Group"la bağlı son vaxtlar Azərbaycan mediasında dərc olunan qalmaqallı araşdırmaların ardı kəsilmir.

Xebervar.com saytının verdiyi xəbərə görə, Azərbaycanın dərman və tikinti sektorunda lider mövqedə olan bu şirkətin adı bir sıra müəmmalarda çəkilməyə başlayıb. Bir müddət əvvəl holdinqin inşa etdiyi "Altes Plaza"nın ən hündür mərtəbələrinin Eldar Mahmudovun oğlu Anar Mahmudov tərəfindən şəxsi ofis kimi istifadə edildiyi, ümumi sahəsi 1400 kv.metr olan bu ofisdən birbaşa Eldar Mahmudovun nazir otağına özl telefon xətti çəkildiyi ilə bağlı araşdırma dərc olunmuşdu. Virtualorg.az saytında dərc olunan bu araşdırmada "Altes Group"un Eldar Mahmudov tərəfindən himayə edildiyinə dair açıq-aşkar mətnlə eyham vurulmuşdu.

Araşdırmada deyilirdi:

"Mahmudovun oğlu 2014-cu ilin iyul ayında “Altes Group” tikinti şirkətinin Bakının Yasamal rayonu, İ.Qutqaşınlı küçəsi, 507 ünvanında inşa etdiyi dəbdəbəli “Altes Plaza” biznes mərkəzinin 20, 21, 22 və 23-cü mərtəbələrini bütöv alıb. Müəyyən edilib ki, bu daşınmaz əmlakın ümumi sahəsi 1400 kvadratmetrə yaxındır. Həmin mərtəbələrdə yerləşən mənzillərin alınması üçün 3 milyon 560 min manatdan çox vəsait ödənilib və Anar Mahmudov aldığı mənzilləri ofis kimi istifadə etməyə başlayıb.

Başqa məlumata görə isə, Eldar Mahmudov “Altes Group” şirkətinə şərik olub, yaxud bu şirkətin biznesinə himayəçilik edib. İstisna deyil ki, mənzillər əslində onun oğluna “haqq” olaraq verilib.

Habelə məlum olub ki, 2014-cü ildə Eldar Mahmudov oğlu ilə birbaşa və qorunan rabitə əlaqəsi saxlamaq üçün Anar Mahmudovun “Altes Plaza”da yerləşən kabinetindəki telefonunu MTN-ə məxsus rabitə qovşağı üzərindən nazirliyin xüsusi rabitə kabellərinə qoşdurub. Və Anar Mahmudovun telefonu atasının MTN-dəki birbaşa rabitə pultuna birləşdirilib. Ötən ilin oktyabrında E.Mahmudovun vəzifədən uzaqlaşdırılmasından sonra A.Mahmudovun həmin ofisində də axtarış aparılıb, onun atası ilə birbaşa rabitə saxladığı telefon aşkar edilərək götürülüb və MTN-in rabitə şəbəkəsindən ayrılıb".

Daha sonra Holdinqin qurucusu və rəhbəri Rüstəm Abdullayev Qaynar.info saytına verdiyi açıqlamada Eldar Mahmudovla bağlantılarını inkar etmişdi. Abdullayevin sözlərinə görə, onlar qanuni alqı-satqı həyata keçiriblər. Heç bir şəriklik və ya himayəçilikdən söhbət gedə bilməz.

Lakin həmin yazılar saytımızda da dərc olunduqdan sonra elektron ünvanımıza mövzu ilə bağlı bir çox maraqlı məlumatlar daxil olub. Bu məlumatlarla tanış olduqda, "Altes Group"un keçmiş MTN naziri və onun "çetesi" ilə bağlarının olması daha inandırıcı görünməyə başlayır. Bunun əksini iddia etmək isə, ağlasığmaz olardı.

Belə ki, holdinqin qurulması və çiçəklənməsi məhz Eldar Mahmudovun nazir işlədiyi dövrlərə təsadüf edir. Bu mənada şirkətin tərkibi və tarixinə qısa nəzər yetirmək yerinə düşərdi.

Holdinq Azərbaycanın ən iri əczaçılıq şirkəti olan "Altes Pharm" (keçmiş "NUR Pharm" ) şirkətindən, "Dr.Lemony" - apteklər şəbəkəsindən, "Nur İnşaaat", "Fərid-İnşaat" kimi tikinti şirkətlərindən, "Altes Construction” memarlıq-mühəndislik şirkətindən, Avropa və Asiya istehsalçılarının tikinti maşınqayırma məhsullarının və materiallarının MDB ölkələrində distrübutorluğunu həyata keçirən "Altes Trade” şirkətindən, Azərbaycan bazarında və ölkə sərhədləri xaricində daşınmaz əmlakın satışı və icarəsi üzrə ixtisaslaşan "Altes Property" şirkətindən ibarətdir. Holdinqin əsas layihələri Azərbaycan, Rusiya və Qazaxıstanda gerçəkləşib.

Holdinqin rəhbəri Rüstəm Abdullayevdir və 2010-cu ildən etibarən müxtəlif vasitələrlə şəriklərini sıradan çıxarmağa, onların pay və dividentlərini ələ keçirməyə çalışıb. Hətta şəriklərindən birinin özü və qaynı Asim İsgəndərovun təşkilatçılığı ilə döydürməsi, onun həyatını riskə altında qoyması ilə bağlı faktlar artıq məhkəmə predmetidir. Hadisə ilə bağlı artıq iki nəfər həbs olunsa da, məhz himayəçilərinin dəstəyi ilə əsl təşkilatçı və sifarişçilər hələ də azadlıqdadır. Bu barədə daha ətraflı ötən yazıdan tanış ola bilərsiniz.

İndi isə Rüstəm Abdullayevin və "Altes Group"un keçmiş "MTN bandası" ilə əlaqələrinə dair yeni faktlarla tanış olaq.

Bizi məlumatlandıran mənbə, bildirir ki, "Altes Group"la Eldar Mahmudovun əlaqələri uzun illərə dayanır. Məlumata görə, şirkətin vitse-prezidenti və faktiki idarə edəni Fəqan Şükürov məhz "MTN bandası"nın adamıdır. Belə ki, sabiq MTNn aparatının rəhbəri, hazırda həbsdə olan general Fərhad Vahabov Fəqan Şükürovun həyat yoldaşının əmisidir. İlk vaxtlar Eldar Mahmudovun maraqlarını məhz Fəqan Şükürov birbaşa kurasiya etsə də, 2011-ci ildə Vahabovun dəstəyi ilə holdinqin təsisçisi Rüstəm Abdullayevin də Mahmudovun görüşü baş tutub. Bundan sonra qarşılıqlı əlaqələr daha geniş miqyas almağa başlayıb.

Məhz bu əlaqələrin nəticəsində Rüstəm Abdullayevin qaynı, adı şəriklərin döyülməsində təşkilatçı kimi keçən və "Altes Group"un mühafizə rəisi Asim İsgəndərovun qardaşı Vasif İsgəndərov MTN-in xüsusi təyinatlılarında işə düzəlir. Hazırda da Vasif İsgəndərovun MTN-in bazasında yenidən qurulan DTX-da heç nə olmamış kimi fəaliyyətini davam etdirdiyi və yüksək vəzifələrdən birinə təyinat almağa çalışdığı bildirilir.

Göründüyü kimi, "Altes Group"la Eldar Mahmudov "çetesi"ni bağlayan tellər hədsiz çoxdur. Bu faktlar həm də bəzi məsələlərə aydınlıq gətirmiş olur. Məlum olduğu kimi, şərikləri ilə məhkəmə çəkişmələri nəticəsində məhkəmə "Altes Group"un tikdiyi bina və mənzillərə həbs qoyulub, onların satışı, icarəsi, habelə rəhbəri Rüstəm Abdullayevə şirkət adından hər hansı hərəkət etmək qadağan edilib. 2012-ci ildə verilən məhkəmə qərarı daha sonra 2015-ci ildə Ali Məhkəmənin qərarı ilə təkrar qüvvədə saxlanılıb. Amma bu illər ərzində holdinqin vitse-prezidenti Fəqan Şükürov məhkəmə qarşısında yazılı öhdəlik götürməsinə rəğmən saxta möhürlə əməliyyatlar həyata keçirməkdə davam edir. Holdinqin keçmiş payçılarından olan Fətəli Novruzəliyevə qarşı təşkil olnmuş sui-qəsddə sifarişçi və təşkilatçı kimi adları keçən Rüstəm Abdullayev və Asim İsgəndərov isə hələ də azadlıqladır. Dünənə qədr onları Mahmudov və "şetesi" himayə edirdisə, bu gün bəs kimə arxalanırlar?

Mənbə, holdinqə daxil olan və ölkənin əczaçılıq sahəsində ən böyük oyunçusu hesab edilən "Altes Pharma"nın Azərbaycandakı gizli sexləri, sabiq deputatlardan birinə məxsus olan bank vasitəsi ilə Londona və Avropanın digər ölkələrinə şübhəli pul köçürmələri haqqında da yaxın zamanlarda əlavə məlumatlar verəcəyini vəd edir.

Fikrimizcə, bura qədər ortaya çıxan faktlar da illərdir "Altes Gorup"la bağlı məhkəmə labirintlərində ilişib qalan məsələlərin hərəkətə gəlməsinə, yeni istintaq tədbirlərinin həyata keçirilməsinə bəs edir.

Necə deyərlər, hər kəs əməlinə görə əvvəl-axır qanun qarşısında cavab verməlidir.