Yaxın günlərdə jurnalist Xədicə İsmayıl, ReAl sədri İlqar Məmmədov və digər vicdan məhbusları sərbəst buraxıla bilər. Bu haqda “Basta”ya diplomatik korpusdan məlumat sızıb.

Məlumatda bildirilir ki, əvvəlcə jurnalist Rauf Mirqədirovun, sonra daha 14 vicdan məhbusunun, bu gün isə İntiqam Əliyevin həbsdən azad edilməsi ölkə başçısı İlham Əliyevin Amerikaya planlaşdırılan səfəri ilə əlaqədardır.

“İlham Əlyevin ABŞ-dakı beynəlxalq konfransda prezident Barak Obama ilə şəxsən görüşməsi planlaşdırılır. Prezident Amerikada ona siyasi məhbuslarla bağlı irad bildirilməsini istəmir. Ona görə, yaxın günlərdə Xədicə İsmayılın, İlqar Məmmədovun və digər vicdan məhbuslarının da sərbəst buraxılması plalnlaşdırılır”, – mənbə deyib.



Bu xəbəri “Basta” üçün şərh edən vəkil Nemət Kərimli isə bildirib ki, əgər ortada siyasi iradə olarsa, vicdan məhbuslarının azad edilməsi üçün hansısa bayrama yaxud əfv fərmanına ehtiyac yoxdur: “Məsələn, İlqar Məmmədovun apelyasiya məhkəməsi qeyri-müəyyən vaxta təxirə salınıb. Appelyasiya Məhkəməsi istənilən gün şikayətə baxıb, onun azad olunması haqqında qərar çıxara bilər. Xədicə İsmayılla bağlı qərar isə Ali Məhkəmədə verilə bilər, çünki onun şikayətinə Ali Məhkəmədə hələ baxılmayıb. Nemət Kərimli qeyd edib ki, siyasi məhbuslar probleminin birdəfəlik həlli ölkəmizin xeyrinə olardı.

“Fərəc Kərimlinin Ali Məhkəməyə şiakyətindən 4 aydan artıq vaxt keçsə də, bu müraciətə qanunsuz olaraq baxılmayıb, məhkəmənin günü hələ təyin olunmayıb. O, Ali Məhkəmənin qərarı ilə azad edilə bilər. Fuad Qəhrəmanlının hələ istintaqı yekunlaşmayıb, onun barəsində həbs qətimkan tədbiri istənilən gün dəyişdirilə bilər. İlkin Rüstəmzadənin, Seymur Həzininin və digər siyasi məhbusların azad olunması üşün də, hər hansı bir hüquqi maneə mövcud deyil”, – Nemət Kərimli deyib.



Mən ilk növbədə həbsxanada olmamalı adamların məhbəsdən buraxılmasına həmişə sevirinəm, amma Azərbaycan həbsxanalarında hələ də çoxsaylı siyasi məhbuslar qalır”. Bu sözləri isə Freedom House təşkilatının sabiq prezidenti və hazırda Con Makkeyn İnstitutunun insan haqları və demokratiya məsələləri üzrə direktoru David Kramer Amerikanın Səsinə bildirib.

“Siyasi məhbuslar Prezident Əliyevin ABŞ Prezidenti Barak Obama ilə görüşünün təşkil edilməsi üçün alver subyekti olmamalıdırlar,” deyən sabiq Freedom House rəhbəri İlham Əliyevin “oval ofisin həndəvərinə buraxılmamasına” və onunla ABŞ lideri arasında təkbətək görüşün olmamasına çağırıb.

Mustafa Hacıbəyli