Manvel Qriqoryanın ermənilərə təsəllisi

Millətimizə qarşı ermənilərin törətdikləri vəhşiliklərin başında Serj Sarqisyanın, Robert Koçaryanın, Vazgen Sarqisyanın, Arkadi Ter -Tadevosyanın, Manvel Qriqoryanın və başqalarının durmasını yaxşı bilirik. Ermənilər bunları daşnak Andronikin davamçıları sayırlar.

Düşmən ölkənin baş naziri Vazgen Sarqisyan 1999-cu ildə Ermənistanda parlament güllə-boran edilərkən öldürülüb.Vazgeni Ararat rayonunda idman müəllimi işləyəndə görmüşdüm. Oxuduğum Şirazlı kənd orta məktəbinin güclü basketbol komandası var idi. Biz Vazgenin basketbolçularını bir neçə dəfə məğlub etmişdik. Ancaq məğlubiyyəti başa düşən kimi Vazgen aranı qarışdırır, dava salırdı və nəticədə qələbəmizi tanımırdılar. Vazgen Ermənistanda hakimiyyət davasında öldürüldü. Onunla birgə spiker Karen Dəmirçiyan da güllələndi. Bunların məhv edilməsindən sonra Qarabağ qruplaşması hakimiyyəti tam ələ keçirdi.

Arkadi Ter -Tadevosyan Bakı Ali Hərbi Məktəbini bitirib. Şuşanın işğalına görə ona “Arsax qəhrəmanı” ali rütbəsi verilib. Onun bioqrafiyasında bu fakt yer alıb.
Harri Kasparov bizim şahmat məktəbinin yetirməsidir. O, axırıncı kitabında bu məkəb haqqında bir cümlə də yazmayıb.

Aprelin 2-də erməni təcavüzünün qarşısı alınarkən belə bir xəbərə rast gəldim ki, Manvel Qriqoryan könülülləri ilə Dağlıq Qarabağa gəlib. Ancaq nə faydası, artıq ötən əsrin 90-cı illəri deyil ki, hansısa Qriqoryan dəstəsi ilə gəlib haranısa tuta bilsin. İndi müharibənin fəlsəfəsi dəyişib. Bizim ordunun gücü və yetişən hərbçilərimiz buna imkan verməyəcək. Deyəsən ermənilər Manvelin bu hərəkətindən təsəlli tapırlar.

Atəşkəs “Domokl qılıncı” rolunda

Dünyada baş verən hərbi münaqişələrin bir neçəsinin güclü şəxslər vasitəsi ilə yoluna qoyulması halları olub. Hətta Amerika dövlət xadimi Henri Kissincer Vyetnam müharibəsində “atəşkəsin əldə olunmasına görə ”1975-ci ildə Nobel Sülh mükafatına layiq görülüb. Yeri gəlmişkən, Kissencer 25 sentyabr 2007-ci ildə bir neçə istefada olan dövlət katibləri ilə birgə “Erməni soyqırımı”nın qəbul olunmaması üçün Konqresə müraciət edib. Bu fakt onun vicdanlı siyasətçi olmasına sübutdur.

İndi hansı addımı atmaq istəyiriksə bizi atəşkəsi pozmaqda günahlandırırlar. Prosesə Kissincer kimi siyasətçilər və nüfuzli Beynəlxalq Təşkilatlar müdaxilə etməsələr müharibənin uzun müddət davam etməsinə şübhələr artacaq. Atəşkəs obyektiv sülhün əldə olunmasına xidmət etməlidir. Obyektiv sülh isə əldə olunmur.

Prezident İlham Əliyev Təhlükəsizlik Şurasının son iclasında maraqlı bəyanatlarla çıxış etdi. Dövlət başçısı qeyd etdi ki, “biz öz torpağımızda vuruşuruq. Biz Ermənistan torpağını işğal etməmişik. Əgər erməni əsgəri ölmək istəmirsə, Azərbaycan torpağından rədd olsun”.

Mən daşnak Serj Sarqisyanın keçirdiyi təhlükəsizlik Şurasının iclasını da izlədim. İclas iştirakçılarının pis duruma düşdükləri dərhal hiss olunurdu. Sarqisyan ölkəsindəki duruma müharibənin də əlavə olunmasından qorxur. Ermənistanda hakimiyyətdə olan Qarabağ qruplaşmasını daha çox hakimiyyəti qorumaq maraqlandırır. Belə olmasa idi parlament güllə - boran edilməzdi.

Dünya birliyi hələ də Qarabağ haqqında bir mühüm razılaşma əldə edə bilməyib. Kissincerin müəllifi olduğu “Paris razılaşması”na bənzər razılaşma əldə olunmalıdır. O razılaşma əsasında obyektiv sülh əldə olundu.
İndiki durumda BMT-nin icra olunmamış qətnamələri daha çox gündəmə gəlməlidir. Bunların icrası həyata keçirilsə idi ermənilər yerində oturardı.

BMT-nin “vakum”da qalan qətnamələri bu qurumun nüfuzdan düşməsinə gətirib çıxarıb. Ancaq təəssüflər olsun ki, belə nüfuzlu qurumun rəhbərlərini bu məsələ heç maraqlandırmır. Yeri gəlmişkən, AŞPA prezidenti P. Aqramunt “Ermənistanın BMT Təhlükəsizlik Şurasının qətnamələrinə uyğun olaraq qoşunlarını işğal altında olan Azərbaycan torpaqlarından çıxarmalıdır” tipli bəyanat verib.

Son durum onu göstərdi ki, “atəşkəsin” taleyi həll olunmalıdır. Dünyanın aparıcı dövlətlərinin rəhbərləri atəşkəsin pozulması ilə bağlı dərhal narahatçılıqlarını ifadə edirlər. Ancaq sülhün əldə olunmasına, bir dövlətin ərazi bütövlüynün bərpa olunmasına səylər göstərmirlər. “Domokl qılıncı” indi “təhdid”, “təhlükə” mənasında daha çox işlənir. Dünya dövlətləri atəşkəsi başımızın üzərində “Domokl qılıncı”na çeviriblər.
İtkilərimizə baxmayaraq, qələbələr millət kimi bizi daha sıx birləşdirir. Bu, millətimizin potensialıdır.
Erməniləri qorxuya salan da elə budur. Biz onlardan qorxmuruq.
Allah şəhidlərimizə rəhmət eləsin...

P.S. Son məlumata görə Ermənistan silahlı qüvvələrinin işğal olunmuş ərazilərdə fəaliyyət göstərən komanda-qərargah məntəqəsi qoşunlarımızın vurduğu dəqiq cavab atəşi ilə darmadağın edilib. Bildirilir ki, düşmənin çoxlu sayda hərbi qulluqçusu - polkovnik və general rütbəli zabitləri də zərbə nəticəsində məhv edilib. Manvel Qriqoryanın orada olmasından çox sevinərdim.

Etibar Əliyev, fəlsəfə doktoru