Vəkil müdafiə etdiyi şəxsin günahsız olduğunu sübut etmək üçün şikayətçidir

Bu ilin iyunun 12-də Bakı şəhər sakini Nizami Əlizadə quldurluqla üzləşib. Hadisə gecə saat 02 radələrində baş verib. Bakı şəhər sakini, 1945-ci il təvəllüdlü Nizami Əlizadə Daxili İşlər Nazirliynin 102 xidmətinə məlumat verib ki, M.Hüseyn küçəsi 2, mənzil 10-un qarşısında tanımadığı 3 nəfər şəxs ona hücum edib. Naməlum şəxslər 71 yaşlı kişini döyüb yerə yıxaraq cibində olan 350 manat pulunu götürüb qaçıblar.

Daxili İşlər Nazirliyinin Baş Cinayət Axtarışı İdarəsi və Səbail rayon Polis İdarəsinin 9-cu polis bölməsi əməkdaşlarının həyata keçirdikləri əməliyyat-axtarış tədbirləri nəticəsində Nizami Əlizadənin 350 manat pulunu quldurluq yolu ilə almış paytaxt sakinləri Fuad Babayev və Murad Vəliyev tutulub.

Murad Vəliyevin bu quldurluq cinayətində günahının olmadığı iddia olunur. Onun vəkili Səlahəddin Cəfərov bildirib ki, Səbail rayon Polis İdarəsinin istintaq şöbəsinin müstəntiqi Emil Abdullayevin icraatında olan cinayət işi üzrə müdafiə etdiyi Murad Vəliyevə Cinayət Məcəlləsinin 181.2.1-ci (quldurluq) maddəsi ilə ittiham verilib: “Amma iş materiallarından da görünür ki, verilən ittiham qanunsuz və əsassızdır. İrəli sürülmüş ittiham ağır dərəcədə sərxoş olan şəxs tərəfindən verilmiş yanlış məlumata, həmçinin sübutu olmayan fərziyyələrə əsaslanıb. Bundan başqa Cinayət-Prosessual Məcəlləsinin tələbləri kobud şəkildə pozulub. Hüquqlarını müdafiə etdiyim Murad Vəliyevin ifadəsindən görünür ki, həmin gün axşam saatlarında Murad evlərinə yaxın yerdə yerləşən kafedə oturduğu zamanı içəriyə yaşlı sərxoş kişi girib və ayağı maneyə ilişdiyindən yıxılıb. Muradla bir masada

əyləşən Fuad adlı şəxs ona yardım ediblər. Sonradan həmin kişi Muradla Fuadın olduğu masasında əyləşib”.

Vəkilin sözlərinə görə, həmin dövr ərzində Nizami Əlizadə dəfələrlə yıxılıbdır və ağır dərəcədə sərxoş olub: “Nizami Əlizadə həm dövlət, həm də ölkəmizin keçmiş rəhbəri barəsində nalayiq ifadələr işlətdiyindən Murad onunla bir masada əyləşmək istəməyib. Nizami Əlizadə onlara bildirib ki onun oğlu prokurorluqda yüksək vəzifədə işləyir. Murad Vəliyev saat 1 radələrində həmin kafedən çıxarkən həmin kişi onların masasına aid pulunu da ödəyib. Lakin həmin kişinin cibində nə qədər məbləğin olmasından Muradın xəbəri belə olmayib. Təbii ki, Nizami Əlizadə ağır dərəcədə sərxoş olduğundan yıxılmasın deyə Fuad onu aşağıyadək aparıb və sonradan qayıdıb”.

Səlahəddin Cəfərov bildirib ki, Murad Vəliyev həmin gün heç kimlə mübahisə etməyib, heç kimə qarşı hər hansı cinayət xarakterli hərəkətlərə yol verməyib: “Belə olan halda Murad Vəliyevin həmin ağır dərəcəli sərxoş şəxsə qarşı niyə və necə quldurluq edib? Həmin vaxt ətrafda adam olmayıbmı? Necə ola bilər ki, quldurluq etmək istəyən şəxs həmin cinayəti ictimai yerdə törədir, ətrafda olan şəxslər isə heç bir reaksiya vermir. Ən azı həmin an kimsə polisə xəbər vermir, yalnız ağır sərxoş olan, ağzının danışığını belə bilməyən şəxs uzun müddət sonra şikayət etməyə gedir”.

Vəkil qeyd edib ki, müdafiə etdiyi təqsirləndirilən şəxs Murad Vəliyev özü polisə gedib: “Belə olan halda “zərərçəkmiş” şəxsin ilkin Daxili İşlər Nazirliyinin “102-zəng” xidmətinə vermiş olduğu şikayət də kimin tərəfindən verilməsi hələdə bilinmir: “Həmin

şikayətdə onun 350 man pulunun, markasını bilmədiyi mobil telefonunun onu yerə yıxaraq əlindən alınması olsa da, nədənsə həmin şəxsin hansı paltarla yerə yıxıldığı yıxılmanın izləri, həmçinin telefonun aqibəti hələki araşdırılmamış qalmaqdadır”.

Səlahəddin Cəfərovun bildirdiyinə görə, faktiki heç bir sübut olmadan Murad Vəliyevə ittiham irəli sürülüb: “Həmin vaxt kafedə olan şəxslər dindirilmədən, zərərçəkmiş şəxs ekspertizadan keçirilmədən, yalnız zərərçəkənin müraciətinə əsasən quldurluq maddəsi ilə ittiham verilir. “Cinayətin” baş verdiyi yerdə təhlükəsizlik və müşahidə kameraları varmı, yoxlanılıbmı? Bu suallara isə istintaq orqanı aydınlıq gətirmir”.