Bakıda “facebook”a giriş məhdudlaşdırıldı, Rabitə və
İnformasiya Texnologiyaları Nazirliyi isə təkzib edir

“Bakinternet” istifadəçiləri üçün sosial şəbəkələrə giriş məhdudlaşdırılıb. Bu barədə AzNews.az-a məlumat verən paytaxt sakinlərinin sözlərinə görə, “Facebook”, “Youtube” və digər saytlara daxil ola bilmirlər. Bunun ölkədə “Facebook inqilabı” fonunda baş verməsinin təsadüfi olmadığını deyən Biləcəri sakini Muşfiqin dediyinə görə, iki-üç gündür ki, sosial şəbəkələrlə yanaşı, müxalif yönümlü saytlardan da evində istifadə edə bilmir.
Məlumatı dəqiqləşdirmək üçün, “Bakinternet”lə əlaqə saxlasaq da, suallarımızı ölkənin ən böyük provayder şirkətinin məsul şəxslərinə unvanlaya bilmədik. Səbəbi isə çox sadədir: telefon zənglərimizə cavab verən və adını bizə deməyən şirkət əməkdaşı bizi rəhbərliklə calaşdırmadı. Sualımıza cavab olaraq isə yalnız onu bildirdi ki, bununla bağlı onlara hər hansı şikayət gəlməyib. Və şirkət istifadəçiləri üçün belə qadağa da qoymayıb.
Rabitə və İnformasiya Texnologiyaları Nazirliyinin mətbuat xidmətinin rəhbəri Müşfiq Əmirov AzNews.az-a açıqlamasında deyilənlərin doğru olmadığını, nazirlik tərəfindən provayderlərə belə bir göstəriş verilmədiyini dedi: “Özüm “Bakinternet” istifadəçisiyəm. Bu dəqiqə “facebook”a girmişəm. Heç bir problem yoxdur və ola da bilməz. Ölkədə geniş zolaqlı internetin istifadəçilərinin artırılması üçün konkret işlər görülür. Bu istiqamətdə 500 milyon manat vəsait ayrılıb. Bu baxımdan da hansısa saytlara girişin məhdudlaşdırılmasından söhbət gedə bilməz”.