Hörmətli Mədət müəllim! Siz ilk fəaliyyətinizi Gəncə şəhərindən başlamısınız. Hansı vəzifəni daşımağınızdan asılı olmayaraq, həmişə xalqın hörmət və rəğbətini qazanmısınız. Buna səbəb, Sizin Azərbaycan dövlətinə, milli dövlətçiliyimizə, ölkə rəhbərinə sadiq olmağınızdır. Sizin yeni vəzifəyə təyinatınız elan olunanda bütün Gəncə əhli sevindi, çünki bütün gəncəlilər Sizinlə fəxr edir. Məhz, ona görə ki, sizin hansı işgüzarlığa malik olduğunuz, hər kəsə bəlli bir həqiqətdir. Son dövrlər milli ordumuzun işğalçı erməni ordusu üzərindəki parlaq qələbələri bizi cox sevindirir və bu qələbələr bir daha onu göstərir ki, xalqımız ölkə rəhbəri cənab İlham Əliyevin ətrafında sıx birləşərək, hər an torpaqlarımızı azad etməyə qadir bir xalqdır. Xalq Ali Baş Komandanın əmrini gözləyir. Belə bir vəziyyətdə hər kəs öz işinə məsuliyyətlə yanaşmalıdır.

Hörmətli Mədət müəllim! Bəzi məmurlar, o cümlədən Dövlət Təhlükəsizlik Xidmətinin Gəncə şəhər şöbəsinə rəhbərlik edən Əli Əliyev isə, bu gün xidməti vəzifəsinə aid olmayan işlərlə məşğul olmaqdadır. Belə ki, o, yaxın qohumu Gəncə Dövlət Universitetinin təsərrüfat işləri üzrə prorektoru Fəxrəddin Həsənovun vasitəsilə, şəhərin ali təhsil ocaqlarında, kolleclərində toplanan pul maxinasiyalarına müdaxilələr edir. Fəxrəddin Həsənovun qol qoyduğu işlərə haqq qazandırmaq üçün, o, belə bir özbaşınalıqları Əli müəllimin tapşırığı ilə etdiyini bildirir. Fəxrəddin Həsənov 02 oktyabr 2006-cı il tarixdən bu günədək, Gəncə Dövlət Universitetində təsərrüfat işləri üzrə prorektor vəzifəsində çalışır. Bir necə il bundan öncə Elman Məmmədov Gəncə Dövlət Universitetinin rektoru işləyərkən, Maliyyə Nazirliyinə ünvanlanmış çoxsaylı şikayətlər əsasında, nazirliyin Dövlət Maliyyə Nəzarəti Xidməti İdarəsi tərəfindən universitetdə yoxlamalar aparılmış və onun fəaliyyətində külli miqdarda korrupsiya faktları da aşkarlanmışdır. Belə ki, aparılan yoxlamalar zamanı 6 milyon 742 min 337 manat mənimsəmə faktı aşkar olunmuşdur. Araşdırmalar zamanı o da məlum olmuşdur ki, həmin məbləgin 982 min manatını bu gün də universitetin təsərrüfat işləri üzrə prorektoru vəzifəsini daşıyan Fəxrəddin Həsənov, o zaman GDU-nun bas mühasibi işləyən (hal-hazırda Gəncə şəhər Mərkəzi Poçtun müdiri) Nizami Mustafayevlə əlbir olaraq, saxta sənədlər əsasında mənimsəmişlər. Aparılan araşdırmalar zamanı o da məlum olmuşdur ki, universitetin təsərrüfat bölməsində 74 nəfər işçinin işləməsinə baxmayaraq, həmin işçilərdən yalnız 53 nəfəri təsərrüfat şöbəsində işləyirlərmiş, qalan 21 nəfərin adi ştat cədvəlində olsa da, faktiki olaraq onlar iş üzü tanımırlar. Həmin şəxslərin də maaş kartları prorektor Fəxrəddin Həsənovda olur ki, həmin şəxslər Azərbaycanda, hətta xarici ölkələrdə ticarətlə də məşğul olurlar. Maliyyə Nazirliyinin komissiyası həmin kartları alıb sahiblərinə qaytarsa da(???), bu gün də Fəxrəddin Həsənov həmin kartları ələ keçirə bilmiş və talançı əməllərindən əl çəkmir. Şəhərin yüksək çinli vəzifə sahiblərinin (Gəncə şəhəri DTX şöbəsinin rəisi Əli Əliyevin və Gəncə şəhər icra başçısı Elmar Vəliyevin) adından sui-istifadə edərək, o, hər yerdə onlarla qohum olduğunu bildirir və bununla da özünü müəyyən mənada sığortalaya bilir. Təsərrüfat bölməsi işçilərinin vasitəsilə o, universitetin binalarında xəfiyyə şəbəkəsi də qura bilmiş və özü üçün “maraqlı” olan şəxslərin hara gedib gəldiklərini də izlədə bilir.

Bir neçə fakt da qeyd edək. Bir müddət bundan əvvəl, universitetin əsas binası üçün 2500 manatlıq kamera və fotoaparatlar alınmış və onlar maliyyə sənədlərində 12500 manat göstərilmişdir. Fəxrəddin Həsənov “Samsung” firmasının Gəncə şəhərindəki rəsmi nümayəndəliyi ilə işbirliyi quraraq, firmadakı dostlarının vasitəçiliyi ilə, o, universitetin bütün tədris binalarına külli miqdarda lazımi avadanlıqlar almış və onların hamısı rəsmi sənədlərdə təzə adı ilə göstərilməsinə baxmayaraq, hamısı köhnə, işlənmiş, demək olar ki, istifadəyə yararsız mallar olmuşdur. İndi də binalarda quraşdırılmış bu avadanlıqların əksəriyyəti işləmir. Fəxrəddin Həsənov belə bir yollarla külli miqdarda dövlət əmlakını talamışdır. Bayraq Meydanının yaxınlığında yerləşən tədris korpusunun yalnız bir mərtəbəsinin təmir üçün büdcədən 54000 AZN pul ayrılmasına baxmayaraq, onun bir manatı belə üzə çıxmamışdır və həmin pullar Fəxrəddin Həsənov tərəfindən mənimsənilmişdir. Maliyyə sənədlərinə baxdıqda

açıq-aydın görünür ki, 18 manatlıq qurğunun biri 92 manata, 3 manat 60 qəpiklik qurğunun biri isə 39 manat 70 qəpiyə sənədləşdirilmişdir. Hal-hazırda tələbə yataqxanası üçün nəzərdə tutulmuş yataq dəstləri, Alüminiumçular qəsəbəsi adlanan yerdə yaşayış binasının altındakı mağazada Fəxrəddin Həsənov tərəfindən dədə malı kimi satılır. Maraqlıdır ki, universitetin yataqxanasında bir nəfər belə tələbə yaşamır. Universitet üçün alınmış inventarları o, öz işçilərinə dədə malı kimi paylayır. Ən dəhşətli hal odur ki, ayaqüstə 10 dəqiqə belə çıxış edə bilməyən bu şəxs, fakültə dekanlarına belə təsir edərək öz iyrənc əməllərini bu gün də həyata keçirir. O, təsərrüfat işləri üzrə prorektor olmasına baxmayaraq, elə şərait yaradıb ki, universitetin bütün işçiləri icazə almaq üçün ona müraciət etməli olurlar. Axı, bu onun səlahiyyət çərçivəsinə aid olmayan məsələlərdir.

Universitet binalarının təmiri onun qudası Yunis müəllimin təmir işlərinə baxan şirkəti tərəfindən həyata keçirilir. Bu zaman isə rəqəmlər şişirdilərək dövlət vəsaitləri talan edilir. Fəxrəddin Həsənov həmin çirkli pullarla yeməkxanalarda əylənərək, spirtli içki qəbul edir. Özünə və vəzifəsinə xas olmayan əməllərlə məşğul olur. Təəssf doğuran hal odur ki, Dövlət Təhlükəsizlik Xidmətinin Gəncə şəhər şöbəsinin rəhbərlik edən Əli Əliyev, bu şəxsi himayə etdiyindən, heç kim Fəxrəddin Həsənovla bağlı tədbir görə bilmir. Çox maraqlıdır ki, müharibə gedən bir ölkədə, xalqımızın övladlarının şəhid olduğu zaman, Fəxrəddin müəllimin və onun himayədarlarının qüruru belə bir işlərə qol qoymağa necə yol verir? İqtisadi böhranın agır dövründə, bu şəxs əcaib əməllərindən niyə əl çəkmir? Ölkə prezidenti cənab İlham Əliyevin iqtisadi böhran şəraitində qənaət məqsədilə struktur islahatları apardığı, lüzumsuz orqanların birləşdirildiyi bir vaxtda, Fəxrəddin Həsənovun və onun himayədarlarının qol qoyduqları talanlara nə ad vermək olar? Belə bir addımlar cənab Prezidentin həyata keçirdiyi siyasəti əleyhinə getmək deyilmi???”.

Hörmətli Mədət müəllim! Biz tam əminliklə deyə bilərik ki, Əli Əliyevin törətdiyi əməllərdən Sizin məlumatınız yoxdur və ona görə də bu barədə Sizə məlumat verməyi özümüzə sanki bir vətəndaşlıq borcu saydıq. İnaırıq ki, bu şəxslər barəsində lazımi ölçü götürəcəksiniz.

Hörmətlə, bir qrup ziyalı, Gəncə şəhəri.

gundemxeber.az