Fevralın 18-də bir sıra kütləvi informasiya vasitələri Azərbaycan-Rusiya sərhədində sıxlığın yaranması ilə bağlı məlumatlar yayıb.

gundemxeber.az bildirir ki, Dövlət Gömrük Komitəsindən APA-ya verilən məlumata görə, hava şəraitinin kəskin pisləşməsi ilə əlaqədar Rusiyadan Azərbaycana gələn vətəndaşlar ölkəmizlə sərhəddə yerləşən "Novo-Filə-Şirvanovka" gömrük-keçid məntəqəsində yubanıblar və adıçəkilən məntəqədə iş vaxtı bitdiyi üçün vətəndaşlar "Yaraq-Qazmalar-Samur" gömrük-keçid məntəqəsinə yönləndiriliblər.

"Nəticədə "Yaraq-Qazmalar" gömrük-keçid məntəqəsindən keçərək ölkəmizə gələnlərin sayındakı artım Xaçmaz Gömrük İdarəsinin "Samur" gömrük postunda sıxlığın yaranmasına səbəb olub. Azərbaycan gömrük xidməti əməkdaşlarının gördüyü tədbirlər nəticəsində, nizamlı qaydada həyata keçirilən gömrük nəzarətinin, eləcə də tibbi müşahidənin aparılması ilə qısa vaxt ərzində sıxlıq aradan qaldırılıb. Hazırda "Samur" gömrük-keçid məntəqəsi normal rejimdə fəaliyyətini davam etdirir, vətəndaşların və nəqliyyat vasitələrin hərəkətində heç bir sıxlıq müşahidə olunmur", - deyə məlumatda bildirilir.