Qobustan RİH-nin başçısı məhz bu məbləğin müqabilində öz toxunulmazlığını təmin edə bilib

Dünən bizimdovr.az-a daxil olmuş növbəti məlumatda Qobustan RİH-nin başçısı Adil Məmmədovun bir müddət bundan əvvəl keçmiş Milli Təhlükəsizlik naziri Eldar Mahmudovun hədəfinə necə düşdüyü və bu səbəbdən almalı olduğu zərbələrdən necə yayına bildiyinə dair olduqca maraqlı açıqlamalar verilir. Mənbə bildirir ki, həmin dövrdə MTN-nin Qobustan rayon şöbəsinə rəhbərlik etmiş Təhmasib adlı əməkdaşı rayonun Polis Şöbəsinin rəisi Eminağa Zeynalovla kifayət qədər səmimi dostluq əlaqələrində olub. Bu səmimiyyətdən öz məqsədləri üçün yararlanan Təhmasib qısa zaman ərzində, rayonda gedən müəyyən proseslər barədə kifayət qədər ətraflı məlumat toplaya bilib. Nəticədə başçı Adil Məmmədovun müxtəlif idarə, təşkilat və müəssisə rəhbərləri ilə birgə həyata keçirdiyi çeşidli maxinasiyaların təfərrüatlarına dair inkarolunmaz dəlillər əldə olunub. Mənbənin deməyinə görə, məlumatların əldə olunması prosesi müddətində Təhmasib mütəmadi olaraq MTN rəhbərliyinə işin gedişi barədə məruzələr də edib. Öz növbəsində Eldar Mahmudov isə, sonda Adil Məmmədovun vəzifədən kənarlaşdırılacağına və hətta onun yerinə məhz Təhmasibin təklif etdiyi şəxsin təyin olunacağına söz verib. Çox keçmir ki, Təhmasib Adil Məmmədovun yerinə “öz namizədinin” adını da açıqlayır. Bu şəxs Qobustan RİH başçısının Qobustan şəhər inzibati ərazi vahidi üzrə nümayəndəsi Qoşqar Qarayev olur. Lakin başçının dəyişilməsi əməliyyatının uğurla başa çatması üçün müəyyən maliyyə dəstəyi də tələb olunurdu. Bu məqsədlə də Təhmasib elə rayonun özündəcə bir neçə məmuru bu işə cəlb edir. İcra başçısının I müavini Məharət Əkbərov, 8 saylı Qobustan Yol İstismar İdarəsinin müdiri Əlikram Cavadov, Rayon Mərkəzi Xəstəxanasının baş həkimi (keçmiş) Elşən Rəcəbov və əlbəttə ki, bizim köhnə tanışımız, Qobustan şəhər 1 saylı tam orta məktəbin direktoru İmran Sabirov bu qərara gəlirlər ki, Adil Məmmədovun vəzifədən gedişindən sonra öz mövqeylərini itirməmək üçün 600 000 (altı yüz min) manat pul toplayıb versinlər. Təbii ki, həmin məqamda başçının MTN-in “ilgəyinə keçməsi” bu məmurlara da böyük sıxıntılar yaşadacaqdı. Məhz elə buna görə də, onlar öz səxavətlərini nümayiş etdirmək məcburiyyətində idilər. Açıqlamaya görə, yalnız Əlikram Cavadovun həmin vaxt nəğd pulla müəyyən sıxıntıları olur ki, o da öz payına düşən məbləğin əvəzinə 300 baş qoyun verməklə vəziyyətdən çıxır. Amma necə olursa, MTN-nin hazırladığı və yerli məmurların dəstək verdikləri bu “gizli əməliyyat”ın üstü vaxtından bir qədər əvvəl açılır. Təbii ki, məsələdən xəbər tutan Adil Məmmədov da əks-tədbirlər planı işləyib hazırlayır. Qısası, Eldar Mahmudova çatmalı olan məbləği Adil Məmmədov özü verir. Əvəzində isə, Təhmasibin də işdən çıxarılması bir şərt kimi irəli sürülür. Məlumata görə, tərəflər tam razılığa gəlirlər və Təhmasib işdən azad edilir. Təbii ki, Qoşqar Qarayev də işdən çıxarılır. Elşən Rəcəbov isə, fəaliyyətində aşkar edilmiş korrupsiya faktlarına görə həbs olunur. Amma digərləri hələ ki, öz yerlərində qalmaqdadırlar. Mənbə bildirir ki, Əlikram Cavadov yaşına görə, İmran Sabirov başçı haqqında bir çox kompramatlara sahib olduğuna görə, Məharət Əkbərov isə, RİH-nin bütün işini apardığına görə öz vəzifələrində qala bilirlər. Mahmudova verilmiş 600 000 manatı isə, “sui-qəsd”çilər başçıya tamamən ödəməli olurlar. Əlikram Cavadov da 300 baş qoyunla cərimələnir.
Həmçinin mənbə belə bir maraqlı məqama da diqqəti cəlb edir ki, Adil Məmmədovun Prezident Administrasiyasında işləyən oğlu Fuad Məmmədovla, keçmiş MTN generalı Akif Çovdarovun Milli Məclisdə işləyən oğlunun dostluq münasibətləri olub. Elə bu dostluq zəminində də, bir neçə il bundan əvvəl Fuad Məmmədovun törətdiyi və ölümlə nəticələnmiş yol-nəqliyyat qəzası ətrafında açılmış cinayət işinin “bağlanmasını” məhz Akif Çovdarov təmin edib.

Materialda adı keçən bütün tərəflərin mövqeyini işıqlandıra bilərik.