Alman mütəfəkkiri Höte deyib: "İfadənin etibarlı olması natiqin düşüncəsinə necə qanadlar taxırsa, musiqi də duyğunu elə qanadlandırır".

Buna görə də bəstəkarlar hər zaman ruhu oxşayan musiqilər yazmağa çalışırlar. Son dövlər isə yerli müğənnilər mahnıların yaddaqalan olmamasından şikayətlənirlər. Bəs görəsən, bunun günahkarı kimdir? Müğənni bəstəkarı, bəstəkar və sözyazarı, ifaçıları, aranjmançıları günahlandırır.

gundemxeber.az bildirir ki, axşam.az tanınmışlar arasında sorğu apararaq yeni mahnıların tez unudulmasının səbəbini araşdırıb.

Bir çox tanınmış mahnıların bəstəkarı olan Nailə Mirməmmədli ifaçıları zövqsüzlükdə günahlandırıb:

"Bunun tək səbəbi ifaçıların zövqünün aşağı düşməsidir. Mən çox az müğənni ilə işləyirəm. Gözləyirəm, qalanlarının zövqü düzəlsin. Eşitdiyim çox mahnıları qarışdırıram. Çünki bir-birinə çox bənzəyir, sözləri təkrar olur. Yenilik yoxdur. Röya, Niyam Salami, Xuraman Qasımova üçün mahnılar yazmışam. Çalışıram ki, eyni səpkidə bəstələr olmasın. Özüm-özümü təkrarlamağı belə istəmirəm. Başqa bəstəkarlar da bunlara diqqət etsə, mahnılar yaddaqalan və keyfiyyətli olar".

Bəstəkar Gövhər Həsənzadə bunun səbəbini mahnıların keyfiyətsiz olmasında görür. O, müğənnilərin çox pul xərcləmək istəmədiklərini iddia edib:

"Müğənni seçimini özü edir. Eləsini seçsin ki, yaddaqalan olsun. Yazıb-yaradan bəstəkarlarımız çoxdur. Biz mahnı problemi yaşamırıq. Hətta gənc bəstəkarlarımız da yetişir. Bu, maddiyata söykənir. Mahnılar peşəkar, keyfiyyətli hazırlanmır. Peşəkarlarla çalışılsa, daha çox sevilər. Musiqinin hazırlanması da mətbəxdir. Mətbəxdəki usta keyfiyyətli məhsullardan istifadə etsə, yaxşı alınar. Mahnı kim üçün, hansı tərzdə yazılır, tonallıq düzgün seçilməlidir, ifa edəcək müğənninin səsinə uyğun aranjman olunmalıdır. Bizdə bunlara az diqqət edilir. Hər kəs öz işi ilə məşğul olsa, yaxşıdır. Bəlkə də bəstəkar mahnını gözəl yazır, amma dinləyiciyə təqdim olunan versiya o deyil".

Şair Baba Vəziroğlu son dövrlərdə "falş" mahnıların çox olduğunu iddia edib:

"Yaxşı mahnı unudulmur. Mahnı 3 nəfərin - müğənni, bəstəkar və şairin döyünən ürəyidir. "Falş" mahnılar uğurlu alınmaz. İstedad, ali təhsil vacibdir. İndi istedadlılar kənarda qalıb, qeyri-peşəkarlar musiqi bəstələməyə başlayıb. Bu cür mahnılar da təqdim olunur və iki gündən sonra da yaddan çıxır. Bəzən müəllifə elə gəlir ki, mahnısı hitə çevriləcək, amma əksi olur. Bu da bəstənin reseptinə uyğun hazırlanmamasıdır".

Xalq artisti Mübariz Tağıyev bəstəkarların zamanın nəbzini tutmadığını bildirib:

"Zamanın nəbzini tutmaq lazımdır. Xalq musiqisini oxuyanlar şərq aləmindən, estradadakılar isə qərbdən nələrsə axtarır. Peşəkar bəstəkarlar incik gəzirlər ki, bizi dindirən yoxdu, dolanacağımız yoxdur. Əldəqayırma bəstəkarlar dövrün sürür, not bilməyənlər aranjmanla məşğuldur. Əvvəl bir qurum var idi, Cavanşir Quliyev başçılıq edirdi. Həvəskar bəstəkarların mahnılarını gözdən keçirir, düzəlişlər edirdilər. İndi belə hal yoxdur. İndi hamı müasirlik arxasınca qaçır. Bu isə Azərbaycan musiqisinə yamaq kimi görünür. Tofiq Quliyev, Rauf Hacıyev, Emin Sabitoğlu səviyyəsində bəstəkar var? Elə çıxmasın ki, mən köhnə fikirliyəm. Sadəcə, onların mahnıları bu gün yaşayır və müasirdirlər. İndikilərin 3 akkord üstündə qurduğu mahnı nə olacaq? Fırıldaq mahnılar çoxdur. Mənbələrini də bilirik, hansı mahnını götürür, nəyə calayırlar. Bunun çarəsi olmalıdır. Yoxsa musiqimizi itirəcəyik. Yenilikdən geri qaçmaq lazım deyil. Amma neçə ildir, onun arxasınca qaçırıq, tuta bilmirik. Bu, böyük bəladır. Niyə müasir estrada bu gündədir? Niyə biz gedib hansısa əcnəbi bəstəkara "Eurovision" üçün mahnı sifariş veririk? Axı musiqinin ən yaxşısı bizdə olub".

Bəstəkar-müğənni Pərviz Mahmudov isə müğənniləri paxıllıqda günahlandırıb:

"Xoşbəxt müəllifəm ki, 10 ildir mahnılarım səsləndirilir və yadda da qalır. Mən bir neçə müğənniyə "vizit-kart" verdim. Onlardan biri Günay İbrahimli, digəri Sevda Yahyayevadır. Gözəl mahnılarımız yazılır. Amma əksəriyyəti plagiatdır. Öz bəstələrimin oxşarlarını çox eşidirəm. Bu cür mahnı necə yaddaqalan olsun? Əvvəl bir mahnı yazılırdı, onu həm Şövkət Ələkbərova, həm Mirzə Babayev oxuyurdu. İndi isə bir müğənni mahnını oxuyur, deyir, "Məndən başqa heç kim ifa etməsin". Bunun əleyhinəyəm. Bəstələrimin ağası özüməm. Düşünürəm ki, müəllifdən icazə alıb, hamı oxuya bilər. Beləcə, mahnı çox səslənər, yaddaqalan olar. Bu yaxınlarda müğənnilər arasında sorğu keçirilmişdi ki, "2015-ci ilin ən yaddaqalan mahnısı". Hamı bayağı musiqilərin adını çəkdi. Sonra da çıxıb efirdə bayağı mahnıları pisləyirlər".