Şərlənərək həbs olunan məhkum məhkəmədə faktlar açıqladı

Narkotik vasitələrin qanunsuz dövriyyəsində təqsirli bilinən Lənkəran sakinləri - Saleh Cavadov və Rafiq Əliyevin cinayət işi üzrə məhkəmə prosesi başa çatıb.

İttihama görə, Rafiq Əliyev 2014-cü ilin yanvar ayının ortalarında Lənkəran rayonu Siyabli kənd sakini Saleh Cavadovdan satış məqsədi olmadan qanunsuz olaraq 5,97 qram narkotik vasitə olan qurudulmuş marixuananı 10 manata alıb.

Rafiq Əliyev əldə etdiyi narkotik vasitəni əynindəki şalvarının cibində saxlayıb. O, 23 yanvar 2014-cü il tarixdə, saat 17 radələrində Lənkəran şəhər polis şöbəsinin əməkdaşları tərəfindən yaşadığı Lənkəran rayonunun Şovu kəndində saxlanılıb və şöbənin inzibati binasına gətirilib. Şöbədə Rafiq Əliyevin üzərində şəxsi axtarış aparılarkən həmin narkotik vasitə ondan aşkar olunaraq götürülüb.

Bundan başqa, Saleh Cavadov istintaqa məlum olmayan mənbədən satış məqsədi olmadan iki ədəd kibrit qutularında və 1 bükümdə çəkiləri 4,36 qram, 3,80 qram və 0,25 qram, ümumi çəkisi 8,41 qram narkotik vasitə olan qurudulmuş

marixuananı əldə edib və idarə etdiyi “Mercedes Benz” markalı avtomobilində saxlayıb.

Fevralın 27-də Saleh Cavadov polis əməkdaşları tərəfindən saxlanılıb. Avtomobilə baxış zamanı narkotik vasitə oradan aşkar edilib.

İki nəfərə cəza

Saleh Cavadov Cinayət Məcəlləsinin 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) və 234.2-ci (satış məqsədi ilə qanunsuz olaraq narkotik vasitələri və ya psixotrop maddələri əldə etmə və ya saxlama, hazırlama, istehsal etmə, emal etmə, daşıma, göndərmə, yaxud qanunsuz olaraq narkotik vasitələri və ya psixotrop maddələri satma) maddələri ilə Rafiq Əliyev isə Cinayət Məcəlləsinin 234.1-ci maddəsi ilə ittiham olunub.

Narazılıq doğuran hökm

Lənkəran rayon Məhkəməsinin hökmü ilə Saleh Cavadov 4 il 6 ay, Rafiq Əliyev isə 10 ay müddətinə azadlıqdan məhrum edilib.

Hökmdən narazı qalan Saleh Cavadov apelyasiya şikayəti verib. O, şikayətində barəsində təyin edilmiş cəzanın yüngülləşdirilməsini istəyib.

Bir müddət əvvəl Saleh Cavadovun barəsində verilmiş şikayətə Şirvan Apelyasiya Məhkəməsində baxılıb. Həmin vaxt işə baxan hakim kollegiyası Saleh Cavadovun apelyasiya şikayəti qismən təmin olunub.

Məhkəmənin qərarına görə, Saleh Cavadovun ittiham olunduğu Cinayət Məcəlləsinin 234.1-ci maddəsi ittihamdan xaric edilib və onun cəzası 4 ilə endirilib.

Kim haqlıdır?

Həmin qərardan narazı qalan prokuror kasasiya protesti verib. Prokurorun protesi baxılması üçün Ali Məhkəməyə göndərilib. Ali Məhkəmədə işə baxan hakimlər prokurorun protestini təmin edib və işin yenidən apelyasiya instansiyasında araşdırılması barədə qərar qəbul edilib.

Bu səbəbdən Saleh Cavadova aid hissədə cinayət işinin materialları yenidən araşdırılması üçün Şirvan Apelyasiya Məhkəməsinə göndərilib. Apelyasiya instansiyasında bu dəfə iş hakim İsmayıl Əhmədovun sədrlik etdiyi kollegiyada araşdırılıb.

“Barəmdə saxtalaşdırılmış cinayət işi açılıb”

Saleh Cavadov bildirib ki, barəsində saxtalaşdırılmış cinayət işinə görə özünü təqsirli bilmir. Onun sözlərinə görə, 2013-cü ildə icra məmurlarının qara əməlləri barəsində dövlətimizin bir neçə orqanlarına əsaslı faktlarla

şikayət ərizələri ilə müraciət edib: “Buna görə Lənkəran rayon polisi qanunu və həqiqəti gizlətmək məqsədi ilə barəmdə saxtalaşdırılmış cinayət işi açıb. Lənkəran polisinin saxtalaşdırılmış cinayət işinə Lənkəran rayon Məhkəməsinin sədri Elçin Kazımov baxmıb. Lənkəran rayon Məhkəməsində hüququm bir neçə halda pozularaq günahsız olduğum halda, 5 iyun 2014-cü il tarixli hökmlə 4 il 6 ay müddətə azadlıqdan məhrum edilmişəm. Rafiq Əliyev isə 1 il müddətə azadlıqdan məhrum edilib”.

“Polisdə deyiblər ki, Salehin üzünə dayan”

Saleh Cavadovun sözlərinə görə, 23 yanvar 2014-ci il tarixdə Rafiq Əliyev tutularkən, ilk ifadəsində üstündən aşkar olunmuş narkotik vasitə olan 5.97 qram marixuananı guya ondan aldığını bildirib: “Rafiq Əliyev ifadəsində bildirib ki, guya 10 gün əvvəl mənim mobil nömrəmə zəng edib və narkotik vasitəni 10 manata alıb. Halbuki Rafiq Əliyevin ifadəsində göstərdiyi belə telefon nömrəsi işlətməmişəm. 2014-cü il yanvar ayının 10-da anam Liman şəhərində vəfat edib. Mən də anamın yas mərasimində olmuşam. Heç bir naxələf övlad anasının yas mərasimini buraxaraq 80 kilometr məsafəyə maşın sürüb və 10 manata 6 qram marixuana satmazdı. Lənkəran polisi Rafiq Əliyevlə şərt kəsib ki, biz səni buraxırıq ev dustaqlığına, ancaq sən Salehin üzünə dayan, de ki narkotiki səndən almışam. Fevralın 27-də yaşadığım Lənkəran rayonunun Siyablı

kəndinin çayxanasında polislər məni şəxsi “Mercedes” markalı avtomobilimə əyləşdirərək, polis şöbəsinə gətirdilər. Polis şöbəsinə çatana qədər polis şöbəsinin əməkdaşları 1 kibrit qutunu maşının arxa polkasında olan apteçkanın içərisinə, 1 kibrit qutusunu dirsək vermək üçün qoltuqaltı tumbuçkasının içinə, bir balaca siqaret zərfinə bükülünü isə kurtkasının döş cibimə qoydular”.

“Hakim dedi ki, nə fərqi var...”

Saleh Cavadov bildirib ki, məhkəmə iclasında hal şahidləri Asəf Quliyev və Tarif Hacıyev dindirilib: “Hal şahidləri suallara cavab olaraq bildiriblər ki, Saleh Cavadovun üzərinə baxış keçirilib və Saleh bildirdi ki, bu narkotiki polis əməkdaşları onun üzərinə və maşınına qoyublar. Hakim Elçin Kazımov şahidlərə deyib ki, mən sizi bir də hal şahidi qismində məhkəmədə görməyim. Elçin Kazımov məhkəmədə mənə bildirdi ki, sən Liman şəhərində yaşamırsan, niyə ordan şikayət yazırsan. Ona dedim ki, axı mən azərbaycanlıyam. Polis əməkdaşı Ənvər Həsənov məhkəmədə verdiyi sualına cavab olaraq təsdiqləyib ki, bir neçə polis əməkdaşları olmaqla 27 yanvar 2014-cü il tarixdə mənimlə görüşüblər. Sual verdim ki, Rafiq Əliyev 23 yanvarda tutulub, narkotiki ondan almasını bildirmişdirsə də, bəs nə üçün siz mənimlə 27 yanvarda görüşəndə həbs etmədiniz?. Mənə cavab verildi ki, onlar faktla adam tuturlar, həmin vaxt fakt olmayıb. Necə olur ki, 23 yanvarda

Rafiq Əliyev mənimlə görüşəndə fakt sayılmadı, tutulduğum gün fakt sayılır. Hakim Elçin Kazımov bildirdi ki, sənin üçün nə fərqi var, həmin gün, yaxud 35 gündən sonra səni tutsunlar”.

Məhkum qeyd edib ki, məhkəmə iclasında şahid qismində dindirilən polis əməkdaşı Amil Abdinov da sual verib: “Amilə dedim ki, əgər Rafiq Əliyev ilk ifadəsində narkotiki məndən aldığını bildirmişdirsə, nə üçün siz məni axtarmadınız və yaxud axtarış elan etmədiniz? Amil Abdinov cavabında bildirdi ki, biz səni axtarmışıq, tapa bilməmişik”.

“Hakim günahsız olduğumu sübut edən faktlara göz yumub”

Saleh Cavadov bildirib ki, bir çox kağızlarda onun yerinə imza qoyublar: “Rafiq Əliyevlə razılaşma əldə etdikdən sonra onu martın 12-də ev dustaqlığına buraxıblar. Martın 14-də ekspertizadan rəy alınıb ki, Rafiq Əliyevin üstündən çıxan marixuana mənim üzərimdən çıxan marixuana ilə eyni tərkiblidir. İstintaq zamanı vəkilim tərəfindən 3 vəsatət verildi, lakin vəsatətlərin heç biri təmin olunmadı. Vəsatətlərdən 1-si Rafiq Əliyevin mobil telefonuma zəng vurması və telefonuma gələn-çıxan zənglərin tele-anten dairəsində çıxarılması barədə, 2-si maşınımdan və cibimdən çıxan kibrit qutusundan barmaq izlərinin çıxarılması barədə,

3-sü yas mərasimində bir saat harasa uzaqlaşmamı təsdiq etmək üçün Liman şəhərində yas mərasimində iştirak edən vətəndaşların şahid qismində dindirilməsi barədə olub.

Məhkəmə iclasında da bu vəsatətlər vəkilim tərəfindən verilib. Məhkəmə iclasında bir vəsatəti də mən verdim ki, məhkəməm açıq elan olunsun, məhkəmə iclası videolentə alınsın, çəkilişin surəti cinayət işinə əlavə olunsun. Hakim Elçin Kazımov həmin vəsatətlərdən heç birini qəbul etmədi. Rafiq Əliyev polislər tərəfindən məlumatlandırılaraq, məhkəmə iclasında bildirdi ki, mobil telefonuma ə günorta çağı zəng edib. Guya həmin vaxt mən də bildirmişəm ki, hüzürlüyəm, gecə saat 12-1 arası Rafiqə zəng edib, evinin yanında marixuananı vermişəm. Rafiq həmçinin bildirib ki, marixuananı 15 ildir çəkirmiş, çəkməyəndə bədənində ağrılar olurmuş. Görəsən məqsəd nə idi ki, marixuananı alıb cibində 10 gün saxlayıb, amma istifadə etməyib. Hakim Elçin Kazımov günahsız olduğumu sübut edən faktlara göz yumaraq Lənkəran polisinin saxtalaşdırılmış cinayət işinə himayədarlıq edib, məni günahkar hesab edib.

Saleh Cavadov çıxışının sonunda barəsində ədalətli qərar çıxarılmasını xahiş edib. Vəkil və dövlət ittihamçısının çıxışlarını dinləyən hakim heyəti sonda qərar elan edib.

Qərara görə, Saleh Cavadovun apelyasiya şikayəti təmin edilməyib.