqda ifadə verə bilməsi üçün müalicəyə götürüblər. Bu müddət ərzində onun çetesinə daxil olan əlaltılarının sahibkarları talan etməsi haqda ən müxtəlif səpkili məlumatlar yayılıb. Redaksiyamıza daxil olan son məlumatlarda “mahmudovçu”ların hədəfinə gəlmiş iş adamlarının müəyyən olunması qaydası haqda ilginc məlumatlar yer alıb.



Qaynağımız bildirib ki, “mahmudovçu”lara sahibkarları “ov”lamaqda Vergilər Nazirliyində çalışan yüksək vəzifə daşıyan şəxslər dəstək verib. Onlardan biri, Vergilər Nazirliyinin idarə rəisi, 3-cü dərəcəli dövlət dövlət ədliyyə müşaviri Vidadi Məmmədov bir qədər əvvəl vəzifədən çıxarılaraq “MTN işi” ilə bağlı Baş Porokurorluğun başladığı istintaqa cəlb edilib. Qeyd edək ki, V.Məmmədov bu ilin avqust ayında Vergilər Nazirliyində geniş səlahiyyətlər verilmiş cinayət xarakterli vergi hüquqpozmalarının təhlili və vergi borclarının alınması işinin təşkili baş idarəsinə rəis təyin edilmişdi.
Redaksiyamıza daxil olmuş iddiaya görə, o da MTN-in təlimatları əsasında iş adamlarını soyurmuş. V.Məmmədov iş adamlarını öz otağına çağıraraq istədiyi rüşvəti ala bilmədiyinə görə qoluna qandal da vurdura bilirmiş.V.Məmədovun rəhbərlik etdiyi yeni idarə ödənilməmiş vergilərin, faizlərin, maliyyə sanksiyalarının və inzibati cərimələrin, borcluların əmlakına həbs qoyulmaq kimi geniş səlahiyyətlərə sahib olub.

Vergi Auditi Departamentinin sabiq rəhbəri MTN-nin idarə rəisləri ilə sıx əlaqədə olub



Qaynağımız deyib ki, Vergilər Nazirliyində yüksək post tutan, vaxtilə Vergilər Nazirliyi yanında Vergi Auditi Departamentinin rəisi vəzifəsində çalışmış Habil Məmmədovun da (Bu ilin əvvəlində Vergilər Nazirliyi yanında Bakı Vergilər Departamentinin rəisi, sonra isə Ərazi Vergi orqanları ilə iş üzrə Baş İdarənin rəisi vəzifəsinə keçirilib- Az.Politika.info) MTN-dəki İdarə rəisləri ilə, xüsusilə Transmilli Mütəşəkkil Cinayətkarlığa Qarşı Mübarizə Baş İdarəsinin rəis müavini Füzuli Əliyevlə sıx əlaqəsi olub. F.Əliyev istədiyi vaxt H.Məmmədovun rəisi olduğu Vergi Auditi Departamentinə heç bir maneə olmadan daxil ola bilirmiş. Belə bir toxunulmamazlıq bu günün özündə belə Vergilər Nazirliyinin rəhbərliyinə daxil olan şəxslərə şamil olunur.
Maraqlıdır ki, F.Əliyevin H.Məmmədovla sıx əlaqədə olduğu günlərdə iri sahibkarlar MTN-in Transmilli Mütəşəkkil Cinayətkarlığa Qarşı Mübarizə Baş İdarəsinə çağırılıb, orada var-dövlətləri, milyonları əllərindən alınıb.

H.Məmmədovun kolleqası Vidadi Məmmədov “MTN işi” üzrə istintaqa cəlb olunanda belə xəbərlər vardı ki, o, sahibkarlar haqda məlumatları “mahmudovçu”lara ötürüb.

Bu baxımdan Vergilər Nazirliyi yanında Vergi Auditi Departamentinin rəisi postu çox əhəmiyyətli post hesab olunur. Bu post konfidensial məlumatlara çatımlılıq baxımından V.Məmmədovun tutduğu postdan daha əhəmiyyətli olub. Belə konfedensial məlumatlara Vergilər Nazirliyində çox məhdud sayda vəzifə daşıyıcısına tanış olma hüququ tanınıb. Həmin məlumatlar sahibkarların aylıq, illik dövriyəsi, bank hesablarındakı vəziyyəti də əhatə edib. F.Əliyevlə H.Məmmədovun xarici ölkələrə birgə səfərləri, xüsusən Dubay və İtaliyaya tez-tez baş çəkmələri haqda da məlumatlar var. Belə ehtimallar var ki, onların bu ölkələrdə mülkləri, biznesləri də var.

F.Əliyev və onun rəisi olmuş general Sübahir Qurbanov iş adamlarına qarşı həyata keçirilən qanunsuzluqlarla bağlı bu gün həbsdədirlər. Habil Məmmədovun “MTN işi” üzrə dindirilib-dindirilməməsi haqda məlumat yoxdur.

General Hilal Əsədovun işdən çıxarılması xəbəri yayıldı



Dekabrın 9-da milli təhlükəsizlik nazirinin müavini, general-leytenant Hilal Əsədovun vəzifəsindən azad edilməsi ilə bağlı növbəti dəfə xəbər yayılıb. MTN-də gedən həbslər ərəfəsində onun vəzifəsindən azad olunması ilə bağlı yayılan xəbərlər təkzib olunurdu. Medianews.az-ın yaydığı məlumatda isə bildirilir ki, H.Əsədov artıq vəzifəsindən kənarlaşdırılıb.
MTN-in İctimaiyyətlə Əlaqələr Mərkəzindən bildiriblər ki, H.Əsədovun işdən çıxarılması haqda onlarda məlumat yoxdur.

Eldar Mahmudovun “baş torbatikən”i MTN-dən qovuldu…



MTN-in İstintaq Baş İdarəsinin mühüm işlər üzrə müstəntiqi, adı bir çox qalmqallı, səsli-küylü cinayət işlərində hallanan Elşən Murtuzov işindən kənarlaşdırılıb. Moderator.az-ın yaydığı məlumata görə Elşən Murtuzov MTN-nin keçmiş rəhbərliyinin sifarişli və qondarma cinayət işlərinin istintaqını aparıb, rəhbərliyin etibarlı adamı hesab olunduğundan təqsirləndirilən şəxslərə uydurma ittihamları quraşdırmaqda pərgar olub. Qısaca onu bildirmək yerinə düşər ki, tanınmış jurnalist Pərviz Həşimlinin istintaqını da Elşən Murtuzov apararaq ona qarşı ağılagəlməz ittihamlar uydurmaqla dilə-dişə düşmüşdü.
Bu günlərdə isə intihar etmiş MTN polkovniki Malik Mustafayevin qardaşı Mətləb Mustafayevin mətbuatda tükürpədici videomüraciəti yayılmışdı və bəlli olmuşdu ki, müəmmalı şəkildə intihar edən mərhum polkovnikin də cinayət işini Elşən Murtuzov aparıbmış. Mərhumun qardaşı da müstəntiq haqqında kəskin ittihamlarla çıxış etmiş, nazirliyin yeni rəhbərliyindən onunla bağlı ciddi ölçü götürülməsi istənilmişdi…
Sayt yazır ki, Elşən Murtuzovun işdən qovulmasında qondarma ittihamlar “boğçası” əsas rol oynayıb və o köhnə komandanın “baş torbatikən”lərindən biri olduğundan onun məsələsinə baxılıb.
Amma ola bilsin ki, bu hələ son deyil və tezliklə E. Murtuzov da Bakı İstintaq Təcridaxanasındakı “komanda yoldaşları”nın sırasına qatılsın…

Elşən Murtuzov Pərviz Həşimlinin işində keçən silahı…

“Yeni Müsavat” qəzetində də E.Murtuzovun “qəhrəmanlıq”ları haqda yazılar dərc olunub. Bu il noyabrın 1-də qəzetimizdə dərc olunan “MTN-də sahibkardan bir keçiyə görə 500 min dollar alıblar” sərlövhəli yazıda sahibkarlar Əhməd Mirzəyev və Zaur Əliyevin qanusnuz olaraq həbs olunmalarından sonhbət açılırdı.
“Məndən bir keçiyə görə 500 min dollar aldılar. Yazdılar ki, guya keçi və qanadlı qoyun fiqurları qədimi əntiq əşyadır, ölkəyə qaçaqmalçılıq yolu ilə keçirmişəm. Halbuki mən ölkədən çıxmamışdım, sərhəd aşmamışdım” –deyə sahibkar Ə.Mirzəyev bildirmişdi. Demişdi ki, ona müstəntiq Elşən Murtuzovun otağında ona qardaşına məktub yazdırıblar. Həmin məktubla o, qardaşından yarım milyon dollar istəyib.
E.Murtuzovun digər bir “qəhrəmanlığı” da jurnalist Pərviz Həşimlinin işində baş verib. Jurnalistin üstünə silah qoyan E.Murtuzov həmin silahın vaxtilə MTN-də araşdırılmış, sənədlər üzərində MTN-də “veşdok” kimi saxlanılmasına əhəmiyyət belə verməyib. Bu gün də bu məsələ açıq qalır. Jurnalist həbsdə, onun üzərinə silah qoymuş, sahibkarlara qan udurmuş, əmlaklarının talanmasında iştirak etmiş şəxs isə azadlıqda gəzir. (musavat.com)