“Məni atamın siyasi fəaliyyətinə görə ittiham edirlər”

Hüquq müdafiəçisinin oğlu yenidən məhkəmə önünə çıxdı

Milli Şuranın Koordinasiya Mərkəzinin üzvü, hüquq müdafiəçisi Oqtay Gülalıyevin övladı Əlgüşad Gülalıyevin məhkum edilməsinə dair Bakı Apelliyasiya Məhkəməsinin qərarından verilmiş kassasiya şikayətinə Ali Məhkəmədə baxılıb. Hakim İmran Hacıqayıbovun sədrliyi ilə keçirilən məhkəmə prosesində şikayətçi və onun nümayəndəsi əvvəlki məhkəmələrdə olduğu kimi bu dəfə də iştirak etməyib.

Məhkəmə prosesində çıxış edən Əlgüşad Gülalıyev bildirib ki, ona qarşı irəli sürülən ittihamlar qurama və əsassızdır; “Məni 3 il bundan qabaq orta məktəbdə tanımadığım bir şəxslə dalaşmaqda ittiham edirlər. Mən nəyə görə tanımadığım şəxslə dalaşmalıyam. Əgər o həqiqətən şikayətçidirsə niyə ötən müddət ərzində keçirilmiş 10- dan yuxarı məhkəmə prosesində gəlib iştirak edib şikayətini bildirməyib? İş materiallarına daxil edilmiş video diskə dəfələrlə vəsatət versək də nə Xətai rayon məhkəməsində, nə də Apelliyasiya məhkəməsində baxış keçirilməyib. Şahidlərin birinci instansiya məhkəməsində ibtidai istintaqda mənim əleyhimə polisin təzyiqi altında verdikləri ifadədən imtina edərək belə bir hadisənin olmadığını, mənim kiminləsə dalaşmadığımı bildirməsi niyə araşdırılmır? Əksinə Apelliyasiya məhkəməsi öz yanlış qərarını onunla əsaslandırır ki, guya həmin şahidlər mənim sinif yoldaşım olduqları və məni müdafiə etmək istədikləri üçün belə ifadə veriblər. Bu da yanlış və səhv yanaşmadır. Çünki mən şahidlərin əksərini tanımıram və onlar mənim sinif yoldaşım deyillər. Məni atamın siyasi fəaliyyətinə görə ittiham edirlər. Mənim haqqımda açılmış qondarma cinayət işinə xitam verilməsini və haqqımda bəraət hökmünün çıxarımasını istəyirəm”

Məhkəmədə Əlgüşad Gülalıyev vəkilsiz iştirak etdiyinə görə atası, onun qanuni nümayəndəsi Oqtay Gülalıyevin çıxış etməsinə hakim icazə verməyib.

Məhkəmədə dövlət ittihamçısı çıxış edərək ittihamı müdafiə edib, Bakı Apelliyasiya Məhkəməsinin qərarının qüvvədə saxlanmasını xahiş edib.

Yerində müşavirə keçirən məhkəmə kollegiyası müdafiə tərəfinin kassasiya şikayətini rədd edib, Bakı Apelliyasiya Məhkəməsinin qərarını qüvvədə saxlayıb.

Bununla da Əlgüşad Gülalıyevlə bağlı Bakı şəhər Baş Polis İdarəsinin Ağır Cinayətlər şöbəsi tərəfindən başlanmış cinayət işi əlaqədar aparılan ölkə daxili məhkəmə prosesləri başa çatıb. Müdafiə tərəfinin Ali Məhkəmənin qərarından Avropa İnsan haqları Məhkəməsinə şikayət edəcəyi bildirilir.

Xatırladaq ki, Əlgüşad Gülalıyev Xətai Rayon Məhkəməsinin 30 oktyabr 2014- cü il tarixli hökmü ilə Azərbaycan Respublikası Cinayət Məcəlləsinin 221.1- ci maddəsi ilə ittiham edilərək qazancının 15 (on beş) faizi məbləğində pul dövlət nəfinə tutulmaqla 6 ay müddətinə islah işləri cəzasına məhkum edilib.

Əlgüşad Gülalıyev özü 2013- cü ilin sentybarında yaşadığı NZS qəsəbəsində naməlum şəraitdə döyülərək bıçaqlanıb. İstintaq cinayətkarları tapıb məhkəmə önünə çıxarmaq əvəzinə Ə. Gülalıyevin özünə cinayət işi qaldırıb və onun haqqında təqsirləndirilən şəxs qismində qəti- imkan tədbiri seçilib.

Cinayət İşinin istintaqını Bakı şəhər Baş Polis İdarəsinin İstintaq şöbəsi aparıb. Əlgüşad Gülalıyev Mill Şuranın Koordinasiya Mərkəzinin üzvü, hüquq müdafiəçisi Oqtay Gülalıyevin övladıdır. Atası, keçmiş siyasi məhbus O. Gülalıyev Sabirabad rayon məhkəməsinin 13 iyun 2012- ci il tarixli hökmü ilə polis nəzarətində olmaqla ev dustaqlığına məhkum edilib. Cinayət Məcəlləsinin 220.2- ci maddəsi ilə ittiham olunur, ölkədən çıxışı qadağan olunub.

gundemxeber.az