Son aylar Azərbaycan kütləvi informasiya vasitələrinin əsas başlıqlarını Ramiz Zeynalov adlı bir vəkilin çıxışları və müsahibələri zəbt edib. Düşünürsünüzsə ki, bu «xalq vəkilinin» səs-küylü çıxışları hansısa məhkəmə işlərinə və hüquqları pozulmuş insanların müdafiəsinə həsr olunub, çox yanılırsınız. Vəkil «həqiqət carçısı» obrazında çıxış edir. Son illər Azərbaycanda tam bir vəkil zümrəsi meydana gəlib və bu zümrənin üzvlərinin başı ictimai fəaliyyətdən açılmır ki, özlərinin əsl peşələrinə — məhkəmə zallarında ixtisaslı hüquqi yardıma vaxt ayıra bilsinlər.
Vəkil peşəsi qədim peşədir. Ramiz Zeynalovun portretini öyrəndikcə, əminliklə demək olar ki, ikinci ən qədim peşədir!
Vəkillər və ölkənin geniş ictimaiyyəti arasında külək dəyirmanları ilə mübarizə aparan Don Kixotu, daha doğrusu, onun silahdaşıyanı Sanço Pansonu xatırladan Ramiz Zeynalov «Terrazini» ləqəbi ilə tanınır.
Yəqin çoxları artıq unudub ki, gənc türkçü və dissident Elçibəyin qızğın tərəfdarı olan, hüquq fakültəsinin məzunu Ramiz Zeynalovun karyerası 80-ci illərin sonlarında — 90-cı illərin əvvəllərində başlayıb. Elə o vaxtdan Bakının birinci vəkillərindən olan Ramiz Zeynalov “Terrazini” ləqəbini daşıyır, başqa sözlə, yalnız bir çox cinayətkarların maraqlarını qorumur, həm də onlarla bir kriminal şəbəkəyə daxil olur. Elə həmin dövrdə sovet televiziyasında «Sprut» adlı İtaliya teleserialı çox böyük populyarlıq qazanmışdı. İtaliya polisinin qorxmaz və cürətli komissarı Katani ilə korrupsiyaya uğramış və cinayətkar vəkil Terrazini rəqabət aparırdı. Bəs nəyə görə bakılılarda Ramiz Zeynalovun surəti kriminal Terrazini ilə analogiya doğurub?
1995-ci ildə hüquq-mühafizə orqanları xüsusi əməliyyat keçirir və vəkil Terrazinini həbs edirlər. Lakin kimsə bir il sonra R.Zeynalova qaçılmaz cəzadan qurtulmağa kömək edir. Azad olduqdan sonra vəkil özünün yeni siyasi baxışlarını bəyan edir. O artıq sabiq baş prokuror Eldar Həsənovun və keçmiş milli təhlükəsizlik naziri Namiq Abbasovun adamıdır.
Ramiz Zeynalov vəkil Terrazini keçmişini unutmaq istəyir və istintaqla əməkdaşlıq edən sovet vəkilləri zümrəsinə daxil olur. Məhz R.Zeynalov vəkil peşəsi üçün utanc yeri sayılan, lakin sonradan ölkənin bir çox vəkillərinin ideologiyasına çevrilmiş istintaqla əməkdaşlıq missiyasının bünövrəsini qoyur. Sanki müdafiə etdiyi adamlara işləyir, əslində isə müştərilərini istintaqa təslim edir. Eyni zamanda, fürsətdən istifadə edərək, müştərisinin işini həll etməyə girişmiş vəkil R.Zeynalova sonuncu əmlakını da qurban verməyə məcbur olan müttəhimləri soyub-talayır.
Daşınmaz əmlakı — mənzil və bağ evlərini, ofis və dəyərli əşyaları R.Zeynalov istintaqla bölüşdürür. Yüzlərlə aldadılmış və atılmış insan Zeynalovun bu missiyasının qurbanına çevrilir. Vəkilin hüquq-mühafizə orqanlarının rəhbərləri ilə yaxınlığını bilərək onunla müqavilə bağlamağa can atan müttəhimlər ağıllarına belə gətirmirlər ki, R.Zeynalov xüsusi əməliyyata — müştərisini son qəpiyinə qədər soymağa hazırlaşır.
Eldar Həsənov və Namiq Abbasov vəzifədən gedənə kimi vəkil bu cür fəaliyyət göstərir. 2002-ci ildə o, arxasını itirir. Elə bu dövrdə ölkədə böyük siyasi dəyişikliklər başlayır. R.Zeynalov anın hökmünü hiss edir — poqonları dəyişmək və müxalifətə keçmək zamanıdır. Ölkədə barıt qoxusu hiss olunur — deyəsən inqilab yaxınlaşır. 2003-cü ildə R.Zeynalov yenidən müxalifət düşərgəsinə keçir və bir neçə il əvvəl hədsiz sitayiş etdiyi hakimiyyətlə mübarizəyə başlayır.

2003-cü il R.Zeynalov müxalifət mitinqlərinin ön sıralarındadır — iqtidarın istefasını və Müsavat partiyasının hakimiyyətə gəlməsini tələb edir. Lakin tezliklə hər şey yenidən dəyişir. Müxalifətin siyasi iflası Ramiz Zeynalovun planlarına dəyişikliklər edir. Və o, yenidən hakimiyyətin tərəfindədir, daha dəqiq desək, istintaqın etimadını qazanmağa çalışır ki, bir daha iblisin vəkili ştatını qazana bilsin. Ramiz Zeynalovun ən səs-küylü işi qəzəbə düçar olmuş oliqarx Hüseyn Abdullayevin müdafiəsidir. 2007-ci ilin yazında həbs olunmuş H.Abdullayev valideynlərinin vəkillə müqavilə bağlamasından cəmi iki həftə sonra R.Zeynalovun xidmətlərindən imtina edir. Bayıl təcridxanasından deputat H.Abdullayev səsi yetdiyi qədər deyir: «O, məni satır».
İstintaqa xidmət edən və öz müştərilərini satan R.Zeynalov güman edir ki, əmlak ələ keçirmək və dələduzluq üçün əlinə yeni fürsət düşüb. Fəqət bu dəfə R.Zeynalova heç kəs kömək etmədi. Və 2009-cu ildə R.Zeynalov dələduzluq maddəsi ilə ittiham olundu və həbs edildi. Yenidən çirkli işlər, yenidən kriminal, yenidən özgə əmlakını ələ keçirtmək cəhdi. R.Zeynalov «Əhmədov və Ko.» şirkətinin səs-küylü işi ilə dələduzluq əlaqələrinə görə ittiham edilir.
İki ildən artıq müddətdə məhbus həyatı yaşamış R.Zeynalov yenidən azadlığa çıxa bilir. Güman edirsinizsə ki, bu dəfə vəkil “Terrazi”ni təmizlənib və özünün çirkin həyatını təmiz ağ vərəqdən başlamaq niyyətindədir, yenə də yanılırsınız. R.Zeynalovun adı inanılmaz dərəcədə çirkin işlərdən sayılan, ictimaiyyəti özünün video-kompromatları ilə şoka salan Beynəlxalq Universitetin keçmiş rektoru Elşad Abdullayevin işində hallanır. Lakin bu dəfə R.Zeynalov çirkab atmaqda ustalaşmış E.Abdullayevə rəqib kimi göstərilir. Bir çirkabı başqa bir çirkabla qarşı-qarşıya qoyurlar. E.Abdullayev məmurları və MTN-in keçmiş rəhbərliyini ifşa edir, R.Zeynalov isə, öz novbəsində, E.Abdullayevin ifşası ilə məşğul olur ki, istintaqın qanadı altında isti yerlərdən birini ələ keçirsin.
Həbsxana və itirilmiş illər çox pul aparıb, müştərilərdən qopardığı bir çox əmlak R.Zeynalovun əlindən çıxıb. Lakin bu dəfə, deyəsən, bir şey alılnmadı. Vəkil Abşeronun ucqarına — Buzovna qəsəbəsinə gedib çıxıb. İndi o, Bakıdakı hansısa qəlyanaltı uğrunda müharibə aparır... Başqa bir şeyi qalmayıb. Yenidən həqiqətə üz tutmaq lazımdır!..