Dünən millət vəkili hörmətli Fazil Mustafa öz feysbuk səhifəsində

Tərtər rayonuna səfəri ilə bağlı yazıb: “Bu gün Tərtərə dostum Zülfüqar bəyin qızının vəfatı ilə əlaqədar ailəsinə baş çəkməyə getmişdim. Şəhərin içindəki mərkəzi küçələrin vəziyyəti məni dəhşətə gətirdi. Ötən il də eyni mənzərə idi”.
Millət vəkili bildirir ki, hər yer qazıq-qazıq, yağış yağanda camaat nə zülüm çəkir, təsəvvür etmək mümkündür: "Ötən dəfə Avropa Şurasında ermənilərin Sərsəng su anbarı vasitəsi ilə törədə biləcəyi ekoloji təhlükə ilə bağlı ciddi bir sənəd qəbul etmişdik. Bu gün Tərtərdə olanda əmin oldum ki, Sərsəng su anbarından daha böyük təhlükə bu rayonun icra başçısıdır. Şəhər əməlli-başlı xarabazara çevrilib və bu səviyyədə biganəliyi heç bir rayonda müşahidə etmədim".
Deputatın fikrincə, yeni icra başçısı pis əməllərinə görə əvvəlki icra başçısına rəhmət oxutdurur: “Xüsusilə də, sərhəddə yerləşən və ermənilərə sona qədər dirəniş göstərən, bu gün də bütün sıxıntılara rəğmən doğma ocağında yaşamağa davam edən bu fədakar Tərtər camaatının ümumiyyətlə icra başçısı sarıdan bəxti heç gətirməyib. Yeni təyin olunan da pis əməlləri ilə özündən əvvəlkinə rəhmət oxutdurur. Məncə, ermənilərlə təmas xəttində olan rayonlarımızda icra başçısının doğru seçilməsi, bu bölgələrimizin həm də təhlükəsizliyinin təminatıdır”.
Biz millət vəkilinin fikirlərinə şərik olmaqla yanaşı qeyd etmək istəyirik ki, icra başçılarının təyin olunma mexanizmi xeyli qüsurludur.
Daxil olan məlumata görə, Tərtərin icra başçısı Müstəqim Məmmədovu bu vəzifəyə Gəncəniin icra başçısı Elmar Vəliyev “qoydurub”. Ona görə də Tərtərin icra başçısı rayon sakinlərinə deyil, Elmar Vəliyevə “gecə-gündüz” “qulluq” edirlər. Özü də “ailəlikcə”.
Bu qulluğun nə demək olduğunu Gəncə və Tərtər camaatı gözəl bilir.
Düzdür, ölkə başçısı hörmətli İlham Əliyev cənabları dəfələrlə qeyd edib ki, dövlət məmuru xalqın xidmətçisidir. Amma Tərtərin icra başçısı necə xalqa qulluq eləsin..?
Axı, onun özünün də, ailəsinin də “sahibi” Elmar Vəliyevdir. Hətta Elmar Vəliyev lazım gələndə Tərtərin icra başçısını Gəncəyə çağırtırıb onu qapı ağzında saxlayıb ona “əzab” verir. Əslində bir çox rayonlarda vəziyyət belədir. İcra başçılarının başının üstündə “özəl ağa”ları var. Bunu niyə gizlətməliyik..? Şair demişkən, kimi aldadırsan, ay zalım oğlu...?