Necə əsəbləşməyəsən? Düşünəcəksiniz yəqin ki, iqtisadiyyatı pərişan durumda olmasına, neft gəlirlərinin yoxa çıxmasına baxmayaraq gedib Suriyada bombalara pul xərcləyən və dinc sakinləri öldürən Rusiya yönəticilərinə acığım tutub. Və yaxud bütün Yaxın Şərqi qan gölünə çevirəndən sonra birdən-birə Azərbaycan adlı bir dövlətin varlığını yadına salıb orada demokratiya pozulduğuna görə əməlli başlı sanksiya barədə qərar layihəsi hazırlayan ABŞ Konqresmenlərinə qəzəblənmişəm.
Əsla. Bunlar yanlış da olsa dövlət siyasətləridir və yenə də nəyisə tərsinə-düzünə izah edə bilərlər. Ancaq izah olunmayan bir qərar var ki, bu da dünyanın ən zəngin (söhbət ağıldan getmir) dövlət başçısı sayılan Bruney sultanının İslama uyğun gəlmədiyinə görə Yeni ili qadağan etməsi barədə qərarıdır. Buna yəqin ki, xeyli ölkələrdə, o cümlədən də Azərbaycanda da "bukvayed" müsəlmanların xeyli hissəsi ürəkdən sevinmişlər. İndi acizanə şəkildə Alihəzrət Sultandan soruşaq istəyirəm ki, İslama uyğun gəlmədiyi dəqiqdir, ancaq həmin ölkədə yaşayan hansısa İnsana uyğun gələn bir bayramdırsa, bunu niyə qadağan edirsən? İslam adı gələndə niyə digər insanların gözünə, ağlına dərhal qadağa sözü gəlməlidir? Yəni zorla niyə inancın üstünlüyünü qəbul etdirməyə çalışırsınız? Mən bir vətəndaş olaraq yeni ili bayram olaraq qeyd etmirəm, sədəcə təqvim dəyişməsi kimi nəzərə alıram. Ancaq yüz minlərlə insan bunu bayram olaraq görürsə və bu bayram insanlarda hansısa qeyri-humanist əhval yaratmırsa, bundan niyə rahatsız olmalıyıq? İranda zorla çadraya keçdilər, sonu nə oldu? Dünyada pedofilliyin və fahişəliyin ən çox yayıldığı ölkə kimi tanınmırmı? Yaxud İŞİD-çilər İslamın namus qaydalarının mühafizəçisi kimi çıxış edib yüzlərlə qadına təcavüz faktlarını ortaya qoymadılarmı? Əfqanıstanda Talibanın əsas gəlirinin xaş-xaş plantasiyalarından olduğunu bilmirsinizmi? İslamı əsrlərdir bir gözəl əxlaq dini kimi yaşamaqdan zövq almayan mazoxistlər, onu qadağa, zorakılıq, basqı dini kimi insanların yaddaşında yerləşdirməyə çalışırlar. Ona görə də dərininə getsək, anlamalıyıq ki, bizim problemimiz nə Rusiya ilədir, nə də ABŞ-la. Onlarla küsüşüb-barışıb, yenə də dil tapacağıq. Ən çətini Bruney Sultanını başa salmaqdır. Bu arada xəbər oxudum ki, Liberiya da özünü İslam dövləti elan edib. İndi bunlara da anlatmalıyıq ki, elə ədalətlə idarə edilən dövlət həm də İslam dövləti deməkdir. Harada zülm varsa, adını min dəfə İslam çağır, orada Hz. Məhəmmədin (S.Ə.S.) ruhundan əsər əlamət-olmayacaq. Orada da dövlətin başında yoxsul prezident durur. Bu zəngin Sultan, o yoxsul Prezident! Zəngini də, yoxsulu da eyni ağılda olan İslam dünyası hələ də niyə qan gölünün içində üzdüyünün əsil səbəbini duymaq, eşitmək istəmir.

Fazil Mustafa, millət vəkili