Məni tanıyanlar bilir ki, işsizlərlə məzələnməkdən, onları ələ salmaqdan xoşum gəlir. Hə vallah, adam da işsiz olar? İşsiz qalan, işdən çıxarılan dost-tanışa qarşı çox amansızam. Lap doğma qardaşım olsun, işsizdirsə, nömrəsini telefondan silib, sosial şəbəkələrdə də bloka atıram. Sınamışam, işsiz adamlar uğursuzluq gətirir. Dünyada ən nifrət etdiyim şey işsiz-gücsüz, kasıb adamla oturub söhbət etmək, onun naləvü-fəryadına, ahu-zarına qulaq asmaqdır. İşsizlik yoluxucu xəstəlik qədər qorxuludur. Təsadüfən hansısa işsiz tanışımla rastlaşanda qanım it qanına dönür. Üstəlik, işsizlik məndə allergiya yaradır. Daha doğrusu, işsiz adam görəndə kürkümə birə düşür, günlərlə qaşınıram. Kasıb-kusub, işsiz, səfil günündə yaşayan insanlardan uzaq qaçmaq, bu adamları ələ salmaq, məzələnmək lazımdı. Məndən sizə tövsiyə, işsizlərdən uzaq qaçın, onlarla məzələnməkdən çəkinməyin. Mən belə tərbiyə almışam, sizə də bunu məsləhət görürəm.

Lap gözümün işığı olsun, işsizdirsə, apar tulla.

Dediyim kimi, kasıb-kusubla, işsizlərlə məzələnmək çox əyləncəlidir. Ürəyimcə əylənmək, iş tapmaq ümidi ilə vurnuxan gəncləri ələ salmaq üçün internet məkanındakı iş elanı, vakansiya saytları mənim üçün ideal məkandır. Həm gündəlik qayğıları unutmaq, həm də boş vaxtlarımda əylənmək üçün bu saytlara tez-tez nəzər salıram. Günün müxtəlif saatlarında ali təhsilli, işsiz namizədlərin CV-lərini gözdən keçirib, yüksək nəaliyyətləri olan işsizlərlə əylənirəm. Zəng edib onları şirkətimə dəvət etməkdən, sonra isə naümid yola salmaqdan ləzzət alıram. İnanın, çox maraqlıdır. Təsəvvür edin, 4-5 xarici dil bilən, nüfuzlu universitetlərdə magistr təhsili alan bir işsiz namizədi ofisə dəvət edib, ona süpürgəçi işi təklif edirəm. O da boynunu büküb məzlum-məzlum üzümə baxır, bu iş üçün uyğun olmadığını izah etməyə başlayır.

Xaxaxaxaxa, xixixixix, hohohoho...

Allah haqqı çox gülməlidir.

Belə məqamlarda üzümə ciddi ifadə verib, barmağımla qapını göstərirəm və zavallı, binəva qapıdan çıxan kimi şaqqanaq çəkirəm! Ləzzət!

Bu əyləncəmi bəzi biznesmen dostlarım manyaklıq, hətta tərbiyəsizlik hesab edir, olsun. Əsas odur ki, mən bundan zövq alıram.

O gün bir iş yeməyində gənc biznesmen dostlarımdan biri yeni əyləncə növü tapdığını dedi. İnanın, sevindiyimdən ayağa qalxıb "Qaytağı" oynadım!

Sən demə, iş elanı saytlarından təkcə əyləncə üçün yox, həm də tanışlıq vasitəsi kimi istifadə etmək mümkündür. Hə vallah. Deməli, açırsan işsiz xanım namizədlərin CV-sini, telefon nömrəsini qeyd edirsən bir dəftərə, sonra da başlayırsan mesajlara. Pəh!

Düzdür, bu işlə məşğul olan çoxlu avara və bivec adamlar da var. Amma iş adamının bu işlə məşğul olması ən gözəl əyləncədir. Biz öz aramızda əyləncəyə "CV-ylə qız tutmaq" adı vermişik. Olduqca gözəl və mükəmməl əyləncədir. Təsəvvür edin ciddi və işgüzar bir xanıma zəng edib və ya mesaj yazıb CV-si ilə tanış olduğunu, fotosunu görüb bəyəndiyini deyirsən. Bununla həm onun iş tapmağa olan ümidini, həm də gələcəklə bağlı qurduğu planların bir qismini məhv edirsən. Bundan gözəl nə ola bilər?

Ötən dəfə Avropadakı partnyor şirkətlərdən birinin prezidentinə bu hobbimdən danışdım. Danışdım deyəndə ki, iş elanları saytından "tutub" müvəqqəti tərcüməçi ştatına götürdüyüm qıza dedim, o da tərcümə elədi. Avropalının üzündəki heyrət ifadəsini bu gün də unuda bilmirəm.

Mən həmişə demişəm, indi də təkrar edirəm: Bu avropalılar yaşamağı bacarmır!

Xülasə, bu yeni əyləncəm mənim həyatıma başqa bir rəng qatıb. İş elanı saytlarını açanlara, onu idarə edən peşəkarlara, vakansiya yerləşdirən şirkətlərə buradan çoxlu salam göndərirəm, təşəkkür edirəm. Onsuz da, heç kəs bu vakansiyalar vasitəsi ilə iş-zad tapmır. Heç olmasa gənclərimiz bu saytlar vasitəsi ilə başını qatır, mənim kimi macərapərəst biznesmenlər də əylənir.
Yaxşı ki, iş elanı saytları var, yoxsa bu qədər savadlı, bacarıqlı, yüksək təhsilli işsizi haradan tapıb məzələnərdik?

Sizə də belə maraqlı əyləncələr arzulayıram.

Di salamat qalın!

Cəlil Cavanşir
Milli.Az