Keçmiş icra başçısı Rafiq Alışov oğurlanmış oğlunu azad etmək üçün əməliyyat qurub; müəssisənin direktoru qorxuya düşərək dünyasını dəyişib

Qobustan rayonunda fəaliyyət göstərən “Günəşli” Üzüm Istehsalı və Emalı Müəssisəsinin direktoru Atababa Isayevin 1997-ci ildə qəfil dünyasını dəyişməsi hələ də rayonda müzakirə mövzusudur. Rayon sakinləri səhətində hər hansı problem müşahidə olunmayan direktorun qəfil ölümündə rayon hansısa müəmmalar axtarırlar. Və əslində sakinlər bu hadisəyə sıradan bir olay kimi yanaşmamaqda haqlıdırlar. Bu günlərdə redaksiyamıza bu hadisə ilə bağlı daxil olan məlumatlardan aydın olur ki, Atababa Isayevin qəfil ölümünün kökündə müdhiş maxinasiya dayanır.

İcra başçısı oğlunu azad etmək üçün pul axtarır

Həmin məlumatlarda bildirilir ki, 1997-ci ildə Qobustanın icra başçısı olmuş Rafiq Alışovun Vüqar adlı oğlu oğurlanıb. Yeri gəlmişkən, Atababa Isayevlə Rafiq Alışov yaxın qohumdurlar. Rafiq Alışovdan oğlunu azad edilməsi müqabilində külli miqdarda pul tələb edilib. Icra başçısı tələb olunan pulu toplamaq üçün yaxın qohumlarına və dostlarına müraciət etsə də, heç bir nəticə hasil olmayıb. Bu halda Rafiq Alışov oğlunu azad etmək üçün Atababa Isayevin direktoru olduğu “Günəşli” Üzüm Istehsalı və Emalı Müəssəsisindən yararlanmaq qərarına gəlib. Mərkəzi Bankdakı dostları icra başçısına bildiriblər ki, o, girov müqabilində kredit götürə və həmin pulla oğlunu azad edə bilər.

Bankdan kredit götürmək üçün əməliyyat

Rafiq Alışov da bu məsləhətə qulaq asaraq kredit götürmək üçün əməliyyat qurub. O, əvvəlcə 19 iyun 1997-ci il tarixli 36 saylı sərəncamı ilə (sərəncamın surəti əlimizdədir) Qobustanda fəaliyyət göstərən Təcrübə Sınaq Daş Karxanasını “Günəşli” Üzüm Istehsalı və Emalı Müəssisəsinə birləşdirib. 30 iyun 1997-ci il tarixdə isə “Günəşli” Üzüm Istehsalı və Emalı Müəssisəsinin 603 min AZN (o vaxtkı pulla 3 milyard 15 milyon manat) dəyərində olan əsas vəsaitlərini Aqrar Sənaye Bankının Qobustan filialına girov qoyaraq təxminən 1 milyon AZN (köhnə pulla 4 milyard 464 milyon 500 min manat) kredit götürür. Maraqlıdır ki, pul elə kredit müqaviləsi bağlanan gün, yəni 30 iyun 1997-ci il tarixdə müəssisənin hesabına köçürülür. Buradan da nəqdiləşdirilərək Vüqarın azad olunmasına sərf edilir. Atababa Isayev Rafiq Alışovun bu əməliyyatından qorxuya düşərək dünyasını dəyişir. Icra başçısı isə sonrakı fəaliyyətini götürülən pulu “yox”a çıxarmağa sərf edir. Əvvəlcə əsas borcun üzərinə gələn faiz borcu “Günəşli” Üzüm Istehsalı və Emalı Müəssisəsinin təsərrüfat hissəsinin islahata getməsindən istifadə edilərək məqsədli şəkildə müəssisənin kənd təsərrüfatı hissəsinin üstünə atılır və silinir. Baxmayaraq ki, həmin borc müəssisənin sənaye hissəsinin əsas vəsaitlərinin girov qoyulması hesabına götürülüb.

Maliyyə Nazirliyi də pulun taleyilə maraqlanmayıb

Daha sonra isə borcun guya müəssisəyə aid olmaması barədə sənədlər hazırlanır. Aqrar Sənaye Bankın Qobustan filialının o zamank müdiri B.Kərimov Maliyyə Nazirliyi və Əmlak Məsələləri üzrə Dövlət Komitəsinə ünvanladığı 10.06.1999-cu il tarixli 42 saylı məktubunda iddia edir ki, guya daş karxanası “Günəşli” Üzüm Istehsalı və Emalı Müəssisəsinə birləşənə qədər həmin borc mövcud imiş. Buradan aydın olur ki, daş karxanasının müəssisəyə birləşdirilməsi Rafiq Alışova buna görə lazım imiş. Lakin B.Kərimov başqa məktubu ilə özünü də icra başçısını da ifşa edir. Onun Əmlak Məsələləri üzrə Dövlət Komitəsinə yazdığı başqa bir məktubda adıçəkilən “Günəşli” Üzüm Istehsalı və Emalı Müəssisəsinin sənaye hissəsinin özəlləşdirilməsi zamanı bankdan götürülən kreditin dövlətə qaytarılması üçün kömək etməyini xahiş edib (Bu sənədlər də redaksiyamıza təqdim edilib). Bununla da B.Kərimov təsdiq edir ki, kredit əvvəlcədən mövcud olmayıb və “Günəşli” Üzüm Istehsalı və Emalı Müəssisənin adına götürülüb.
Rafiq Alışov alınan pulun elə müəssisə üçün səfr olunduğunu iddia edə bilər. Lakin məsələ burasındadır ki, 1999-cu il 26 iyunda Maliyyə Nazirliyinin Baş Təftiş Idarəsinin Sumqayıt şəhər şöbəsinin rəisi B.P.Məhərrəmovun rəhbərliyilə maliyyə təsərrüfat fəaliyyətinin yoxlanılması və borcun taleyi ilə əlaqədar yoxlama komissiyası akt (aktı redaksiyamıza təqdim edilib) tərtib edib. Komissiyanın tərtib etdiyi aktda müəyyən olunur ki, 1997, 1998 və 1999-cu illərdə müəssisədə istehsal olmayıb. Yəni, müəssisə kənardan xammal almayıb. O zaman sual olunur ki, bəs alınmış kredit hara sərf edilib? Aktda da bu barədə heç bir məlumat verilmir. Bu isə pulun müəssisə üçün sər edilmədiyi barədə şübhələrə əsas verir.

Dövlət müəssisəsinin əmlakı “yox”a çıxıb

Bundan başqa Rafiq Alışovun bu əməliyyatda ona yardımçı olmuş şəxslərin mükafatlandırması barədə məlumatlar var. Bildirilir ki, keçmiş icra başçısı Mərkəzi Bankın rəhbərliyindəki dostlarından birinə Şamaxıda dəbdəbəli villa tikib. Əmlak Məsələləri üzrə Dövlət Komitəsinin rəhbəri Kərəm Həsənov bu maxinasiyanı aşkar edəndə yaxın tanışları vasitəsilə onunla əlaqəyə girib və komitə sədrini bir villa ilə razı salıb.

Yeri gəlmişkən, “Günəşli” Üzüm Istehsalı və Emalı Müəssisəsinin sənaye hissəsi Əmlak Məsələləri üzrə Dövlət Komitəsinin tabeliyinə verilib. Kredit müqaviləsində göstərilir ki, banka girov qoyulan müəssisənin sənaye hissəsinin əsas vəsaitləri 603 min AZN (köhnə pulla 3 milyard 15 milyon manat) dəyərindədir. Indi bu əsas vəsaitlərin taleyi də qaranlıqdır. Müəssisəsinin balansında olan binalar, qurğular, avandanlıqlar, nəqliyyat vasitələri ilə bağlı nə baş verdiyi bəlli deyil. Həmçinin müəssisəsinin Təklə kəndində yerləşdiyi sənaye hissəsinin 3 hektar torpaq sahəsi ilə bağlı məsələ də qaranlıqdır. Bunların hesabı təbii ki, Kərəm Həsənovdan soruşulmalıdır.(azadliq.info)