Son günlər adı müğənni Nazəninin əri Məhəbbət Həsənovla məhkəmə çəkişmələrində hallanan ifaçı Təranə Qumralın bu məsələ ilə bağlı sia.az-a müsahibəsini təqdim edirik:

- Məhəbbət Həsənov məlum Bakı Appellyasiya Məhkəməsindən sonra sizə qarşı açıq şəkildə şərəf və ləyaqətinizi təhqir edən fikirlər səsləndirib. Məhz bu məsələ ilə bağlı məhkəməyə müraciət etmək fikriniz varmı?

- Məhəbbət Həsənov mənim şərəf və ləyaqətimi təhqir edə bilməz. Çünki onun mənim haqqımda dediklərini nə eşidirəm, nə də ki əhəmiyyət verirəm. Mənə qarşı səsləndirdiyi bütün fikirlər onun öz ailəsinə aiddir. Kim hansı tərbiyəni, əxlaqı öz ailəsində görürsə, cəmiyyətdə olan digər xanımlara da elə münasibət bəsləyir. Qaldı ki Məhəbbət Həsənovu məhkəməyə verəcəyəm, ya yox, o barədə düşünməmişəm. Vəkilim bu işlərlə məşğuldur. Zamanım yoxdur ki, boş söhbətlərə qızıldan dəyərli vaxtımı xərcləyim. Ondansa ailəmlə, sənətimlə məşğul olaram. Məhkəmələrdə sürünmək ona yaraşır, mənə yox. Mən evimdə xanım-xatun oturmuşam və keçən karvanlara da əhəmiyyət vermirəm. Çünki mən onlar üçün vacib adamam, onlar mənim üçün yox.

- Hüquqda belə bir anlayış var ki, baş verən hadisəyə fərziyələrlə deyil, məntiqlə cavab verilməlidir. Məhkəmədə Məhəbbət Həsənovun qaldırdığı iddia tam fərziyyələrə əsaslanırdı. Buna baxmayaraq, məhkəmənin onun iddiasını qismən də olsa, təmin etməsi sizdə təəccüb yaratmadı?

- Əlbəttə, müəyyən qədər tərəddüd yaratdı. Amma mən Azərbaycan qanunvericiliyinin nə dərəcədə ali olduğunu anlayıram. Özünüz də dediniz ki, fərziyyələr... Çox gözəl. Bu insan yatıb yuxuda gördüyü bir şeyi iddia edir ki, sən etmisən. Mən məşhur simayam. Bizi toylarına dəvət edən, şəkil çəkdirən, çox istəyən o qədər insan var ki... Onlardan bəlkə kimsə mənim adıma İnstaqram səhifə açıb, işlədir, nə isə yazırsa, mən nə edə bilərəm?! Məhəbbət Həsənov özündən bu qədər şübhəli olmasın. Çünki kişi danışdığı, dediyi hər ifadənin arxasında durmağı bacarmalıdır. Hansı kişiyə yaraşar ki, xanımla savaşa çıxsın? Hansı kişi bunu özünə sığışdırar, yaraşdırar axı?! Anlamıram vallah. Biz görmüşük ki, qadın qadınla arasındakı problemi həll edər və ya etməz. Amma indi zəmanə dəyişib, deyəsən. (gülür) Həm də ki mən də bu xalqın balasıyam, qanım da, canım da bu millətdəndir...

- Araşdırmalarımız təsdiq edir ki, siz Azərbaycanın milli ordusunda döyüşərək dünyasını dəyişən şəhidlərdən birinin bacısısınız. Buna baxmayaraq, belə bir ailə üzvünün məhkəməyə verilməsi əxlaqi və milli mənəvi dəyərlərimizə hörmətsizlik kimi qiymətləndirilə bilərmi?

- Mən heç bir yerdə bundan sui-istifadə etməmişəm. Nə efirdə, nə də müsahibələrimdə. Düzdür, soruşanda bir kəlmə qardaşımın ruhu mənə qənim kəsilməsin deyə təsdiq etmişəm, amma bununla reklam olunmamışam. Belə söhbətləri sevmirəm. Qardaşım Firdovsi Məmmədov dörd bacının bir qardaşı idi. O, 1991-ci ildə Milli Ordunun ilk şəhidi olub. O cür Azərbaycan torpaqları uğrunda canından, qanından keçən adamdan danışandan sonra artıq suala və cavaba məncə heç bir ehtiyac yoxdur. Bu, əxlaqi və milli mənəvi dəyərlərimizə hörmətsizlikdir ya yox, onu oxucularınız, seçim etməyi bilən insanlar özləri anlayacaqlar.

- Hər zaman bizi siyasi müxalifət liderləri məhkəməyə verib. Bu dəfə isə kurs dəyişib. Məhəbbət Həsənov sizinlə birgə agentliyimizi yəni, SİA-nı məhkəməyə verib. Sizdə elə faktlar varmı ki, Məhəbbət Həsənovun Azərbaycanda bölgülüyə və parçalamaya meyilli olan müxalifətlə əlaqəsi olsun?

- Bu barədə danışmaq istəmirəm. Sualın cavabı sizə aiddir. Hər zaman sizi müxalif yönlü insanlar məhkəməyə veribsə, məncə, bu dəfə də araşdırın. Axı siz araşdırmağı çox gözəl bacarırsınız?!