Bu gün ADP İdarə Heyətinin növbəti toplantısı keçirilib. Toplantıda ölkədə və beynəlxalq aləmdə baş verən ictimai-siyasi proseslər əsas müzakirə obyekti olub. Toplantı iştirakçıları ilk növbədə ölkədə yaranan sosial-iqtisadi böhrana və hakimiyyətin böhrandan çıxmaq üçün səsləndirdiyi bəyanatlara, yeni iş yerləri ilə bağlı gerçəkliyi əks etdirməyən yaydığı məlumatlara münasibət bildirib. Qeyd edilib ki, hakimiyyətin həyata keçirdiyi antiböhran tədbirləri kampaniya xarakteri daşıyır və icra başçılarının işsizliyin ləğvi ilə bağlı hesabatları real gerçəklikdən uzaq formal məlumatlardır. Partiya rəsmiləri hakimiyyəti antiböhran vəziyyətindən çıxmaq üçün bu cür formal xarakterli statistik məlumatlar yayıb əsas hədəfdən yayınmaq əvəzinə işsizliyin aradan qaldırılmasına zəmin yaradan yeni istehsal sahələrinin yaradılması istiqamətində ciddi addımlar atmağa çağırıb.

İdarə Heyəti ikinci devalvasiyadan sonra vətəndaşların banklardan götürdüyü kreditlərin yeni məzənnəyə uyğun ödənişlər etməsi ilə bağlı yaranmış vəziyyətdən narahat olduğunu bildirib və bu faktın vətəndaşların qanunla müdafiə olunan maraqlarının pozulması kimi dəyərləndirib. Partiya yetkililəri hakimiyyəti pul-kredit siyasətində dəyişiklilər etməyə, kredit faizlərini azaltmağa, kreditlərin ödəmə müddətini uzatmağa, Rusiya, Qırğızıstan və digər devalvasiya yaşanan ölkələrin təcrübəsinə əsaslanaraq vətəndaşlara kreditlərin ödənilməsi üçün yardımlar etməyə çağırıb.

İdarə Heyəti BVF-nun Nigeriya və Azərbaycana kreditlər ayrılması ilə bağlı məsələyə münasibət bildirib və qeyd edib ki, korrupsioner rejimin və saxta parlamentin mövcud olduğu bir şəraitdə Azərbaycana kreditlərin ayrılması həmin vəsaitlərin ayrı-ayrı korrupsioner şəxslər tərəfindən mənimsənilməsinə xidmət edəcək və bunun məsuliyyəti Azərbaycan xalqının deyil, kreditorların öz üzərinə düşəcək.

İdarə Heyəti son vaxtlar Azərbaycanda intihar hallarının artmasından ciddi narahat olduğunu bildirib və bu psixoloji vəziyyətin yaranmasının arxasında hakimiyyətin yanlış sosial-iqtisadi siyasətinin, ölkədə tüğyan edən böhranın, kütləvi işsizliyin, sosial ədalət prinsipinin pozulmasının, milli gəlirlərin qeyri-bərabər bölünməsinin durduğunu qeyd edib və hakimiyyəti əhalinin sosial vəziyyətinin yaxşılaşdırılması istiqamətində təcili addımlar atmağa, psixoloji sağlamlaşdırıcı tədbirlər həyata keçirməyə çağırıb.

İdarə Heyəti ATƏT-in Minsk qrupu həmsədrlərinin regiona səfərinə münasibət bildirib və bu qurumun artıq problemin çözülməsi ilə bağlı üzərinə götürdüyü missiyanı layiqincə yerinə yetirə bilmədiyini, həmsədrlərin keçirdiyi görüşlərin yalnız protokol xarakteri daşıdığını diqqətə çəkib. Qeyd edilib ki, məhz həmsədrlərin tutduğu qərəzli mövqenin, eləcə də hakimiyyətin uzun illərdən bəri davam edən uğursuz tarazlaşdırma siyasətinin nəticəsi olaraq Dağlıq Qarabağ ərazisi işğala məruz qalmaqdan ilhaq mərhələsinə daxil olub və problemin dinc siyasi həlli yolları getdikcə dalana dirənib. Partiya yetkililəri hakmiyyəti tarazlıq siyasətindən geri durmağa, ATƏT-in Minsk qrupunun formatının dəyişdirilməsi üçün ciddi səylər göstərməyə, beynəlxalq diplomatik üsullardan yararlanaraq problemin daha optimal yollarını aramağa çağırıb.

İdarə Heyəti son vaxtlar Azərbaycan televiziyasında Rusiya-Türkiyə münasibətləri zəminində millət vəkillərinin iştirak etdiyi debatlarda Rusiya meyilli çıxışların gündəmə gəlməsinədn, bəzi millət vəkillərinin rusyönlü mövqe tutmasından ciddi narahat olduğunu bildirib və parlamentdən qardaş Türkiyənin əleyhinə, Rusiyanın müdafiəsinə yönəlik bu cıxışları dilə gətirən millət vəkillərinin hərəkətlərinə qiymət verməyə çağırıb.

İdarə Heyəti son vaxtlar bir sıra bələdiyyə və dövlət strukturlarında keçirilən audit yoxlamalarında küllü miqdarda yeyintilərin, korrupsiya faktlarının ortaya çıxmasından narahat olduğunu bildirib və bu faktların arxasında yanlış kadr siyasətinin, hakimiyyət bölgüsünə düzgün əməl edilməməsinin, siyasi plürallığın təkpartiyalı mühitlə əvəzlənməsinin, dövlət vəsaitlərinin dağıdılmasına qarşı laqeyd münasibətin durduğunu qeyd edib və hüquq-mühafizə orqanlarını ortaya çıxan korrupsiya faktlarını şəffaflıqla araşdırmağa, xalqa ətraflı məlumat verməyə çağırıb.