“Oğlum deputatın oğlanları və qardaşı oğlanları tərəfındən qəsdən öldürülüb”

Bu gün Bakı Ağır Cinayətlər Məhkəməsində hakim Cavid Hüseynovun sədrliyi ilə ötən il iyulun 17-də Səbail rayonu, Salyan şossesi 32 ünvanında yerləşən “1001 gecə” İstirahət Mərkəzində törədilən qanlı cinayətlə bağlı məhkəmə iclası keçiriləcək. Qanlı olay ilə bağlı Ramal Bayramovun anası Nənəş İsmayılova cinayət işinin yenidən araşdırılmasını və əsl qatilin, sifarişçinin ortaya çıxarılmasını tələb edir.
Bununla bağlı zərərçəkən prezident İlham Əliyevə, baş prokuror Zakir Qaralova, Milli Məclisini sədri Oktay Əsədova və digər rəsmilərə müraciət edib.“Oğlum Milli Məclisin deputatı Hüseynbala Mirələmovun oğlanları və qardaşı oğlanları tərəfındən qəsdən öldürülüb. Ancaq Baş Prokurorluğunun Ağır Cinayətlərə Dair İşlər Üzrə İstintaq İdarəsinin rəis müavini, Kriminalistika şöbəsinin rəisi, istintaq qrupunun rəhbəri Pərviz İbayev oğlumu öldürən şəxsləri hansısa maddi maraq naminə gizlədib. Rəşad Mirələmov güya tək olub və oğlumu öldürüb. 16 mart 2012-ci ildə Rəşid Behbudov küçəsi 58 saylı binanın yaxınlığında əslən Naxçıvandan olan Paşa Paşayev oğlumu öldürmək məqsədi ilə ona odlu silahdan çoxsaylı atəş açıb. Həmin vaxt oğlum ayağından yaralanıb. Paşayev oğlumu hadisə yerində köməksiz vəziyyətdə qoyaraq hansısa bir qüvvə tərəfindən ölkədən qaçırılıb. Hadisənin törənməsinə səbəb olan ailənin digər üzvü Orxan Paşayev olub. Sonuncu 9 mart 2012-ci il tarixdə oğlumun yanında olan Lalə Şükürovaya qarşı ədəbsizlik etdiyinə görə aralarında söz-söhbət olub. Orxan təkrar-təkrar cinayət törədib və hansısa səbəbdən hüquq mühafizə orqanları onu müdafıə edirlər”.
Məktub müəllifi yazır ki, P.Paşayev quldurluq, adam oğurluğu və digər cinayətlər törətdiyinə görə həbsdə olduğunu yazır: “Yəni oğlum Rəşid Behbudov küçəsində yerləşən “Nargin” klubunda ona qarşı olmuş ədəbsizliyə cavab versə də, qarşı tərəf residivist olub və cinayət törətməyə çox meyilli olmaqla məqsədli şəkildə addım atıb. Paşa Orxan Paşayevin tapşırığı ilə oğlumu odlu silahla vurub, ancaq istintaq orqanı bunu araşdırmaq üçün bir addım belə atmaq istəmir. Sizdən xahiş edirəm Pərviz İbayevə göstəriş verəsiniz kimə nə söz verib və ya kimdən nə alıb qaytarıb özlərinə versin və Paşayev qardaşları tərəfındən oğluma qarşı işlənmiş cinayətin üstünün açılmasına və ya daha yaxşı, vicdanlı işini layiqincə bilən müstəntiqə tapşırılmasına göstəriş verəsiniz”.
Məktub müəllifi cinayətin sifarişçisi haqda da müraciət etdiyi rəsmilərə məlumat verir: “Pərviz İbayev tərəfındən hazırlanmış ittiham aktında qeyd olunur ki, Rəşad Mirələmovla oğlumun arasında telefon danışıqları olub, bir-birlərini söyüblər. Bunu əsla düzgün hesab etmirəm, onlar bir-birlərini tanımayıblar. Mən hesab edirəm ki, oğlumu “1001 gecə” istirahət mərkəzinə Hüseynbala Mirələmovun tapşırığı ilə çağırıb və öldürüblər. Belə ki, 16 iyuldan 17 iyula keçən gecə nə talaş idi ki, Milli Məclisin deputatı Hüseynbala Mirələmovun oğlanları Rauf və Fərid Mirələmovlar, qardaşı oğlanları Cavid, Rəşad və digər yaxınları istirahət mərkəzində yığışmışdılar? Hesab edirəm ki, sonuncular düşünülmüş şəkildə əvvəlcədən plan qurmaqla əlbir olaraq mənim oğlumu öldürüblər. Cənub bölgəsini hər zaman qorxu altında saxlayan, istədiklərini etdirən Mirələmovlar artıq Bakıda, mərkəzdə cinayət şəbəkələrini yaradıblar. Ancaq istintaq orqanı hansısa səbəbdən və ya hansısa göstərişdən sonra bu xususatları araşdırmayıb. Qasımov Elnur Əşrəf oğlu ifadələrində göstərib ki, həmin gün “1001 gecə” istrahət mərkəzində stol arxasında özündən başqa 5 nəfər olub və həmin şəxslərdən 2-i dostları Elmar, Elman və üç nəfəri isə əvvəllər tanımayıb. Həmin şəxslərin biri Rəşad, digər ikisi isə Rəşadın yaxın qohumları olduğunu qeyd edib. Bu günə qədər istintaq orqanı həmin şəxslərin kimliyi barədə heç bir açıqlama verməyib. Qeyd olunanlardan görünür ki, Pərviz İbayev tərəfsiz olmamış və hansısa maddi maraq naminə istintaqı Mirələmovların fıkirlərinə, ssenarilərinə uyğun olaraq aparmışdır. Hər nə olsa belə qeyd etdiyim mütəşkkil dəstənin mövqeyini müdafıə etmiş cinayətin digər iştirakılarını kənarda saxlamaq üçün əlindən gələni etmişdir. Qasımovun gördüyü şəxslər kimlərdir? Oğlum Ramal Bayramovu xaricdən kim çağırıb? Onun ölümünün sifarişçisi kimdir? Əsl qatil kimdir? Bütün suallar cavabsızdır”.
Zərərçəkən yazır ki, R.Mirələmovun Cənub bölgəsindən Bakı şəhərinə silah gətirməsi təhlükəlidir: “Mən hesab edirəm ki, silah ona “1001 gecə” istrahət mərkəzində verilib. Ancaq iş materiallarında yazılıb ki, güya Rəşad oğlumu uzanılı vəziyyətdə vurub, yəni aşağıdan yuxarı. Ramalı yuxardan aşağı tək atəşlə çox peşəkar şəxs vurub. Həmin şəxs Fərid Hüseynbala oğlu Mirələmov və Rauf Hüseynbala oğlu Mirələmovlar ola bilərlər. Ancaq Pərviz İbayev qeyd olunanları qətiyən araşdırmamışdır, hətta çalışmışdır ki, az qala mənim oğlum Ramal Bayramovun özü-özünün qatili çıxarıb qeyd etsin ki, məhrum özü-özünü öldürüb. Hər kəs bilir ki, mənim oğlumu öldürən Rəşad Mirələmov deyil. Sonuncunun əlinə silah veriblər və xahiş ediblər ki, təqsirləndirlən şəxs kimi o, müttəhimlər kürsüsündə otursun, hər şeyi üzərinə götürsün. Ona görə də qeyd etdiklərimi və mövcud qanunvericiliyi rəhbər tutaraq oğlumun ölümü ilə bağlı başlanmış cinayət işinin yenidən araşdırılmasına və əsl qatilin və sifarişçinin ortaya çıxarılmasına göstəriş verəsiniz”

Hüseyn