MŞ Koordinasiya Mərkəzi gündəmin qaynar mövzularını müzakirə etdi
Milli Şuranın Koordinasiya Mərkəzi ötən gün növbəti iclasını keçirib. İclasda bir sıra mühüm məsələlər müzakirə olunub. Bu barədə Milli Şuradan məlumat verilib. Məlumatda deyilir:
Koordinasiya Mərkəzi Rusiya Dövlət Televiziyasının təhrikçiliyi ilə Azərbaycan hakimiyyəti içində Rusiyaya xidmət edən 5-ci kalonun və onlara məxsus mətbuat orqanlarının AXCP sədri Əli Kərimliyә, bütövlükdə AXCP-yә və Milli Şuraya qarşı başlatdığı saxta “Gülənçi” kampaniyasını qətiyyətlə pisləyib. Vurğulanıb ki, AXCP sədri Əli Kərimli Türkiyədəki hərbi çevrilişə elə həmin gecə, Türkiyədən kənardakı siyasətçilər içində birinci olaraq qiymət vermiş, çevrilişə qarşı olduğunu, Türkiyənin xalq tərəfindən seçilmiş hakimiyyət orqanlarına dəstək verdiyini ifadə etmişdi. AXCP sədrini və onun tərəfdarlarını Fətullah Gülənlə əlaqələndirmək tam əsassız və absurddur. Koordinasiya Mәrkәzi bәyan edib ki, hakimiyyət müxalifət liderinə qarşı belə iyrənc kampaniya başlatmaqla bir tərəfdən öz daxilindəki həqiqi Gülənçiləri qorumaq, digər tərəfdən də əsas rəqib hesab etdiyi siyasi qüvvəyə zərbə vurmaq mәqsәdi güdür. Qeyd olunub ki, bu böhtan kampaniyasının bir məqsədi də Konstitusiyaya dəyişikliklər mәsәlsindən diqqəti yayındırmaq, Milli Şuranın artıq anons etdiyi mitinqlərə hazırlığa zərbə vurmaqdır.
Koordinasiya Mәrkәzi referendum ərəfəsi başlanmış yeni həbslər dalğasını bir daha müzakirəyә çıxarıb vә REAL hərəkatının icra katibi Natiq Cəfərli ilә NİDA hərəkatının üzvü Elgiz Qəhrəmana azadlıq tələb edib. Qeyd olunub ki, rәsmən narkotik ittihamı ilә həbs edilsə də, hökumət mətbuatı Elgiz Qәhrәmanı Fətullah Gülənlə əlaqədə suçlayıb vә o, indiyə qədər də tәcridxanaya köçürülməyərək “banotdel”də saxlanılır, onun vəkili ilə görüşünə imkan verilmir. Bütün bunlar isә bu gənc fəalın həyatından narahatlığı artırır və “banotdel”də ona işgəncə verilməsi ehtimalını gücləndirir.
AXCP fəalı, 30 sutka müddətinə inzibati qaydada həbs olunmuş Məsud Rzanın ailəsinə polis əməkdaşlarının təzyiq göstәrmәsi, həmin ailənin kirayədə qaldığı evdən çıxarmaqla hədələnməsi dә qeyd olunub vә qəti şəkildə pislənilib. Hakimiyyətdən tәlәb olunub ki, siyasi rəqiblərin ailələrinə qarşı bu cür qeyri-insani basqıları dayandırsın, Məsud Rzanın özünü də azad etsin.
Koordinasiya Mәrkәzi REAL hərəkatının gənc fəalları Toğrul İsmayıl və Elşən Qasımovun 7 sutka müddətinə həbs edilməsini də müxalifətə qarşı növbəti repressiya addımı kimi qiymətləndirib və onların azad olunmasını tələb edib.
İclasda AXCP-nin sədr müavini Fuad Qəhrəmanlı, Müsəlman Birliyi Hərəkatının sədri Tale Bağırzadə və digər 16 nəfərin ittiham olunduğu “Nardaran işi” üzrə məhkəmənin gedişi dә müzakirə olunub. Bildirilib ki, Milli Şura Koordinasiya Mərkəzinin üzvləri mümkün olduqca məhkəmə prosesini şəxsən izləyirlər. Müttəhimlərin “bandotdel”də onlara verilmiş işgəncələr barədə ifadələri məhkəmə prosesini izləyənləri dəhşətə gətirir. Bu qeyri-insani işgəncələr dövlətimizin adına utanc gətirir. 98 il bundan öncə respublika qurmuş xalqımızın dövləti adından belə utancverici hərəkətlərin edilməsi qəbulolunmazdır. Təəssüflə bildirilib ki, həbs olunan şəxslərin “bandotdel”də məruz qaldıqları işgəncələrlə bağlı verdikləri detallı ifadələr, o cümlədən şəxsən işgəncə vermiş əməkdaşlar haqda məlumatlar hələ də Respublika Prokurorluğunun diqqətini cəlb etmәyib. Koordinasiya Mərkəzi qərara gəlıb ki, “Nardaran işi” üzrə ittiham olunan şəxslərə verilmiş işgəncələrin araşdırılması, bu cinayətin törədilməsində təqsirli şəxslərin cəzalandırılması çağırışı ilə Respublika Prokurorluğuna sorğu ilə müraciət edilsin.
İclasda nəhayət, beynəlxalq ictimaiyyətin də referenduma çıxarılacaq dəyişikliklərdən narahatlıq ifadə etməsi yüksək qiymətləndirilib. ABŞ Dövlət Departamentinin referenduma çıxarılacaq dəyişiklikləri Avropa Şurasının Venesiya Komissiyasına və ATƏT-in Demokratik Təsisatlar və İnsan Haqları Ofisinə (ODIHR) təqdim etməyə çağırması təqdir olunub. Təklif edilәn dəyişikliklər nəinki mövcud Konstitusiyaya, həmçinin Azərbaycan vətəndaşlarının fundamental hüquqlarını məhdudlaşdırdığı üçün dövlətimizin üzərinə götürdüyü beynəlxalq öhdəliklərə də ziddir. Koordinasiya Mәrkәzi beynəlxalq təşkilatları, xüsusilə Avropa Şurası və ATƏT-i təklif olunan dәyişikliklәrә rәy vermәyә çağırıb.