ASC sədrinə məxsus «Santral Elektrik LTD» ölkədə elektrik təchizatı ilə bağlı dövlət sifarişlərinin icrasını tam şəkildə öz nəzarətində saxlayır

Qəzetimizin ötən saylarından birində ""Azərişıq” ASC-nin rayonlarda kabelləşdirmə maxinasiyaları” sərlövhəli tənqidi material dərc olunmuşdu. Həmin yazıda, daxil olan məlumatlara istinadən belə bir fikir irəli sürülmüşdü ki, ASC sədri Baba Rzayevin bu işləri həvalə etdiyi MMC-nin rəhbərliyi bu məqsədlər üçün ayrılan vəsaitlərin mənimsənilməsi və fəhlələrin istismarı ilə məşğuldur. Belə ki, aldığımız məlumatlarda "Azərişıq” ASC-nin regionlarda kabelləşdirmə işini həyata keçirən müəssisənin fəaliyyətində ciddi qanun pozuntularının olduğundan bəhs edilirdi. Məlumatı təqdim edən mənbə bildirmişdi ki, bu gün 58 rayonda bu işləri icra edən MMC-nin rəhbəri Toğrul müəllimdir. Faktiki olaraq isə, müəssisənin fəaliyyəti direktorun müavini Musa müəllim tərəfindən idarə olunur. Mənbənin deməyinə görə, bu şəxslərdən heç biri ixtisasca energetik deyil. Buna baxmayaraq, "Azərişıq” ASC-nin sədri cənab Baba Rzayev tərəfindən regionlarda elektrik xətlərinin kabelləşməsi işi nəyə görəsə, məhz bu müəssisəyə həvalə olunub. Açıqlamalarda bildirilmişdi ki, MMC-nin rəhbərləri görülən işlərin gedişində faktiki olaraq fəhlələrin istismarına yol verir. Açıqlamada deyilirdi ki, MMC bazadan alınan mal-materialı ərazi sahə rəislərinin xəbəri belə olmadan, öz mühasibatlığında "silməklə” məşğuldur. Dövlətin bu işlərə ayırdığı milyonlarla vəsaitlər bu yolla Toğrul və Musa tərəfindən mənimsənilir. Ucuz qiymətə yerli topdansatış nöqtələrindən alınan materiallar guya ki, xarici tədarükçülərdən alınmış kimi, ən baha qiymətə "silinir”. Bundan başqa, işlərdə çalışan fəhlələrin heç biri ilə əmək müqaviləsi bağlanmır. Digər tərəfdən isə, yeni əldə etdiyimiz məlumatlarda "Azərişıq” ASC-nin bilavasitə özündə yer almış bəzi neqativ hallardan da bəhs edilir. Bildirilir ki, Baba Rzayev tikinti layihələrini, kadr məsələlərini, avadanlıqların alınmasını Əli müəllimə həvalə edib. Məlumatda deyilir: "2006-2015-ci illər ərzində «Bakıelektrikşəbəkə» ASC-nin İdarə Heyətinin sədri vəzifəsində çalışmış, hazırda isə, «Azərişıq» ASC-nin sədri postunda təmsil olunan Baba Rzayev bu gün ölkənin elektrik təminatını, eləcə də elektrik məhsullarının satışından tutmuş, elektrik təchizatı ilə bağlı dövlət sifarişlərinin icrası tam şəkildə öz nəzarətində saxlayır. Uzun müddətdir ki, fəaliyyət göstərən və artıq inhisarçıya çevrilmiş «Santral Elektrik LTD» şirkətinin səhmlərinin böyük bir hissəsinin «Azərişıq» ASC-nin sədrinə, yerdə qalanının isə, onun həyat yoldaşı Nərminə Həsənovaya məxsus olduğunu vurğulayan məlumatlı şəxsin paylaşdığı informasiyaya görə, Baba Rzayevin sahibi olduğu şirkət, təxminən 13 il bundan əvvəl rəsmi qaydada qeydiyyata alınıb və elə həmin gündən etibarən ölkə ərazisində elektrik məhsullarının satışını inhisara alıb. Baba Rzayev əlaqələrini işə salaraq «Santral Elektrik LTD» şirkətini qısa müddət ərzində monopolist mövqeyə gətirib. Belə ki, fəaliyyətə başladığı ilk illərdə adıçəkilən LTD digər şirkətləri sıxışdırmağa, müxtəlif yollarla onları bazardan çıxarmağa başladı və sonda bu işi tamamlamış oldu. Bu gün artıq sözügedən sahə demək olar ki, tamamilə «Santral Elektrik LTD»nin nəzarətindədir və elə buna görə də şirkət qiymətləri özü istədiyi formada tənzimləyir. Nəzərinizə çatdırım ki, ilk əvvəl şirkətə Baba Rzayevin qardaşı Emin Rzayev rəhbərlik edib. Lakin bir müddət sonra o, qardaşının yerinə qaynı İlham Həsənovu təyin edib. Bundan sonra Baba Rzayev bütün diqqətini biznesinin genişləndirilməsinə yönəldib və bir sıra yollarala baş vurmaqla dövlət sifarişlərinin icrasının «Santral Elektrik LTD»yə həvalə olunmasına nail olub. Bu gün «Azərişıq» ASC-nin əksər sifarişləri məhz «Santral Elektrik LTD» tərəfindən həyata keçirilir. Bu işdə isə, Baba Rzayevə onun «Azərişıq»dakı ən yaxın adamı, sağ əli, etibarlı kadrı hesab olunan Əli müəllim yaxından köməklik göstərir. Belə ki, həmin şəxs elan olunan tenderlərin ASC sədrinin nəzarətində olan şirkətlərə həvalə olunmasına, eyni zamanda ölkə üzrə tikinti layihələri, kadr məsələləri, avadanlıqların alınması, yararsız avadanlıqların isə istifadədən çıxarılması kimi önəmli məsələlərə rəhbərlik edir. Bir sözlə, bu gün «Azərişıq» ASC-də külli ixtiyar sahibinə çevrilib. Maraqlı məqam ondadır ki, büdcədən maliyyələşən sifarişləri həyata keçirən «Göknur Bakı LTD», «GBS» MMC şirkətləri də «Santral Elektrik LTD» ilə təkcə eyni ünvanı bölüşmür. Bu şirkətlərin təsisçi və rəhbərləri də Baba Rzayevin ən yaxın adamlarıdır...”

Materialda adı keçən bütün tərəflərin məsələyə münasibətini öyrənməkdə maraqlıyıq.