Özünü nazrin adamı kimi təqdim edərək həmkəndlisini pulunu mənimsəyən şəxsə cəza verildi

Özünü fövqəladə hallar naziri Kəmaləddin Heydərovun adamı kimi təqdim edərək vətəndaçlara qarşı dələduzluq edən Saatlı rayon sakini, 1969-cu il təvəllüdlü Seymur Əhmədovun cinayət işi üzrə məhkəmə prosesi başa çatıb.

İttihama görə, Seymur Əhmədov 2012-ci ilin iyul ayının ortalarında yaşadığı Saatlı rayonunun Dəllər kəndində həmkəndlisi Sadiq Sadıqovu Azərbaycan Respublikası Fövqəladə Hallar Nazirliyində yaxın adamının olmasına inandırıb. O, Sadiqə Kür və Araz çaylarının daşması ilə əlaqədar su basması nəticəsində qəzalı vəziyyətə düşmüş evinin əvəzinə həmin nazirliyin hesabına yeni ev tikdirəcəyini vəd edib. Seymur Əhmədov Sadiqi aldatma yolu ilə 3000 manat pulunu ələ keçirib.

Seymur Əhmədov Cinayət Məcəlləsinin 178.2.4-cü (xeyli miqdarda ziyan vurmaqla dələduzluq törətmək) maddəsi ilə ittiham edilib. Cinayət işi Saatlı Rayon Məhkəməsində araşdırılıb.

Seymur Əhmədov ona elan olunmuş ittihamla özünü təqsirli bilməyib. O, bildirib ki, Saatlı rayon Nərimankənd kəndində qeydiyyatda olmaqla rayonun Dəllər kəndində yaşayır. Onun sözlərinə görə, Sadiq Sadıqov onun həmkəndlisidir: “2012-ci ilin iyul ayının ortalarında xəstəliyim ilə əlaqədar pula ehtiyacı olub. Bunu üçün Sadiq Sadıqovdan müxtəlif vaxtlarda ümumilikdə 3000 manat borc pul almışam. Maddi imkanım olmadığı üçün həmin pulu Sabiq Sadıqova qaytara bilməmişəm. Buna görə də peşmançılıq çəkirəm və gələcəkdə bir daha belə hərəkətlərə yol verməyəcəyimə söz verirəm”.

Zərərçəkmiş şəxs qismində ifadə verən Sadiq Sadıqovun sözlərinə görə, anası Lumuxanım Sadıqova və bacısı Yaqut Sadıqova ilə birlikdə Saatlı rayonunun Dəllər kəndində yaşayır: “Təqsirləndirilən şəxs Əhmədov Seymur Seyfulla oğlu həmkəndlimdir. 2010-ci ilin may ayında baş vermiş su daşqını ilə əlaqədar evimizin divarı doldurma palçıqdan

olduğu üçün yararsız vəziyyətə düşmüşdü. Həmin daşqından sonra Fövqəladə Hallar Nazirliyinin əməkdaşları tərəfindən komissiya təşkil edilərək su daşqınından zərər çəkmiş evlərə, o cümlədən mənə məxsus həmin evə ardıcıl olaraq üç dəfə baxış keçirilib. Növbə ilə bizim də evinin tikiləcəyini bildirsələr də, yeni ev tikilməyib”.

Zərərçəkmiş bildirib ki, 2012-ci ilin iyul ayında Seymur Əhmədov ilə görüşüb: “Seymur Əhmədov Fövqəladə Hallar Nazirliyində yaxın adamının olmasını və həmin adamın vasitəsi ilə bizə yeni ev tikilməsində köməklik edə biləcəyini bildirdi. Seymur Əhmədov həmçinin bizə yeni ev tikilməsi üçün 3000 manat pul lazım olmasını, lakin həmkəndli olmasını nəzərə alaraq bu işi 2500 manata həll edəcəyini də bildirdi. Bundan bir neçə gün sonra 1000 manat pulu Seymura verdim, 2 günə qalan pulu da verəcəyimi dedim. 2 gündən sonra şəxsi təsərrüfatımda olan 15 baş qoyunu sataraq qalan 1500 manat pulu da Seymur Əhmədova verdim. Həmin vaxt Seymur məni Saatlı rayon Nərimankənd kənd icra nümayəndəsi vəzifəsində işləyən Dadaşov Yusif Balağa oğlunun yaşadığı küçəyə gətirdi. Orada gözləməyimi bildirərək bu barədə danışıqlar aparması üçün Yusiflə görüşməsini dedi. Bir neçə dəqiqədən sonra Seymur yanıma qayıdaraq yaxın günlərdə ev tikiləcəyini bildirdi”.

Sadiq Sadıqov əlavə edib ki, 10 gündən sonra Seymur Əhmədovla əlaqə saxlayıb: “Seymur 2 aydan sonra onlara ev tikiləcəyini dedi və 2 aydan sonra Seymurla yenə də əlaqə saxlaydım. Bu zaman Seymur əlavə olaraq 500 manat da pul istədi. Həmin pulu Seymura verdim. Lakin bizə ev tikilmədi. Bundan bir neçə ay sonra Yusif Dadaşovla görüşdüm. Yusif Seymurun məni aldatmasını və pulunu Seymurdan almağımı dedi. Bundan sonra Seymurun evinə gedərək ondan pulunu tələb etdim. Seymur Yusifin kömək edə bilmədiyini və məndən aldığı pulu başqa şəxsə verdiyini dedi. Həmin vaxtdan xeyli müddət keçsə dəŞ bizə yeni ev tikilməyib. Seymur Əhmədovun məni aldatmasını bilərək bu barədə Saatlı rayon polis şöbəsinə şikayət etdim. Seymur Əhmədov aldadaraq məndən aldığı pulu qaytarmayıb. Bu səbəbdən Seymur Əhmədova qanuni cəza verilməsini xahiş edirəm”.

Cinayət işi üzrə şahid qismində ifadə verən Yusif Dadaşov bildirib ki, Saatlı rayon Nərimankənd kəndində yaşayır: “2000-2012-ci illərdə Saatlı rayon İcra Hakimiyyəti Başçısının Nərimankənd İcra Əərazi Dairəsi üzrə nümayəndəsi vəzifəsində işləmişəm. Sadiq Sadıqov və Seymur Əhmədov mənimlə qonşu kənddə, yəni Dəllər kəndində yaşayırlar. 2010-cu ildə baş vermiş Kür və Araz çaylarındakı su daşqını ilə əlaqədar kəndlərdə olan evlərə ziyan dəyib, həmçinin də Əhmədov Seymur Seyfulla oğlunun evi qəzalı vəziyyətə düşübr. Bir müddət bundan əvvəl Sadiq Sadıqovla görüşdüm. Sadiq Fövqəladə Hallar Nazirliyinin vəsaiti ilə yeni ev tikilməsində köməklik etmək məqsədi ilə Seymur Əhmədova 3000 manat pul verdiyini bildirdi. Sadiq həmçinin Seymurla birlikdə mənim evimə gəlməsini və Seymurun həmin iş üçün pulu verdiyini dedi. Həmin vaxt Seymurun mənə pul vermədiyini və Seymurun aldatdığını Sadiqə bildirdim. Seymurdan pulunu geri almasını dedim”.

Məhkəmənin hökmü ilə Seymur Əhmədov 3 il müddətinə azadlıqdan məhrum edilib. Hökmdən narazı qalan Seymur Əhmədovun vəkili R. Musayev apelyasiya şikayəti verib.

Vəkil qeyd edib ki, Seymur Əhmədovun əməlində Cinayət Məcəlləsinin 178.2.4-cü maddəsində nəzərdə tutulmuş cinayət əməlini törətməsində təqsiri məhkəmə baxışı zamanı sübuta yetirilməyib: “Seymur Əhmədovun məhkəmə baxışında aşkar və təxirə salınmadan Azərbaycan Respublikası adından təqsirsiz elan edərək ona bəraət verilməsini xahiş edirəm”.

Vəkil apellyasiya şikayəti onunla əsaslandırıb ki, Seymur Əhmədov Cinayət Məcəlləsinin 178.2.4-cü maddəsi ilə ona görə təqsirli bilinmişdir ki, güya o, 2012-ci ilin iyul ayının ortalarında yaşadığı Saatlı rayonunun Dəllər kəndində həmkəndlisi Sadıqov Sadiq Əlirza oğlunu Azərbaycan Respublikası Fövqəladə Hallar Nazirliyində yaxın adamının olmasına inandırıb və Kür və Araz çaylarının daşması ilə əlaqədar su basması nəticəsində qəzalı vəziyyətə düşmüş evinin əvəzinə həmin nazirliyin hesabına yeni ev tikdirəcəyini vəd edib, aldatma yolu ilə 3000 manat pulunu ələ keçirərək xeyli miqdarda ziyan vurmaqla dələduzluq

etdib: “Müdafiə tərəfi olaraq Saatlı rayon Məhkəməsinin hökmünü ədalətsiz hesab edirəm. Belə ki, məhkəmə istintaqı zamanı Seeymur Əhmədov ona elan olunmuş ittiham üzrə özünü təqsirli bilməyərək ifadəsində göstərib ki, Sadiq Sadıqovla həmkəndlidir. 2012-ci ilin iyul ayının ortalarında xəstəliyi ilə əlaqədar pula ehtiyacı olduğu üçün Sadiq Sadıqovdan müxtəlif vaxtlarda ümumilikdə 3000 manat borc pul alıb, maddi imkanı olmadığına görə halhazıra kimi həmin pulu qaytara bilməyib. Buna görə də peşmançılıq çəkir. Məhkəmə bu halları nəzərə almadan və Cinayət-Prosessual Məcəlləsinin 21.1, 21.2, 21.3 və 145.3-cü maddələrinin tələblərinə uyğun olaraq Seymur Əhmədovun Cinayət Məcəlləsinin 178.2.4-cü maddəsində nəzərdə tutulmuş cinayət əməlini törətməsinin sübuta yetirilməməsinə baxmayaraq, sonuncu barəsində əsassız ittiham hökmü çıxarıb”.

Vəkilin şikayəti araşdırılması üçün Şirvan Apelyasiya Məhkəməsinə göndərilib. Apelyasiya şikayəti hakim Etibar Camalovun sədrlik etdiyi kollegiyada araşdırılıb.

Prosesdə çıxış edən dövlət ittihamçısı Səyavuş Sadıqov apelyasiya şikayətini qəbul etməyib. O, bildirib ki, Seymur Əhmədovun törətdiyi əməldə cinayət hadisəsinin və cinayət tərkibinin olması, cinayətin onun tərəfindən törədilməsi və təqsirliliyi tam sübuta yetirilib: “Onun əməli Cinayət Məcəlləsinin 178.2.4-cü maddəsi ilə düzgün tövsif edilib, Seymur Əhmədovun qeyd olunan maddə ilə nəzərdə tutulmuş cinayət əməlini törətməsi və həmin əmələ görə təqsirli olması birinci instansiya məhkəmə istintaqında araşdırılmış sübutlarla tam təsdiq olunub. Birinci instansiya məhkəməsi məhkum olunmuş şəxsə cəza təyin edərkən cəzanı yüngülləşdirən halları, törədilmiş cinayətin ictimai təhlükəlilik dərəcəsi və xarakterini nəzərə alaraq, məhkum olunmuş şəxsə qanuni və ədalətli cəza təyin edib. Ona görə də apelyasiya şikayətinin təmin olunmamasını, birinci instansiya məhkəməsinin hökmünün isə dəyişdirilmədən saxlanılmasını xahiş edirəm”.

Məhkəmə kollegiyasının iclasında məhkum olunmuş şəxs Seymur Əhmədov və müdafiəçisi Kənan Əbdürəhmanov apelyasiya şikayətini müdafiə edib, apelyasiya şikayətinin dəlillərinə uyğun çıxış ediblər.

Sonda hakim heyəti apelyasiya şikayəti üzrə qərar açıqlayıb. Qərara görə, apelyasiya şikayəti təmin edilməyib.