Fevralın 19-da Goranboy rayonunu Rəhimli kənd sakini Rəddin Məmmədov polisə ərizə ilə müraciət edərək yaşadığı evindən 2500 manat dəyərində qızıl-zinət əşyalarının, 40 manat və 45 dollar nəğd pulun oğurlanması barədə məlumat verib. Goranboy Rayon Polis Şöbəsi əməkdaşlarının keçirdikləri əməliyyat-axtarış tədbirləri nəticəsində dəstənin üzvü Şəki şəhər sakini 21 yaşlı Elnur Səmədov saxlanılaraq istintaqa təhvil verilib. Oğurluq hadisəsini törədən dəstənin digər üzvü Goranboy rayon sakini 24 yaşlı Rasim Hüseynov isə polisdən qaçıb. Hazırda onun axtarışları aparılır.

Adim.az Kəpəz TV-yə (Region TV) istinadən xəbər verir ki, polisin araşdırması zamanı məlum olub ki, onlar Şəkidə və Goranboyda 15-ə yaxın evdən oğurluq ediblər.

Elçin Əzizov - Goranboy RPŞ-nin İstintaq bölməsinin rəisi: "Şübhəli şəxs qismində saxlanılan Elnur Səmədovun ətrafında aparılan əməliyyat tədbirləri zamanı müəyyən edilib ki, həmin şəxslər Goranboy rayon ərazisində bir neçə yaşayış evinə qanunsuz daxil olaraq müxtəlif qızıl-zinət əşyalarının və digər əmlakı gizli yolla talamaqla oğurluq ediblər. Bundan başqa müəyyən edilib ki, Elnur Səmədov yaşadığı Şəki şəhərində də 6 yaşayış evinə qanunsuz daxil olaraq oğurluq hadisəsi törədib".

Əldə etdikləri qızıl-zinət əşyalarını Bakı şəhərində sataraq öz aralarında bölən dəstə üzvüləri pulu kef məclislərinə xərcləyiblər.

Elnur Səmədov - saxlanılan şəxs: "Oğurluqdan payıma o qədər də pul düşməyib, təxminən 800 manat olub. Girdiyimiz yerlərdə çox da dəyərli şeylər olmayıb. Tutduğum əməldən də çox peşmanam, bu vəziyyət kimi xoşuna gələr ki!"

Faktla bağlı Goranboy rayon Polis Şöbəsində Cinayət Məcəlləsinin oğurluq maddəsi ilə cinayət işi açılıb, araşdırma aparılır.