Bu gün Sofiya şəhərində (Bolqarıstan) Azərbaycanın "Şahdəniz" yatağının ikinci mərhələsi çərçivəsində hasil olunacaq təbii qazın Avropaya nəqli çərçivəsində Bolqarıstana qaz almaq imkanı verən, Yunanıstan və Bolqarıstanın qaz sistemlərini birləşdirən qaz xəttinin (İnterconnector Greece-Bulgaria - İGB) tikintisi üzrə yekun investisiya sazişi imzalanıb.

Sazişi Bolqarıstanın EAD Enerji Holdinqi və Yunanıstanın "Poseidon S.A" investisiya şirkəti imzalayıb.

Bolqarıstanın energetika naziri Temenuzka Petkova imzalanma mərasimindən sonra qeyd edib ki, bu sazişlə təkcə Bolqarıstan və Yunanıstan üçün deyil, bütün Cənubi Avropa üçün strateji əhəmiyyət daşıyan bir layihənin həyata keçirilməsinə başlanılır.

Qeyd edək ki, bu layihə Azərbaycan qazının Avropa bazarına çıxarılmasını nəzərdə tutan Cənub Qaz Dəhlizinin komponentidir. Trans-Adriatik boru kəməri (TAP) ilə Avropaya nəql olunacaq Azərbaycan qazının bir hissəsi IGB kəməri ilə Bolqarıstana çatdırılacaq.

Xatırladaq ki, 180 km uzunluğu olan IGB Bolqarıstan-Yunanıstan birgə müəssisəsi (EAD - 50%, "Poseidon S.A" - 50%) tərəfindən inşa olunacaq. "Poseidon S.A."da Yunanıstanın DEPA şirkəti 25%, İtaliyanın "Edison" şirkəti isə 25% paya malikdir.

İllik ötürücülük qabilliyəti 3 mlrd. kubmetr nəzərdə tutulan kəmərin 2016-cı ilin oktyabr ayında inşasına başlanılması planlaşdırılır. IGB kəmərinin tikintisinə dair investisiya razılaşmasının imzalanması bu il iki dəfə təxirə salınıb.


Bu gün Yunanıstan və Bolqarıstan arasında iki ölkənin qaz kəmərləri sistemini birləşdirən kəmərin tikintisinə dair investisiya razılaşması imzalanacaq.

Bu barədə Bolqarıstan KİV-lərinə istinadən xəbər verir.

Yunanıstan-Bolqarıstan interkonnektor qaz kəmərinin (İGB) tikintisinə dair investisiya razılaşmasının imzalanması bu il ərzində iki dəfə təxirə salınıb. Sonuncu dəfə sənədin imzalanması iyun ayına planlaşdırılmışdı, lakin Yunanıstan tərəfi ölkədəki siyasi vəziyyəti əsas gətirərək razılaşmanın təxirə salınmasını istəyib.

İGB layihəsi Azərbaycan qazının Avropa bazarlarına çıxarılmasını nəzərdə tutan Cənub Qaz Dəhlizinin mühüm komponentidir. Azərbaycan qazı Yunanıstanın Türkiyə ilə sərhədindən TAP kəmərinə vurulacaq, oradan qazın bir hissəsi İGB kəməri ilə Bolqarıstana çatdırılacaq.

Gələcəkdə Bolqarıstan üzərindən Azərbaycan qazının digər bəzi Avropa ölkələrinə də nəqli planlaşdırılır. İGB kəməri ilə ildə 3-5 milyard kubmetr qazın nəqli nəzərdə tutulur.

İnvestisiya razılaşmasına Yunanıstan və Bolqarıstanın energetika nazirləri imza atacaqlar. Bolqarıstanın baş naziri Boyko Borisov da mərasimdə iştirak edəcək.

İGB kəmərinə dair investisiya razılaşmasının imzalanması üçün ABŞ Yunanıstan hökumətinə xeyli təzyiq göstərib.