Əliabbas Rüstəmov həbsxanaya göndərildi

Rüşvət vermədə təqsirləndirilən Əliabbas Rüstəmovun cinayət işi üzrə məhkəmə başa çatıb. İttihama görə, “Yasavul” MMC-nin direktoru Əliabbas Rüstəmovun qanunsuz hərəkətləri barədə Baş prokuror yanında Korrupsiyaya qarşı Mübarizə Baş İdarəsinə daxil olmuş müraciət əsasında istintaq-əməliyyat tədbirləri həyata keçirilib.

Əliabbas Rüstəmov Vergilər Nazirliyinin Vergi Cinayətlərinin İbtidai Araşdırılması Departamentinin İstintaq idarəsində Beyləqan rayon sakini barəsində Cinayət Məcəlləsinin 213.2.2-ci (vergi ödəməkdən yayınma) maddəsi ilə başlanmış cinayət işi üzrə cinayət təqibinə xitam verilməsi və sonuncunun cinayət məsuliyyətindən azad olunması barədə vəd verib. O, guya işin ibtidai istintaqını aparan şəxsə 90 min manat məbləğində rüşvət verilməsi üçün rayon sakinindən cəmiyyətin ofisində 95 min manat məbləğində pulu alarkən cinayət başında saxlanılıb.

Baxış zamanı Əliabbas Rüstəmovun üzərindən 95 min manat məbləğində nağd pul, habelə xidməti otağından ibtidai istintaq üçün əhəmiyyət kəsb edən sənədlər aşkar edilərək götürülüb. Əliabbas Rüstəmov Cinayət Məcəlləsinin 312.2-ci (rüşvət vermə) maddəsi ilə təqsirləndirilən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib.

Qeyd edək ki, Əliabbas Rüstəmov əvvəllər Vəkillər Kollegiyasının üzvü olub.

Bakı Ağır Cinayətlər Məhkəməsinin hökmü ilə Əliabbas Rüstəmov 7 il müddətinə azadlıqdan məhrum edilib. Hökmdən narazı qalan Əliabbas Rüstəmov apelyasiya şikayəti verib. O, günühasız olduğunu və barəsində bəraət hökmünün çıxarılmasını istəyib.

Əliabbas Rüstəmovun şikayəti araşdırılması üçün Bakı Apelyasiya Məhkəməsinə göndərilib. Hakim Mirpaşa Hüseynovun sədrlik etdiyi kollegiyada Əliabbas Rüstəmovun apelyasiya şikayətinin dəlilləri araşdırılıb. Sonda şikayət üzrə qərar elan edilib. Qərara görə, Əliabbas Rüstəmovun şikayəti təmin edilməyib.