ƏBƏDİ YAŞAR ÜMUMMİLİ LİDERİMİZİN 132 YAŞI TAMAM OLUR

Qarşıdan 31 yanvar gəlir. Amma əksər insanlarımız üçün bu adicə yanvar ayının son günü kimi bilinir.

Misktika, ekstrasens, falçı və bu qəbildən olan inanclı insanlar deyə bilərlər ki, həmin gün böyük münəccim Vanqanın doğum günüdür. Bəli onlar haqlıdırlar, lakin Azərbaycan türkləri və bütöv Azərbaycan üçün təqvimdəki bu gün yalnız sıradan bir gün və millətimizə aidiyyatı olmayan Vanqanın doğum günü kimi bilinməməlidir.

Çünki həmin gündə Azərbaycanın böyük oğlu, yazıçı-publisist , istedadlı jurnalist ( məhz İranda müasir jurnalistikanın əsasını o qoyub), marifçi, milli-azadlıq hərəkatımızın öncüsü, mühacirətdəki istiqlaliyyət davamızın lideri, görkəmli dövlət və ictimai xadim, Azərbaycan Xalq Cümhuriyyətinin banisi və qısa olaraq çağdaş tariximizin namizədsiz, ən görkəmli şəxsiyyəti və əbədi yaşar ümummilli lideri olan Məmməd Əmin Rəsulzadənin doğum günüdür.

Çox təəsüflər olsun ki, başda vətəndaşlarımız sonra isə dövlət dahi öndərimizin doğum gününə təhqir edici şəkildə laqeyd yanaşır. Nə üçün ilk olaraq günahı vətəndaşlarda görürəm...? Ona görə ki, öz tarixi şəxsiyyətinin adını qaldırmaq və ya onu alçaltmaq yalnız millətə məxsusdur!

Tarixini və tarixi şəxsiyyətlərini sevən və onunla fəxr edən millət heç bir zaman imkan verməz ki, onun şəxsiyyətlərini kimsə təhqir edə, hətta hökumət olsa belə....

Bu gün tam əminliklə deyə bilərəm ki, əgər yaponların, almanların, şimali koreyalıların, vyetnamlıların, bədnam qonşularımız və milli-irsi düşmənlərimiz olan farsların və haykların ( ermənilərin) M.Ə.Rəsulzadə kimi tarixi şəxsiyyətləri olsa idi, ona nəinki qibtə edə, hətta Tanrı kimi müqəddəsləşdirərdilər.

Nə üçün canından və əzizlərindən çox sevdiyi Azərbaycan və milləti üçün hər şeyi gözə alan, himnimizdə deyildiyi kimi “səndən ötrü can verməyə cümlə qadiriz” və “səndən ötrü qan tökməyə cümlə qadiriz” ifadələrini əməlləri ilə həyata keçirən Rəsulzadə kimi bir dahinin ad günü dövlət və beynəlxalq səviyyədə qeyd edilmir...?!

Məgər biz türklər bu qədərmi milli kimliyimizi itirmişik...?

Bu gün millətimizin bu laqeydliyi ucbatından milli mənsubiyyədindən bixəbər olan, ulitarist düşüncəli, başda Naqif Həmzəyev kimi “millət vəkilləri” və ona havadarlıq edən hökumətin yüksək vəzifəli “şəxslərinin” böyük əbədi yaşar ümummili liderimiz Rəsulzadə haqqında söylədikləri təhqirəramiz ifadələrin vüsət almağına gətirib çıxarıb. Görünür Naqif Həmzəyev düşüncəsində olan “şəxslər” nəinki Rəsulzadəni heç, Azərbaycan Respublikasının hal-hazırki Prezidenti İlham Əliyevə belə hörmət etmir. Məhz İ.Əliyevin 22 noyabr 2013-cü ildə Rəsulzadənin 130 illik yubileyinin keçirilməsi haqqında sərəncam imzalayıb. Həmin sərəncamda deyilir:

2014-cü ilin yanvar ayında Azərbaycan Xalq Cümhuriyyətinin banilərindən biri, Azərbaycan Milli Şurasının sədri Məhəmməd Əmin Rəsulzadənin anadan olmasının 130 illiyi tamam olur.

Xalqımızın müstəqillik idealarının gerçəkləşdirilməsində, Azərbaycanın tarixi dövlətçilik ənənələri zəminində milli dövlət quruluşunun dirçəldilməsində, milli istiqlal ideyalarının geniş yayılmasında böyük xidmətlər göstərmiş və siyasi publisistikası ilə ədəbi-ictimai fikir tariximizə layiqli töhfələr vermiş görkəmli ictimai-siyasi xadim Məhəmməd Əmin Rəsulzadənin 130 illik yubileyinin keçirilməsini təmin etmək məqsədilə, Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram: 1. Azərbaycan Respublikasının Mədəniyyət və Turizm Nazirliyi Azərbaycan Milli Elmlər Akademiyası, Azərbaycan Respublikasının Təhsil Nazirliyi və digər aidiyyəti qurumlarla birlikdə Məhəmməd Əmin Rəsulzadənin 130 illik yubileyinə həsr olunmuş tədbirlər planını hazırlayıb həyata keçirsin. 2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

Gördüyünüz kimi çox gecdə........ olsa ölkə başçısı belə Rəsulzadənin necə böyük dahi şəxsiyyət olduğunu qeyd edir!

Bütün bu dediklərimə baxmayaraq inanıram ki, yaxın gələcəkdə türk millətim uzun sürən trans vəziyətindən çıxıb, sarsılmaz polad iradə və dirəniş göstərərək əbədi yaşar ümummili liderimiz Rəsulzadənin Ankaradakı cənazəsini canından çox sevdiyi Vətəninə gətirilərəq dəfn ediləcək və qəbri üzərində böyük bir abidə və ya sərdabə ucaldılacaq, necə ki, 1840-cı ildə Müqəddəs Yelena adasından dahi Napaleon Bonopartın cənazəsi gətirildə və təmtəraqla Parisdə torpağa tapşırıldı. Eləcə də, bu dahi əbədi yaşar ümummili liderimizin doğum günü ən yüksək səviyyəli ümumxalq bayram kimi, anım günü ( 6 mart) isə ümumxalq matəmi kimi qeyd ediləcək.

Qarşıdan gələn 31 yanvar ulu öndərimiz Rəsulzadənin ad günü münasibəti ilə onun yeganə varisi – nəvəsi olan Rəis Rəsulzadəni bu münasibətlə səmimiqəlbdən təbrik edir və onun sevincinə şərik oluram.

Dünya dövr etdikcə, Azərbaycan türkləri yaşadıqca və Azərbaycan var olduqca M.Ə.Rəsulzadənin adı da var olacaq, ruhuda yaşayacaq!

Bir milliyətçi kimi əbədi yaşar əbədi yaşar ümummili öndərimizin ruhu qarşısında göz yaşları ilə baş əyirəm!!!

Yaşasın türk millətim

Var olsun bütöv Azərbaycan!

Abdulla İsmayıloğlu