Vəkillər Yalçın İmanova qarşı təzyiqləri təsadüfi saymırlar

Vidadi Mirkamal: «Cəmiyyətdə olan naqislikləri tənqid edən şəxslərə qarşı hakimiyyətin repressiya aparatı həmişə işə salınır»

Qurban Məmmədov: «Hakimiyyət vəkillik institutdan gələ biləcək təhlükənin qarşısını almaq üçün tədbirlər görür»

Azərbaycanda tanınmış vəkillərdən olan Yalçın Imanovun hüquqlarını müdafiə etdiyi şəxsə görə prinsipiallıq göstərməsi ona qarşı təzyiqləri artırıb. Fevralın 12-də Nərimanov Rayon Məhkəməsində AXCP sədrinin müşaviri Məmməd Ibrahimin müdafiəçisi qismində çıxış edərkən hakim Turqay Hüseynov onun barəsində inzibati icraat başladılması üçün Vəkillər Kollegiyasına müraciət olunması haqda qərar qəbul edib.

Bu, Yalçın Imanovun vəkillik fəaliyyəti dövründə qarşılaşdığı ilk problem deyil. Üç il əvvəl Bakı Ağır Cinayətlər Məhkəməsinin hakimlər kollegiyası onun barəsində cinayət işi başlanılması ilə bağlı qərar qəbul etmişdi. Ümumiyyətlə, son illərdə vəkillərin, xüsusilə də siyasi motivli işlərdə müdafiəçi qismində iştirak edən şəxslərin müxtəlif təzyiqlərə məruz qalması, üzv olduqları Vəkillər Kollegiyasından uzaqlaşdırılması halları baş verib. Vəkil Yalçın Imanov “Bizim Yol” qəzetinə müsahibəsində baş verənlərə münasibət bildirib. Vurğulayıb ki, prosesdə sadəcə müdafiə tərəfinin verdiyi çoxsaylı vəsatətlərin məhkəmə tərəfindən obyektiv araşdırılmadığını, vəsatətlərə münasibətdə məhkəmənin bütün hallarda dövlət ittihamçısı ilə eyni mövqeyi bölüşməyi və iş üzrə sübutların tərəfsiz, hərtərəfli araşdırılmasına maraq nümayiş etdirməməsi ilə bağlı fikir bildirmişəm: “Həmin çıxışım zamanı tərəfimdən həm etik davranış qaydalarına, həm də qanunvericiliyin tələblərinə riayət olunub. Məhkəməyə qarşı hörmətsizlik ifadə edən hər hansı bir cümləyə, ifadəyə yol verməmişəm. Məhkəmə prosesini izləyən çoxsaylı şəxslər, eyni zamanda təqsirləndirilən şəxslər, dövlət ittihamçısı və məhkəmə heyəti də bunun şahidi olublar. Bildirmişəm ki, vəsatətlərimizə formal yanaşılır, obyektiv araşdırılmır və nəticə etibarilə onların heç biri təmin olunmur”.

Münasibətini öyrəndimiz şəxslər də Y.Imanova qarşı təzyiqləri təsadfi adlandırmayıblar.



Ədliyyə generalı, Milli Şuranın Koordinasiya Mərkəzinin üzvü Vidadi Mirkamal bildirdi ki, cəmiyyətdə olan naqislikləri tənqid edən, ona qarşı mübarizə aparan şəxslərə qarşı hakimiyyətin repressiya aparatı həmişə işə salınır. Vəkillər Kollegiyasının üzvü olan vəkillərə qarşı aparılan təzyiq kampaniyasını hüquqi nihilizm adlandıran V.Mirkamal bildirdi ki, Namizəd Səfərova, Lətifə Əliyevaya, Əlayif Həsənova, Xalid Bağırova qarşı aparılmış kampaniya da bunu bir daha təsdiq edir: “Bu vəkillər prinsipial mövqe göstərdiklərinə görə, ya Vəkillər Kollegiyasından kənarlaşdırılıblar, ya da onların hüquqları məhdudlaşdırılıb. Hazırda bu məsələ yeni davam edir. Hakimiyyət yenə də repressiya aparatını işə salıb. Yalçın Imanov mənim ən yaxşı tələbələrimdən biri olub. Vəkillər Kollegiyasında az belə vəkil var. Çox təəssüf ki, rüşvətxorların, korrupsionerlərin hüquqlarını müdafiə edən şəxslərə qarşı belə bir repressiya yoxdur. Amma cəmiyyətdə haqsızlığa qarşı mübarizə aparan insanların nəinki özünə, həmçinin onların hüquqlarını müdafiə edən şəxslərə qarşı da repressiya həyata keçirilir. Nərimanov məhkəməsində hakim Turqay Hüseynov Yalçın Imanov qarşısında hüquqi cəhətdən aciz qaldı. Yalçın Imanov sübut etdi ki, Məmməd Ibrahim cinayətin subyekti yox, əslində zərərçəkəndir. Belə bir vəziyyətdə Vəkillər Kollegiyasına müraciət edilir. Kollegiya rəhbərliyi repressiya aparatının bir hissəsidir. Təəssüf ki, Azərbaycanda vəkillər institutunu bu vəziyyətə qoyublar. Vəkillər nəinki müdafiə etdiyi şəxslərin, heç öz hüquqlarını belə müdafiə edə bilmirlər”.



Milli Şuranın Koordinasiya Mərkəzinin üzvü, hüquq müdafiəçisi Qurban Məmmədov bildirdi ki, vəkilik institutu məhkəmə sisteminin, polisin, prokurorluğun normal fəliyyət göstərməsi üçün çox vacib olan bir elementdir. Q.Məmmədov hesab edir ki, ona görə hakimiyyət gələcəkdə bu istiqamətdə problemlərlə üzləşməmək üçün vəkilliyi “əl vəkilliyinə” çevirmək istəyir: “Insanlara qarşı yol verilən hüquq pozuntularını dünyaya çatdıran vəkillərə qarşı təzyiqləri artırırlar. Yalçın Imanova da qarşı atılan addım müstəqil vəkillərə qarşı vaxtı ilə başladılan prosesin davamıdır. Imtahanı keçməyimə baxmayaraq məni hələ də Vəkillər Kollegiyasına üzv qəbul etmirlər. Hakimiyyət hər ehtimala qarşı vəkilik institutdan gələ biləcək təhlükənin qarşısını almaq üçün tədbirlər görür”.

Xəyal