KANAL S (REGİON TV) xəbər verir ki, Şəkidə səhər saatlarından başlıyaraq yağan yağış günortaya yaxın öz şiddətini artırıb. Nəticədə doluya çevrilən leysan bir neçə dəqiqəlik də olsa Şəkini öz cənginə alıb. Dolunun qısa müddətli yağması və xırda olması səbəbindən rayonun infrastrukturuna heç bir ciddi ziyan dəyməyib. Şəki elektrik şəbəkəsindən verilən məlumata görə, 95-ci kvartal adlanan ərazidə elektrik xətti açılıb. Ancaq şəbəkənin növbətçi briqadası həmin əraziyə yollanıb və açılan xətt tez bir zamanda yerinə calanıb. Şəki Regional Hidrometeorologiya Müəssisəsindən verilən məlumata görə, bu cür hava şəraiti martın 8-i günorta saatlarına kimi davam edəcək. Bu müddət ərzində isə rayonda leysan xarakterli yağıntıların olacağı və bəzən də bu yağıntının dolu ilə müşahidə edilə biləcəyi bildirilib. Həmçinin bəzi ərazilərdə yağıntının intensivləşəcəyi, hətta sulu qara çevriləcəyi qeyd edilib. Tempratur isə digər günlərlə nisbətən 7-10 dərəcə aşağı enəcək.

X X X

Bu gün səhər saatlarında Şəki rayonuna dolu yağıb.

"Report" xəbər verir ki, göy gurultusu və şimşək çaxması ilə müşahidə olunan dolu, əsasən şəhər ərazisinə yağıb.
Təqribən iki dəfə fasilə ilə düyü və noxud iriliyində yağan dolu təsərrüfata ziyan vurmayıb.
Şəki Regional Hidrometeorologiya Müəssisəsinin Hidrometeorologiya şöbəsinin rəisi Qüdrət Eminov "Report"a bildirib ki, yaz fəslinə xas olan dolu yağması, əsasən mart ayında görünən hadisədir. Səhərdən etibarən qeyri-sabit keçən hava şəraiti nəticəsinə saat 12:28-dən 12:35-dək düyü iriliyində, ikinci dəfə saat 12:43-dən 12:49-dək noxud iriliyində cəmi 13 dəqiqə müddətində dolu yağıb.
Şöbə müdiri onu da əlavə edib ki, respublikanın şimal-qərb bölgəsində sulu qar və qar yağacağı gözlənilir.