Elxan Usubov Gürcüstanda özünə biznes qurub

Zəngin tarixə malik olan şəhəri bərbad hala salan məmurun qonşu ölkədə fındıq zavodu tikdirdiyi iddia olunur
Əlverişli coğrafi mövqedə yerləşən Şəki ölkəyə gələn turistlərin daim diqqət mərkəzindədir. Təsadufi deyil ki, rayonun turizm obyektlərindən hər il milyonlarla gəlir əldə olunur. Ona görə də Şəkiyə icra başçısı gələ bilmək üçün bəzi şəxslər can atırlar. Əvvəlki saylarımızda da yazdığımız kimi, Elxan Usubovun idarəçiliyi rayon camaatını qətiyyən qane etmir. İcra hakiminin bir-birini sıralayan qanunsuzluqları artıq şəkililəri təngə gətirib.
Başçı ilə müavin arasındakı mübahisə şiddətlənir
Bu münasibətlə hətta bir neçə gün öncə rayonun Aşağı Daşağıl kəndinin sakinləri Şəki Şəhərİcra Hakimiyyətinin (ŞİH) binası qarşısına toplaşaraq icra başçısının kəndin su və yol problemlərinin həllini tələb ediblər. Sakinlərlə görüşən icra nümayəndəsi problemlərin tezliklə həll olunacağını bildirsə də, heç bir dəyişiklik baş verməyib. Çünki icra başçısı rayon camaatının problemlərini həll etməkdə maraqlı deyil. Şəkidəki mənbəmizin sözlərinə görə, başçının başı şəxsi məsələlərinin həllinə qarışdığı üçün əhalinin problemlərini yaddan çıxarıb. Xatırladaq ki, icra başçısı bu vəzifəyə qədər uzun müddət bizneslə məşğul olub. Daha sonra 2007-2011-ci illərdə Ağstafa rayonuna başçılıq edib. Burda da eynilə Şəkidəki kimi üsuli-idarə qurub. Əldə etdiyimiz ən son məlumatlara görə, Elxan Usubovun xoşagəlməz fəaliyyəti rayonda işləyən digər məmurların da etirazına səbəb olub. Bunlardan biri bu vaxta qədər 5 başçı yola salmış, ŞİH-in sosial-iqtisadi inkişafın təhlili və proqnozlaşdırılması şöbəsinin müdiri Firon Əliyevdir. Hazırda icra başçısı ilə müavini arasında ciddi qarşıdurma yaranıb. Məlumatda bildirilir ki, münaqişəyə səbəb müavinin şəhər bələdiyyəsini ələ keçirmək niyyəti olub. Bunun üçün bələdiyyə sədri Fikrət Cəfərova qarşı təzyiqləri artıran məmurun bələdiyyə sədrliyinə namizədi sinif yoldaşı Gülnaz Salamova olub.
Şəkidə yetişdirilən fındıq və qoz hara daşınır?
Verilən digər məlumatda qeyd olunur ki, “Şəki” oteli, Kiş kəndindəki “Narınqala”, “Şam bağı”, “Cənnət bağı”, Dağüstü park deyilən yerdəki “Panaroma” oteli kimi obyektlərə sahib olan icra hakimi Gürcüstanda da biznes əlaqələri qurub. Təkzibolunmaz mənbənin bildirdiyinə görə, Gürcüstanın dövlət idarələrində çalışan bəzi şəxslərlə münasibət yaradan başçı orda özünə böyük fındıq zavodu tikdirib. Şəkidə yetişdirilən fındıq və qozun böyük hissəsinin məhz Gürcüstandakı zavoda daşındığı deyilir.
Təxmini hesablamalara görə, zavodun illik istehsal gücü 500 min tondan çoxdur. Dövlət büdcəsindən ayrılan vəsaitlər hesabına özünə hər cür şərait yaradan başçı haqqında maraqlı məlumatlardan biri də rayonun turizm obyektləri ilə bağlıdır. Son zamanlar bəzi media orqanlarında yazılanlara görə, Xan Sarayına giriş üçün həm piyadalardan, həm sürücülərdən pul alınır. Halbuki vaxtilə adıçəkilən tarixi məkana giriş pulsuz olub. Şəhər ərazisindəki digər mədəniyyət və turzim məkanlarına da giriş pulludur. İlin istənilən vaxtında bu yerlərə turistlərin gəldiyini nəzərə alsaq, kifayət qədər məbləğ yığılır. Bəs, bu pullar kim (lər)in cibinə gedir? Ən dəhşətlisi odur ki, ŞİH-in büdcəsində xeyli vəsait ola-ola aparılan təmir-tikinti işlərinin pulu yerli sahibkarlardan çıxarılır.
Ağstafadan qalan köhnə vərdişlər…
Qeyd edək ki, bu şəxs Ağstafa rayonuna rəhbərlik etdiyi dövrlərdə də sahibkarları incidib. Belə ki, rayonda inşa edilmiş parkların və istirahət mərkəzlərinin dövlət büdcəsi hesabına inşa edildiyi bildirilib. Lakin sonradan üzə çıxıb ki, əslində, parkın inşası və abadlaşdırma işləri üçün ayrılan dövlət pullarının heç də hamısı bu istiqamətdə xərclənməyib. Əksinə, Ağstafanın daha da gözəl görünməsi və abadlaşdırılması üçün Rusiyada yaşayan imkanlı rayon sakinləri maliyyə yardımları edirlər. Görülən işləri isə başçı öz adına çıxarıb. İndi həmin proses Şəkidə təkrarlanır.
Sahibkarlara azad fəaliyyət göstərməyə imkan verməyən məmur onlardan hər ay nəysə alır. Mənbəmizin sözlərindən məlum olur ki, Elxan Usubov Şəkinin ən məşhur istirahət zonalarından olan “Marxal” istirahət mərkəzinin sahibinə də göz verib işıq vermir. Buna səbəb onun adıçəkilən istirahət obyektini öz əlinə keçirmək istəməsidir. İcra hakimi obyektin sahibi Tehran Lətifova bir neçə dəfə təzyiq göstərib, amma “Marxal”ı özəlləşdirən şəxs sona qədər mübarizə aparıb. Gələn saylarımızda Şəkinin səhiyyə, təhsil və mədəniyyət sahəsindəki problemlər, milyonluq yeyinti faktları, bu işlərdə icra başçısının rolu, habelə şəhər rəhbərinin Bakıdakı biznesi və digər maraqlı məlumatlar barədə xəbər verəcəyik. Sonda onu qeyd edək ki, icra başçısı belə özbaşına əməlləri ilə vəzifəsini ciddi təhlükə qarşısında qoyub. Nazirlər Kabinetindəki mənbələrin açıqladığı məlumata görə, vəzifədən çıxarılacağı gözlənilən şəxslər arasında Elxan Usubovun adı ilk sıralardadır.

Kamil